¹ छा छा छिन्ङ येशुय पत्रुस, याकुब सन याय भाइ यूहन्‍नालाई या सका या लाङो, र नोरलाई याज तोबो झेनो पाहारल या लाङो । ² होराई ङाहाक या अनुहार ओ बदलीउ । याय अनुहार घाम मीतानो ओ चम्कीउ, र याय क्‍ववा जोतो मीतानो उज्यालो ओताओ । ³ नल मोसा सन यलीला या सका या पाङज्याउ होरय रहङकेर । ⁴ पत्रुसय येशुलाई हैयालेओ, “प्रभु, गेलाई आङ ज लेन्या चाउ ताय जेय जे चाही के भन्या, ङा आङ सो, गोता वास्चुसीन्या जैन्या ङाले । तोबो जेय लागीत तोबो मोसालो लागीत सन तोबो यलीयालो लागीत, ⁵ जब होय ओ पाङज्याउ, तब चम्कीसीउ बादलय नोरलाई ओकबो, र नङाई बादललो भीत्ररङाई इतानो सोर ओहुओ, आउ ङाय प्रीय जा हो जो सका ङा भ्या प्रशन्‍न ङाले । आउराई पाङ थैच्यो । ⁶ जब चेलारय आउ या थयो, नोरय या अनुहार मोहोदे भ्या छेकेर । ⁷ होकाई येशु याहुओ र नोरलाई या छुओ र हैयालेओ, “सोच्यो र ता छेच्यो ।” ⁸ नो छिन्ङ नोरय रोत्त रहङकेर, तर येशुलाई बाहेक अबुर सुलाईज यामा रहङो । ⁹ जब यार पाहारङाई मेल या झरिज्याउ, येशुय नोरलाई इतानो हैलेदे आज्ञा यायओ, “मीलो जा सैसीउङाई जीउदो तादे मासोका सम्म आउ दर्शनलो बारेल सुलाई पनि हैतालेच्यो ।” ¹⁰ याय चेलारय यालाई इतानो हैलेदे गीन्केर, “नैताकीन, एलीया ङाहादे हुन्या ताई हैलेदे शास्‍त्रीरय कतान्या हैलेर के ?” ¹¹ येशुय जवाफ यायओ र हैयालेओ, “एलीया अवस्य हुन्या लेर र पार पाङलो पुनर्स्थापना दोन्या लेर । ¹² तर ङा जेरलाई हैङाले, एलीया ङाहादेज हुदे लेर, तर नोरय यालाई यामा सरेओ । नोलो बदला, नोरय या तरल जो होराई युङ ओ लागीउ नोज दोकेर । नैजैदे, मीलो जाय पनि नोराई कुइ लेउङाई दुख भोगीन्या लेर ।” ¹³ होकाई याय वप्‍तिसमा योन्या यूहन्‍नालो बारेल नोर सका पाङदे या लीज्याउ लेउ हैलेन्या पाङ चेलारय गालकेर । ¹⁴ जब यार भीड लेउ पोल याहुओ, तजना मी यालेउङ हुदे याय ङाहाक घोडा तेकीदे हैओलेओ, ¹⁵ “प्रभु, ङा जा तरल कृपा दोच्यो, कतान्याकी होलाई पुल्न्या रोग लागीदे, र होय कठोर रुपल दुख भोगीदे लीज्या कतान्याकी हो प्राय: मेहे सन रिहील तेहेय । ¹⁶ ङाय होलाई जेय चेलार लेउङ ङा रहयो, तर होरय आउलाई समैण्या माधुकेर ।” ¹⁷ येशुय जवाफ यायओ, र हैयालेओ, “हे अविश्‍वासी सन भ्रष्त पुस्तर हो, खर्क सम्म ङा जेर सका चुसीन्या ? खरक सम्म ङाय जेरलाई साथ योन्या ? होलाई येदे ङा लेउङ रैच्यो ।” ¹⁸ येशुय होलाई या हप्कयो र झ्या हो लेउङाई पाखाङ ओ पुलुओ नो छोरया नो बेलाङाईज चाउ ताके । ¹⁹ नो छिन्ङ चेलार गुप्यल येशु लेउङ हुकेर र हैलेकेर, “गेय कतान्या नोलाई पाखाङ पुलैन्या गेमाधुओ ?” ²⁰ येशुय नोरलाई हैयालेओ, “जेरलो कम्जोर विश्‍वासलो कारण कतान्याकी साँचोज ङा जेरलाई हैङाले, यदी जेर सका रायोलो गेडा जीतानो याज विश्‍वास ले भन्या पनि आउ पाहारलाई जेरय, “आङाई हतिदे नल बान्के” हैजैलेके भन्या पनि नो बान्यालो र जेराई लागीत कोही पनि पाङलो असम्भव तान्या माले । ²¹ तर इतानो कीसीमला झ्यालो आत्मा चाही प्रार्थना सन उपवास बेगार पाखाङ मा पुलुय ।” ²² जब यार गालीलल या चुसीउ, येशुय या चेलारलाई हैयालेओ, “मीलो जा मीराई कुइत योसिन्या लेर । ²³ र नोरय यालाई सैन्या लेर र होर सोङ छाल सोन्या लेर ।” चेलार भ्या दुखीत ताकेर । ²⁴ जब यार कर्फनहुमल केदे यालेउ, आधा सेकेल कर उथैन्या मीर पत्रुस लेउङ हुकेर र हैलेकेर, कता जेरलो मास्तरय आधा सेकेल कर माफोर ?” ²⁵ होय हैओलेउ, “फोर ।” तर जब पत्रुस झीम भीत्ररल बाकेर येशु ङाहादे हो सका पाङकेर र हैलेकेर, “सीमोन जय विचार कता लीज्या ? पृथ्वीला रााजारय सु लेउङाई कर सन महसुसल दैर नोरलाई राजाङाई सै पर्देशीर लेउङाई ?” ²⁶ जब पत्रुसय “पर्देशीरङाई” हैलेदे हैओलेउ, येशुय नोलाई हैयालेओ “नैताकीन” , प्रजार चाही कर फोन्याङाई मुत्त तार । ²⁷ गेरय कर सोचैन्यारलाई पाप दोन्या बाध्य मा जैन्या हैलेदे समुन्द्ररल बाच्यो, बल्छी झाच्यो र जो ङाहा ङाहादे परिई नोलाई सेल्च्यो जेय नोलो ह्‍या फैसीउ छिन्ङ जेय त पैसा दैन्या जेले । नो रैच्यो होकाई ङामी सन जे लागीत कर सोचैन्यारलाई योच्यो ।”