¹ नो समयल येशुला चेलार या लेउङ हुदे हैलेकेर, स्वर्गलो राज्यल पार भन्दा घेओ सु हो ?” ² येशुय या छेउला तोबो जीमो लुजालाई या खुलो, र होलाई नोराई खार्ल यानयो, ³ र हैयालेओ, “साँचोज ङा जेरलाई हैङाले, जेरय पश्‍चताप दोदे आउ लुजा मीतानो माताकाई सम्म, जेर अबुर सुय रीतीय स्वर्गलो राज्यल बान्या जे मालेय । ⁴ नैतादे, जोय आउ जीमो लुजाय मितानो ओल्लाई नम्र जयो, नो मीज स्वर्गलो राज्यल पार भन्दा माहान तान्या ले । ⁵ होकाई जोय ङा मीनल तोबो इतानो जीमो लुजालाई अपनयो, होय ङालाई अपनय । ⁶ ङाल विश्‍वास दोन्या आउ जीमोर मध्ये तोबोलाई पनि जोय पाप दोन्या लगयो, नोलो घाँटील तोबो घेओ लुङ झुण्डैदे समुन्द्ररलो गहीरोल ख्यान्या चाउ तान्या ले । ⁷ कठीन ताओ समयलो कारण आउ संसारलो धीक्‍कार ! कतान्याकी इतानो समय हुन्या आवशेक ले तर नो मीलाई धीक्‍कार जो लेउङाई इतानो समय हुय ! ⁸ यदी जेलो कुइ अथवा खङय जेलाई पाप दोन्या लगयो भन्या, नोलाई पल्च्यो र नोलाई जे लेउङाई टाढा ख्याच्यो कतान्याकी नेहेबोलो खङ नेहेबोलो कुइ तादे अनन्तलो मेहेल ख्यासीन्या भन्दा लुला सन लङ्गडा तादे जीवन बान्या जेय लागीत चाओ ताय । ⁹ यदी जेय मीलुङय जेलाई पाप दोन्या लगयो भन्या, नोलाई पुल्च्यो, र जे लेउङाई टाढा ख्याच्यो । नेहेबोलो मीलुङ तादे अनन्तलो मेहेल ख्यासीन्या भन्दा तोबो मीलुङ लाङदे जीवनल बान्या जेलो लागीत चाउ ताय । ¹⁰ होसीयार ताच्यो, आउ जीमोर मध्ये सुलाई पनि ता घीनैच्यो कतान्याकी ङा जेरलाई हैङाले, स्वर्गल नोराई दुतरय सदाज ङा बाबुलो मुहार रहङर जो स्वर्गल लेर । ¹¹ कतान्याकी मिराई जा माहासीउरलाई बचैन्या याहुओ हो ? ¹² जेर कता विचार जे दोज्या ? यदी कोही मीसका त सय भेडार लेर होकाई नोर मध्ये तोबो माहके भन्या कता होय नो उन्‍नाईस सयलाई तोबो पोलो छेउल राहादे नो माहासीउलाई खीम्‍न्या माबायदा ? ¹³ होकाई साँचोज ङा जेरलाई हैङाले, यदी होय नो माहासीउ भेडालाई दैके भन्या, हो सका लेउ नो उन्‍नाइस सय भेडा नो तोबोलो लागीत होय भ्या रेङे । ¹⁴ नैजैदेज, आउ जीमोर मध्ये तोबो पनि नास गताक लेदे स्वर्गल लेन्या जेराई बाबुय इच्छा मादोर । ¹⁵ यदी गेय भाइय जेय विरोधल पाप दोके भन्या, बाच्यो र बाथङज दैसीदे होलाई हल्ती सतन्च्यो । यदी होय जे पाङ थैके भन्या, जेय जे भाइलाई दैन्या जेले । ¹⁶ तर यदी होय जे पाङ मा थय भन्या, अबुर तोबो वा नेहेबोलो भाइलाई जे सका लाङच्यो, ताकी नेहेबोलो वा सोमोलो जना साक्षीलो पाङ लेउङाई हरेक पाङ सत्य गथरैसीक । ¹⁷ र यदी होय नोराई पाङ पनि थैन्या इन्कार दोके भन्या, आउ विषय मण्डलीलाई हैलेच्यो । यदी होय मण्डलीलाई पनि थैन्या इन्कार दोके भन्या, हो जेलो लागित गैर यहुदी वा कर सोचैन्या सहर गताक । ¹⁸ साँचोज ङा जेरलाई हैङाले, जो पाङर जे संसारल जे भाय, नो स्वर्गल पनि भासीन्या ले । होकाई जो पाङर जे संसारल फैन्या जेले, नो स्वर्गल पनि फैसीन्या ले । ¹⁹ अझ ङा जेरलाई हैङाले, यदी जेर मध्ये नेहेबोलोय नोरय या निहीओ जो सुकै पाङरल आउ संसारल सहमत तार भन्या, स्वर्गल लेन्या ङा बाबु लेउङाई नोराई लागीत नो दोसीन्या ले । ²⁰ कतान्याकी जोङ नेहेबोलो वा सोमलो ङा मीनल भेला तार, ङा नोराई खार्ल तान्या ङाले । ²¹ होकाई पत्रुस याहुओ र येशुलाई हैलेकेर, “प्रभु, ङा भाइय ङा विरोधल खापाला पाप ओदोओ भन्या ङाय होलाई क्षमा ङादोके कता सात पाला सम्म । ²² येशुय होलाई हैयालेओ, ङा जेलाई सात पाला हैलेदे ङामा हैले, तर सत्तरी गुणा सात पाला सम्म । ²³ नोकारण, स्वर्गलो राज्यलाई तोबो इतानो राजा सका तुलना दोन्या धुसीई, जोय या नौकर सका ओ हीसाब मीलैन्या ओ चाहीउ । ²⁴ जब नोय हिसाब लाङो थालीउ, तोबो नौकर याय ङाहाक रैसीउ जोय यालाई दश हजार सुनला सिक्‍का फोओ परिन्या ओलेउ । ²⁵ तर नो नौकर सका नो चुक्ता दोन्या कताज उपाय मातादे नोलो मालीकय नो सका नोलो ज्या, नोलो जार सन पार वस्त योय नो फोन्या आदेश ओयओ । ²⁶ नैतादे, नो नौकर घोडा टेकीदे याय ङाहाक घोप्‍टो ओ परीउ, होकाई हैओलेओ, ‘मालीक, ङा सका धैर्य दोच्यो, होकाई ङा जेरलाई पार वस्त फोन्या ङाले ।” ²⁷ नैतादे, नो नौकर मालीक र दयाय भरिसीउ कारण याय नोलाई राहाकेर र ओरीन पनि राहाकेर । ²⁸ तर नो नौकर पाखाङ ओबाओ र नोय ओ नै नौकरलाई ओदयो नो मीय आउलाई त सय दिनार फोओ परिन्या ओलेउ आउय होलाई ओ केहेओ, र घाँटील अथैकु, र हैओलेओ, ‘नङय ङालाई जो फोओ परिन्या ले, नो फोके ।’ ²⁹ तर नोलो नईय घुँडा टेकीदे नोलाई बीन्ती ओदोओ ङा सका धैर्य दोच्यो, होकाई ङा जेलाई पार ऋृण र फोन्या ङाले ।’ ³⁰ तर नो ङहादे ङा नौकरय इन्कार ओदोओ । बरु, नो ओबाओ र होय फोओ परिन्या ऋृण चुक्ता मादोकाई सम् होलाई झ्यालखानाल ओझाओ । ³¹ नोलो अबुर नैर नौकरर जो तादे ओलेउ नो रहङकर, होर भ्याज निरास ताकेर । होर हुकेर र जो तादे ओलेउ नो पार होराई मालीकलाई हैलेकेर । ³² नो छिन्ङ नो नौकरला मालीकय नोलाई खुल्दे हैलेकेर, नङ दुष्त नौकर, नङय ङालाई बिन्ती दोसीउ कारण ङाय न पार ऋृणर नङलाई माफ ङा दोके । ³³ ङाय न तरल दया दोसीउ मीतानो, कता नङय पनि ननैलाई ओ तरल दया दोसीउ परिन्या ओमालेओ ? ³⁴ नोलो मालीक रिसिदे नोय फोओ परिन्या पार कर्जा चुक्ता माताकाई सम्म नोलाई सतैन्याराई कुइल योकेर । ³⁵ यदी जेर हरेकय याय युङङाई या भाइलाई क्षमा जेमा दोके भन्या ङामी स्वर्गीय बाबुय पनि जेर सका इतानोज दोन्या लेर ।