¹ Yoi lina ntsindelya bifili bonyangelaka eneyali.Bolotsi eneyali ino nko tengele baoy'ane nko eemamene mpoke baho lonugu tuu. ² Bolendaka mbwa,bolendaka bokambi bon'owe,bolendaka bakesi; ³ Latsin'iso toyali boloi bona nkesa ena yonge,iso bana kumya Yakomba lokumo la bolimo bonolotsi ko tokumya lokumo lantsin'ena Masiya Yesu lofil'otema eneyali yonge. ⁴ Kang'emi amene nsoko kolana mbile botema eneyali yonge.Yombo boto omoi akanela,ate aokolana yilisa botema eneyali yonge,emi njolok'ende. ⁵ Emi nkesamaki yonge eniina bona mwambi njali enonyanga bona isalele,en'oloi bona Benyamina emi ndende biise Ebele mene ona ba Ebele ena yoi lina basangya,emi njaaki Bofalusi ⁶ Ena likambo lina mposa emi nyomaki ekelesa;ena likambo lina mbongi eneyali basangya ntaata likambo lina lofeli. ⁷ Koko baoyi banayaaki nkita eneyali emi,motanga baho nko bototoloto latsin'ena Masiya. ⁸ Sosolo lakanela baoyi bahaatu nko bototoloto latsina bolotsi bona ndeka bona njeya ena Masiya Yesu,nko Nkolo en'ami.Mbungyaki baoyi bahatu latsin'en'ande, ko lakanela baho nko bailo latsin'eho mbate Masiya. ⁹ Ko nsingyama eneyali ende,efa la mbongi en'amamene,nko mbongi eneyali en'asangya;ohonde la mbongi eho eneyali latsina iimelyo eneyali Masiya,nko mbongi enatama eneyali Yakomba limelyo; ¹⁰ Latsin'eho nj'eyende,ko la mpamba en'etwelo enande enek'end'owaka ko lambanelo ena biino binande,latsin'eho nkolane leweli,benande. ¹¹ Yombo layelisa enetwelo enekend'owaka. ¹² Mpil'oka molata isanga,ko efa lantsina mokolana nko kolana isanga ohonde njombo kenda la lotsinji,yombo nongokolana yundisa eho,mbundamaki la Masiya Yesu. ¹³ Bifili mpiloka mosila yunda eho;ohonde emi liila yoi limoko:lofela baoyi banayali en'oso. ¹⁴ Njombo tsua lalotsinji eneyali ndembi eneyali Masiya Yesu nko mbelela la Yakomba ena liiko. ¹⁵ Latsin'eho akoli eneyali isatu batunda eniimelyo tongya likanela baoyi bana lokanyi lone;ko yombo bofakanela yok'osambo'one ena yoi limonyi,Yakomba angokofiswela liho nkoho. ¹⁶ koko akoli eneyali iso tokuse likenda biina liina nko la lelelo lona lokiso eyelaka. ¹⁷ Bifili,ino bokolaka bokotwa bonami,ko bolendaka iyo banayakende yok'osab'oho,bosamb'onatino iso yoka ndembi ena lilako. ¹⁸ Latsina bato biike bayakende banak'emi okosumolak'oso bosumola biike,ko lakosumola isanga nko la mpisoli,emite bayali baoki'owe ban'ekulusu ena Masiya. ¹⁹ Esimbelo eniyo nko mbeka,Yakomba eniyo nko likundju liniy'amene,ko njofefa eniyo eyali nk'ena nsonyi eniyo,ko bakanela nko baoyi bana looko. ²⁰ Koko iso toyali baise loola ko toolengelya boiki bonoyaayi meho,nko Nkolo Yesu Masiya. ²¹ Enengemi umula yonge lin'ehelyo eniso lakina latsin'eho likolane la yonge lina bokond'ona latsin'ena ekambelo eniy'ende yila boyi bahatu ena lifoka linand'amene