¹ नो छा येशु झिमङाई पाखादे पुलुदे या बाओ र समुन्द्ररलो छेउल या चुसीउ । ² याय येदे होदे तोबो घेओ भीड दुप्सीकेर । नैतादे, या तोबो नाउ भित्ररल याबाओ र नल चुसीकेर । पार समुन्द्ररलो छालला च्यसीकेर । ³ तब येशुय दृष्‍टान्तल होरलाई भ्या पाङ हैयालेओ । याय इतानो हैयालेउ, “रहङच्यो, त जना धुर बान्या मी धुर बान्या लेदे ओ पुलुओ ।” ⁴ जब याय धुर याबाओ, कोही धुरर यमलो छेउल परिकेर, होकाई बाजार हुदे नो धुररलाई ज्योकेर । ⁵ अबुर धुरर चीही धाँदोल परिकेर, जोङ भ्या गम ओमालेउ । नोर परिकेर, कतान्याकी नल गम गहीरो सम्म ओमालेउ । ⁶ तर जब चर्काउ घाम ओलागीउ, नोर सीकेर कतान्याकी नोराई जरा बादे ओमालेउ, होकाई नो थङदुके । ⁷ अबुर धुरर काँडालो झोम भित्रल परिकेर । नो काँडालो बोट बढीदे ओहुओ र नो नीसासीदे ओसीउ । ⁸ अबुर धुरर चाउ गमल परिकेर र कोहीरय सय गुणा, कोहीरय साठी गुणा र कोहीरय तीस गुणा अन्‍नर या पलयो । ⁹ जो सका ना लीज्या होय गथैक । ¹⁰ चेलार हुकेर येशुलाई हैलेकेर, “जेय भीडर सका कतान्या दृष्‍टान्तरलङाई जे पाङ ।” ¹¹ येशुय जवाफ यायओ र नोरलाई हैयालेओ, “जेरलाई स्वर्गलो राज्यला रहस्यर बुझीन्या मौका योसिदे लीज्या, तर नोरलाई आउ योसीदे माले ।” ¹² कतान्याकी जो सका ले, होलाई अझ भ्या योसीन्या ले, होकाई नो सका प्रशस्त तान्या ले । तर जो सका माले, होसका ताओ र पनि हो लेउङाई लाङसीन्या ले । ¹³ नोरला लागीत यशैया अगमवक्ताल अगमवाणी पुरा ताय, जोय इतानो हैलेर, ¹⁴ “थैसीउ तादे के जेरय जे थै, ज रहङ, तर जेरय कोही रितीय जेमगाल: रहङदेज नैसीउ तादेके जेरय जे रहङ, तर जेरय कोही रितीय जेमा रहङ ।” ¹⁵ कतान्याकी आउ मिराई युङ सुस्त तादे लीज्या, र नोर फरी ओलरया यार ङाय नोरलाई चाओ जैन्या ङालेउ हैलेदे नोरय या मीलुङ बन्द जैदे लेर । नैतादे नोरय या मीलुङय मा रहङर, र नोरय या नारय माथैर, नोरय या युङय मा बुझीर । ¹⁶ तर धन्यला लेर जेय मीलुङ कतान्याकी नोरय रहङर र जेय ना, कतान्याकी नोरय थैर । ¹⁷ सैचोज ङा जेरलाई हैङाले, की जेरय जो रहङदे जे लीज्या भ्या अगमवक्तार सन धर्मी मीरय नो रहङन्या युङ या जयो, तर नोरय नो या मारहङो । जेरय जो थैदे जे लीज्या नोरय नो थैन्या युइ या दोओ, तर नोरय आउ यामाथयो । ¹⁸ तब धुर बान्यालो दृष्तान्त थैच्यो । ¹⁹ जब कोहीरय राज्यलो वचन थयो, तर नोलाई मा बुझीओ, तब दुष्त हुय र होलो युङल जो बासिदे ओलेउ, नो खोसीदे लाङे । नो चाही नो धुर हो जो यमलो छेउल बासीदे ओलेउ । ²⁰ धाँदो गमल बासीउ चाही नो हो जोय वचन ओथयो, र होपाईनाज रेङदे नोलाई ग्रहण दोय । ²¹ तर होय ओल सका जरा माताय र कोही छा सम्म याज तिकीय तर जब वचनलो कारण सतैसी सन कष्तर हुय, होय थेस ज्योय । ²² काँडा झोमल बासीउ चाहीनो हो, जोय वचन थयो, तर संसारलो वास्ता सन धनीराई कपतय वचनलाई मेहेय, होकाई असफल ताय । ²³ चाओ गमल बासीउ चाही नो हो, जोय वचन थयो, र नोलाई गाले । नो यज साँचो रुपल फल फलयो र कोहीरय सय गुणा कोहीरय साठी गुणा कोहीरय तीस गुणा फल फलयो । ²⁴ येशुय नोरलाई छुत्तो दृष्तान्त हैयालेओ । याय हैयालेओ, स्वर्गलो राज्या इतानो मी मीतानो हो जोय ओ हेङल चाओ धुर ओ बाओ । ²⁵ तर जब मीर या अस्याओ, होलो सत्रुर ओहुओ, र पीमा बारिल सामा बादे ओबाओ । ²⁶ जब पीमा ओ उम्रीउ नो पीमाय अन्‍नर फलैन्या ओ लागीउ तब सामार पनि सतन्सिकेर । ²⁷ नो हेङलो मालीकलो दासर हुदे यालाई हैलेकेर, ‘हजुर, कता जेय बारिल चाओ धुर याज बादे जेमालेउदा ? आर्क आउ बारिल संर कैजैदे हुकेर ?’ ²⁸ याय नोरलाई हैयालेओ, ‘आउ तोबो सत्रुरय दोसीउ हेन हो ।’ नो दासरय यालाई हैलेकेर, “सै गेर बादे नोलाई भोसीउ जे चाही ?” ²⁹ नो हेङला मालीकय हैलेकेर, “माहङक, जब जेरय सामारलाई जे भोय, जेरय नो सका पीमारलाई पनि ज भोया । ³⁰ पीमा पल्न्या बेला सम्म आउ नेहेबोलोलाईज बोलोङज बढिन्या योच्यो । पल्न्या बेलाल खेतालारलाई ङा हैलेन्या ङाले, ङाहादे सामारलाई भोदे नोलाई जलैदे ख्यान्या मुठा पोच्यो, तर पीमालाई मा भकारील दुब्च्यो ।” ³¹ नो छिन्ङ येशुय नोरलाई छुत्तो दृष्तान्त हैयालेओ, याय हैयालेओ, “स्वर्गलो राज्य चाही सर्सुलो गेडा मीतानो हो जो तोबो मीय ओ लाङो र ओ हेङल ओबाओ । ³² आउ धुर अबर धुर भन्दा जिमो ताय । तर जब आउ बढिई, आउ बारिल ताओर पार भन्दा घेओ ताय । आउ तोबो सीङ मीतानो ताय, होकाई आकाशला बाजार हुर र आउय हाङगारल घोल जैर ।” ³³ नो छिन्ङ येशुय नोरलाई छुत्तो दृतान्तल हैयालेओ, “स्वर्गलो राज्य चाही सोरा मीतानो हो जो तोबो मेमाय लाङर र सोङ खुरी मनमल नो मा फुललीकाई सम्म बरार ।” ³⁴ येशुय आउ पार पाङ भीडरलाई दृष्तान्तल हैयालेओ । होकाई दृष्तान्तल बाहेक याय नोरलाई कताज यामा हैलेओ । ³⁵ आउ चाही अगमवक्तारय जो हैलेदे यालेउ, नो पाङ सत्य गताक लेदे ओताओ हो । जब याय हैयालेओ, ङा ङाय ह्‍या दृष्तान्तरल फैन्या ङाले । ङा आउ संसारलो सुरुङाई मोहोसीउ पाङरलाई प्रकट जैन्या ङाले ।” ³⁶ तब येशुय भीडरलाई याराहाओ र झीम भित्रल याबाओ । याय चेलार या लेउङ हुकेर र हैलेकेर, “हेङला सामाराई बारेल हैलेसीउ दृष्तान्त गेरलाई चाउ सका हैलेच्यो ।” ³⁷ येशुय जब यायओ र हैयालेओ, “जेय बारिल चाओ धुर या बाबु होर मीलो जा र हो ।” ³⁸ बारी चाही आ संसार हो: होकाई चाओ धुर चाही राज्यला जार हो । होकाई सामार चाही दुष्तलो जार हो, ³⁹ र नो सत्रुर जोय नो सामार बाकेर, नो चाही दुष्त ताय फसललो कटनी संसारलो मीर हो, कटनी दोन्यार चाही स्वर्गदुतर हो । ⁴⁰ नैतादे, जैलेदे सामार दुबसीर र मेहेल ख्यासीर, आउ संसारलो अन्तल इतानोज तान्या ले । ⁴¹ मिराई जाय या स्वर्गदुतरलाई परिङन्या लेर, र नोरय होराई राज्यङाई पाप रैन्या पार वस्त सन पाप दोन्या पाररलाई दुबन्या लेर । ⁴² होरय नोरलाई मेहेलो भत्तील ख्यान्या लेर जोङ घरन्या सन हाकैन्या याज तान्या ले । ⁴³ तब धर्मी मीर होराई बाबुलो राज्यल घा, मीतानो चम्कीसीउ तान्या लेर । जो सका नाले, होय गथैक । ⁴⁴ स्वर्गलो राज्य चाही नामल मोहोसीउ धन मीतानो हो । तोबो मीय नो ओदयो होकाई नोलाई ओ मोहोओ । होलो आनन्दल हो बाय, हो सका ताओ पार वस्त याय, होकाई होय नो हेङ लहङे । ⁴⁵ फरी स्वर्गलो राज्य तोबो व्यापारीय मुल्याल मोतीर खीम्सीउ मीतानो हो । ⁴⁶ जब होय भ्या मुल्पा ताओ तोबो मोती ओदयो, नो ओबाओ र होसका ताओ पार वस्त ओयओ र नो ओ लहङो । ⁴⁷ फरी स्वर्गलो राज्य समुन्द्ररल ख्यासीउ जाल मीतानो हो, होकाई नोय पार खालेला जीपरलाई ओदुबो । ⁴⁸ जब नो ओ भरिसीउ जलारिरय नोलाई समुन्द्ररलो छेउल या सेहेलो । तब हेन मालागीन्या वस्तरलाई ख्याकेर । ⁴⁹ संसारलो अन्तल इतानोज तान्या ले । स्वर्गदुतर हुन्या लेर र धर्मीरला खार्ल दुष्तरलाई छुतैन्या लेर । ⁵⁰ होरय नोरलाई मेहेलो भत्तील ख्यान्या लेर, जोङ घरन्या सन हा कैन्या याज तान्या ले । ⁵¹ कता जेरय आउ पार पाङर बुझिदे जेले ? चेलारय यालाई हैलेकेर, “बुझीदे गेले ।” ⁵² तब येशुय नोरलाई हैयालेओ, “नैतादे, स्वर्गलो राज्यलो चेला तासीउ पार शास्‍त्री तोबो मी मीतानो हो, जो झीमला मी हो, जोय भण्डारङाई नयाँ सन पुरानो वस्तर पुलयो ।” ⁵³ येशुय आउ दृष्तान्तर हैलेदे खेम्सीउ छिन्ङ या नो पोङाई याबाओ । ⁵⁴ तब येशु या नगरल याबाओ होकाई मीरलाई नोरला सभा झीमरल या पयो । नोरय अचम्म तादे हैलेकेर, “आउ मीरय याय ज्ञान सन अचम्मला हेनर कताङाई दैर ? ⁵⁵ कता आउ मी सिकर्मीलो जा माहङक दा ? कता याय आमै मरियम माहङकदाा ? होकाई याय भाइर, याकुब, योसेफ, सिमोन सन यहुदा माहङकरदा ? ⁵⁶ होकाई याय पर बैनार गेराई खार्लज मालेरदा ? नैतादे, आआउ मीय आउ पार पाङ कताङाई दैरके ?” ⁵⁷ नोर यालेङाई मा रेङकेर । तर येशुय नोरलाई हैयालेओ, “अगमवक्तालो आदर मातान्या चाही होलो ओ परिवार सन ओ देशल याज हो ।” ⁵⁸ र नोराई अविश्‍वासीलो कारण याय नल भ्या अचम्मला हेनर यामादोओ ।