1 नो बेला सवाथलो छाल येशु अन्नलो बाली याल याबाओ । याय चेलार करेदे नोरय पीमा तिदे कैन्या लागीकेर । 2 तर जब फरिसीरय नो या रहङो, होरय येशुलाई हैलेकेर, “रहङच्यो जो सवाथल दोन्या अनुमती ले जेय चेलारय नोज दोज्यार ।” 3 तर येशुय नोरलाई हैयालेओ, “कता दाऊदय या सका तासीउ मीरय करेसीउ बेलाल कता दोकेर हैलेन्या पाङ जेरय खर्कज परिदे जेमाले ?” 4 कैजैदे होर परमेश्वरलो झीमल पसीदे यालो उपस्थीतीलो भरे याजेओ, जो या सन या सका तासीउरला लागीत ज्यान्या उचीत ओलेउ तर नो पुजाहारीराई लागीत याज उचीत ओलेउ ? 5 र सवाथल पुजाहारीरय नो छालाई अपवित्र जैर, तरै पनि नोर दोष मालेउ तार हैलेन्या पाङ कता जेरय व्यवस्थाल परिदे जेमलेदा । 6 तर ङा जेरलाई हैङाले, मन्दीर भन्दा माहान त जना आङ लेर । 7 ‘ङा कृपा ङा चाही र बलीदान माहङक,’ हैलेदे पाङलो अर्थ यदी जेरय बुझीसीउ ताकीन जेरय निर्दोषलो निन्दा दोन्या जेमालेउ । 8 कतान्याभन्या मीराई जा सवाथला प्रभु लेर । 9 नो छिन्ङ येशु नङाई बोलोङज बाकेर र नोराई सभा झिमरल याबाओ । 10 नल तोबो कुइ थङसीउ मी ओलेउ । येशुलाई पापलो दोष लगैन्या फरीसीरय यालाई गीन्केर, कता सवाथल समैन्या चाउ ताय ? 11 येशुय नोरलाई हैयालेओ, ‘कता जेराई खार्ल इतानो मी ताय । जो सका तोबो याज भेडा ले, र यदी सवाथल नो भेडा गहीरो खाल्ताल ओताओ भन्या, होय नोलाई क्योदे पाखाङ मा पुलयादा ? 12 नीतानो ताकीन, तोबोलो मुल्या नो भेडा भन्दा खा भ्या ताखो ! नैतादे, सवाथल असल दोन्या न्याय सङगत ताय ।” 13 होकाई येशुय नो मीलाई हैयालेओ, “जेय कुइ पसारिच्यो ।” होय ओ कुइ ओ पसारिउ, र होलो नो कुइ छुत्तो कुइ मीतानो सम्दे चाउ ताके । 14 तर नो फरीसिर पाखाङ बाकेर र षड्यन्त्र रचिन्या थालीकेर, नोरय यालाई पछैकेर र याय नोरलाई पारलाई चाउ याजयो । 15 होकाई जब येशुय आउ पाङ थाहा या सनो, या नङाई पुलुकेर भ्या मीरय यालाई पछैकेर र याय नोरलाई पारलाई चाउ याजयो । 16 याय बरेल अबुरलाई हैतालेच्यो हैलेदे याय नोरलाई आदेश यायओ । 17 तकी यशैया अगमवक्ता लेउङाई इतानो हैलेसीउ पाङ सत्य साबित गताक, 18 रहङच्यो ङा दास जोलाई ङाय छानीदे ङाले; ङालो भ्या प्रिय, जोल ङा युङ प्रशन्न ले । ङा होरलाई ङामी आत्मा खनैन्या ङाले, होकाई होरय गैर यहुदीरलाई न्यायलो घोषणा दोन्या लेर । 19 नोरय सङघर्ष दोन्या मालेर, नता घेओ स्वरय किहीन्या लेर नता कोहीरय गलीलरल याय स्वर थैन्या लेर । 20 होय कोही पाहाओ नरकतलाई क्यान्या मालेर; याय न्यायलाई बिजयल यामा केकाई सम्म याय कोही धीपधीप चाङसीउ भाङलाई नीभैन्या मालेर । 21 होकाई याय मीनल गैर यहुदीरय विश्वास दोन्या लेर । 22 होकाई झ्यालो आत्माय सतैसीउ त जना अन्धा सन पाङन्या माधुन्या मी येशु लेउङ या रैसीउ । याय नोलाई या समो र नो पाङो माधुन्या मी पाङो धुन्या सन रहङो धुन्या ओताओ । 23 पार मीर छक्क तादे हैलेकेर, “कता आउ मी दाऊदला जा तान्या धुर ?” 24 तर जब फरीसीरय आउ अचम्मला पाङ थैकेर, नोरय हैलेकेर, “आउ मीय अबुर कताज माहङक, तर झ्यालो राजा बालजीबुलङाई झ्यार ओ पुलैज्या ।” 25 तर येशुय नोराई विचारल हैलेसीउ या सनो र नोरलाई हैयालेओ, “आललज भासीउ पार राज्यलाई उजाड जैसीन्या ले, होकाई ओल्लज भासीउ पार सहर सन झीमलार तीकीन्या मालेर ।” 26 यदी सैतान यज सैतानलाई पुलुओ भन्या, नो ओललज भासीय । नोलो राज्य कैजैदे तीकीया ? 27 होकाई ङा बालजीबुलङाई झ्यार ङा पुलै भन्या, जेरलाई पछैन्यारय सु लेउङाई नोरलाई पुलैर के ? आउकारण, नोर जेराई न्यायधीष तान्या लेर । 28 तर यदी ङा परमेश्वरलो आत्मा लेउङाई झ्यार ङा पुलैभन्या, परमेश्वरलो राज्य जेरल हुदे लीज्या । 29 र कोही मीरय तोबो मीलाई ङाहादे मा पोसीकाई सम्म होय झीमल पसीदे होय सामानर कैजैदे कुन्या धुसी ? नो बल्या मीलाई पोसीउ छीन्ङ होय झीमला सामानर नोय कुय । 30 जो ङा सका माले हो ङा विरोधल ताय, होकाई जोय ङा सका मादुबे होय छरपष्त जयो । 31 नैतादे ङा हैङाले, मीय दोसीउ पार पाप सन ईश्वर नीन्दा क्षमा तान्या ले, तर पवित्र आत्मालो विरोधल दोसीउ नीन्दा क्षमा तान्या माले । 32 होकाई जोय परमेश्वरला जाो विरुद्धल कोही पाङ पाङे भन्या होलाई क्षमा दोसीन्या ले । तर जोय पवित्र आत्मालो विरोधल पाङे नोलाई न आउ संसारल नता हुन्या संसारल क्षमा दोसीन्या ले । 33 की भन्या सीङलाई चाओ जैच्यो र नोलो सहीलाई पनि चाओ जैच्यो, की भन्या नो सिङलाई माचाउ जैच्यो र नोलो सहीलाई पनि माचाउ जैच्यो, कतान्याकी सिङ नोलो सही लेउङाई सरेसीन्या ले । 34 ए गुललो सन्तानर, जेर दुष्त जे लीज्या कैजैदे चाओ पाङ पाङन्या जे धुय ? कतान्याकी युङल जो लीज्या, नोज ह्याङाई पुलुय । 35 तोबो चाओ मीय ओ युङल ताओ चाउ पाङय जो चाओ ले, नोज पाखाङ पुलयो, होकाई तोबो माचाउ मीय ओ युङल ताओ माचाउ पाङय जो दुष्त लीज्या नोज पाखाङ पुलयो । 36 र ङा जेरलाई हैङाले, “की न्यायलो छाल मीरय ओलय पाङन्या पार व्यर्थ वचनलो लागीत लेखा योन्या लेर । 37 कतान्याकी जेराई वचन लेउङाई ज जेरलो न्याय तान्या ले, होकाई जेरलो ज वचन लेउङाई जेर दोषी थहरैसीन्या जेले ।” 38 नोछिन्ङ कोही शास्त्रीरय सन फरीसीरय येशुलाई उत्तर योदे हैलेकेर, “गुरु, गेय जेङाई कता चिन्नर रहङन्या गे चाही ।” 39 तर येशु नोरलाई जवाफ यायओ र हैयालेओ, तोबो दुष्त सन व्यभीचारी पुस्ताय चिन्हर खीमर । तर नोलाई योना अगमवक्तालो चिन्हर बाहेक अबुर चिन्ह कताज योसीन्या माले । 40 कतान्याकी जैलेदे योना सोङला सन सोङ रिल ङाहालो भुडी ओलेउ, नैजैदेज मीराई जा सोङ छा सन सोङ रिल सम्म पृथ्वीलो गर्व भित्रल तान्या लेर । 41 निनबेला मीर न्यायलो छाल आउ पुस्तार सका च्यासीन्या लेर र आउ जातीलो गील्ला दोन्या लेर । कतान्याकी योनालो सन्देश थैदे नोरय पश्चताप दोदे यालेउ, र रहङच्यो, योना भन्दा अझ माहान कोही आङ लेर । 42 दकखीला रानी आउ पुस्ता मीर सका न्यायलो छाल सोन्या लेर, र आउलो गील्ला दोन्या लेर । नोर पृथ्वीला कोनाङाई सोलोमनला ज्ञानला पाङर थैन्या हुकेर, तर रहङच्यो सोलोमनलो भन्दा कोही माहान आङ लेर । 43 जब कोही शुद्ध आत्माय मीलाई राहाय, नो रिही मालेउ पो लेउङाई बाय र नोय आराम खिमे, तर नोय नो मादयो । 44 होकाई नोय हैलेय, “ङा ङा झीमल ओल्न्या ङले जोङाई ङा हुके । ओल्सीउ छिन्ङ नोय ओ झीम सफा जैसीउ सन मीलैदे नैसिउ दयो । 45 नो छिन्ङ नो बादे ओल भन्दा दुष्त अबुर सात आत्मालाई दुबे होकाई नोर पार नल भित्रल चुसीन्या हुर । होकाई नो मीलो छिन्ङा अवस्ता ङाहादे ङा भन्दा अझ माचाउ ताय । आउ दुष्त पुस्तालो लागीत थीक इतानोज तान्या ले ।” 46 जब येशु भीडर सका या पाङज्याउ, याय आमै सन भाइ या सका पाङन्यालो लागीत पाखाङ गेन्दे चुसीकेर । 47 कोहीरय यालाई हैओलेओ, “रहङच्यो, जेय आमै सन भाइर जे सका पाङन्या पाखाङ गेन्दे चुसीदे लीज्यार ।” 48 तर येशुय हैयालेओ नीतानो हैलेन्या मीलाई हैलेच्यो, “ङा आमै सु हो ? र ङा भाइ सु हो ?” 49 होकाई याय या कुई याय चेलार लेउदे पसारिदे हैयालेओ, “रहङच्यो, ङामी आमै ङा भाइर आउरज होर ! 50 कतान्याकी जोय स्वर्गल लेन्यार ङा बाबुलो इच्छा अनुसार दोय, नो मीज ङा भाइ ङस बैना ङा आमै होर ।”