¹ Latsin'eho,yombo ekikelyo eyali Masiya,yombo ntsitsimolya nganji ena lolango eyali,yombo eambanelo ena bolimo eyali yombo botema bon'osei boyali yombo tosei toyali. ² Bokokolya ekiko enami,nooka bokanelaka nko yoi limoko,boyaka langanji ehemoko ena lolango,labotema bomoko ko la lokanyi lomoko. ³ Botiilake yoi limoko la ntaango ko la njofefa ohonde la njofima,kuma botoloto akumya banaamonyi ate,baolek'endamene bolotsi: ⁴ Ko botoloto onino atakanela baoyi banand'amene kei; akanelake baoyi ban'ato'akina nkoho. ⁵ Ekoli latsina lokanyi lonee,loyaaki eneyali Masiya Yesu loyalame enyal'ino nkoho. ⁶ Ende onoyaki lokotwa mene bona Yakomba,atakanela yoi liho liniyal'ende la Yakomba kotsu yoi lina mbundamela. ⁷ Koko ende aumolaki bokonde bonande,ko atambaki bokotwa bona boombo,ko ayalamaki enkolanya en'oto; ⁸ Ko eneki'endenyaka nke yooka boto,ayofimaki aimelyaki nko njimelya yengo nko beweli mene bena ekulusu mene. ⁹ Latsin'eho, Yakomba alilelyaki njilelyamene,ko aofaki lina lina lileki baina bahatu. ¹⁰ Latsin'eho ena lina lina Yesu baongu bahatu bayali ena loola la banayali ena looko lana yali ena nse ena looko baunama en'ekumyelo ena Yakomba bafango. ¹¹ Ko ndemi ihatu yimely'oka Yesu Masiya ayali Nkolo,latsina enekumelyo ena Yakomba bafango. ¹² Latsin'eho ino banalangama l'emi yokonekemi oimelyaka ntomo bisike bihitu,efa nko yooka en'aiso banami kei,ohonde isanga lekambelo eneleki enefana emi lino mbongya likamba ekambwa ena loiko lonin'oamene lambonga ko la mbilima; ¹³ Latsin'oka Yakomba kanga ango kamba ekambwa eneyali ino la njanga en'eango ko enekambwa,ko latsin'eango enimely'ende bolotsi. ¹⁴ Bokambaka baoyi bahatu efana bolingolingo ko efana ntaango. ¹⁵ Latsin'eho biinde likambo lina lofeli;ko boyalame soto,baana bana Yakomba bafana Bolema enantoto en'eetwelo ena bato enefana tsilili ko l'ena botsilingitano,latsina ino beeya ena ntoto en'iyo mpey'oka miinda ena looko. ¹⁶ Ko boya suke yoi liiko; latsn'eho mbate ntsina ena lokumo lona loonga mokumya en'ina bona Masiya latsin'oka ntakenda bototoloto,ko ntakamb'ekambwa bototoloto. ¹⁷ Ko kang'emi ndekyame mbeka latsin'enekambwa enimelyo inino,lakik'ekiko ko lanyangela linoatu. ¹⁸ Ko ino bokika eki nko bosamb'oho,ko bonyengel'emi. ¹⁹ Koko lalengelya eneyali Nkolo Yesu,emite ntome Timoteo eneyali ino efana bolingolingo,latsin'eho nkikimya en'engi emi oyea bokotwa boyal'ino. ²⁰ Latsin'emi mpana boto okina onosangi l'ende enalokanyi,onongokanela baoy'anino la sosolo. ²¹ Latsina iyaatu bayafone baoyi baniy'amene,efa baoyi bana Yesu Masiya. ²² Koko ino beeya lomeko lonoki,end'omekamaka,nke yoka bosambo bona saela boona bafango,nde asalaki l'emi ena nsekolya bosimo bonolotsi. ²³ Latsin'eho njali la lisangya oyotomende isanga,eneng'emi ena bokotwa bon'iliy'iyo ena likambo lina; ²⁴ Koko njali la lokanyi eneyali Nkolo emite efana bolingolingo emamene nongoya nkos'amboho. ²⁵ Koko nkanelaki,emite ekoli latsina nkotomele ino Epafolodito efili enami enambana l'emi enekambwa ena nsola,ende ayali ekima inino ko la bokambi ena biinda bonind'emi. ²⁶ Latsin'oka akooka inaatu mposa mene,ko aokaki lokeseli mene latsina ene kend'okaka ayaaki la nkangi. ²⁷ Ayaaki la nkangi mene nko sosolo,nko mbolana l'eweli,koko Yakomba amokamela isei;ko efend'ikei:aonjokamel'emi nkoho,ntongoyata nkeseli ena liko ya nkeseli. ²⁸ Latsin'eho,molotoma la mposa eneleki,latsina,enengende lakina,baonyangele,ko lokeseli lonami lokokolyama isisali. ²⁹ Latsin'eho bootambe eneyali Nkolo l'enyanga ehantu;ko bokumya bato banasangi l'ende bokotwa. ³⁰ Latsin'oka aolamaki l'eweli latsin'enosala bona Masiya ko ailaki nkole liiko lonande ena lilila lin'eweli latsina akoky'eho enindaki enekambelyo ene kino onkambyak'emi.