Ridza bbombi 6

1 Furigoti Yesu da adzi Galilaya na Tiberia dhi dda dzi dzi ro. 2 Bi ku na ndru ngu ra ke ulu,dhonari kpa ngu ke ngu nji na dddu ma dhe pkari ma ke go nari nja. 3 Yesi dji ngu tsidjo ro,ke ma di guna ndi una kpa na. 4 Ro, Paska dhi bboddo ngue chocho,Wayaudi dhi bboddo. 5 Ke ngbe ndinyo rona ro,ke nja bi kuna ndru kpari si ndidhi ngana nari,Yesu pori Filipo dho i: Ko ka ka kodz' mukati i ndrudho ngbagaro,ndiro chu i ndru ba nyo ndima nyo nari dd'e. 6 Kengu fulo po ndi mbu na kethi dd'e,dhonalo ke chu ngue addu ma ndi nji nari ngba. 7 Filipo u lo tso kedho: Dinario mia aro ro ledz' na mukati nzi ka ku iga ndru na kru ri. 8 Ke una ddike pori i,ri e Andrea,Simoni Petro ddu,pori kedho i: 9 Iga ku ddi okatsi ke nake dho ku mukate mbu ndidhi bbe aro na;ro furi ka ka ndika afubu ndru kpari na ngbachudhe? 10 Yesu pori: Ani pori ndru di guna.I nguna ku guna le di nanga ni ro.Kpa di guna ro,kpananga le zo nari ra si kpetsi ndru lufu mbu. 11 Yesu dzi mukati,madha ndingu Ginri dho ro,ke ndo ri guna di na ndrudho;ke dzi bbe maddi ke ndori kpadho,kpaji na ngatsi. 12 Kpa o li naro goti,ke pori ndi una kpadho i: ani gba mukati tso kuku gu tso,nzi ri ro vi ddi ma ro. 13 Kpa su ri ro,mukati mbu naro ma gu ma na ri tso kuku si ngue dyo dre ndidjo aro ri na,ngba kru ndru nyonga nari goti. 14 Fundru kpari,nja Yesu nji na ddu ro,kpa di ripo: Iri ku bbubbu chochoni ndi si e ngodjo nake. 15 Ro Yesu,nja ngue kpa ji ndima lu ndi pi nari ro,tu ngueni kpa ro ro ngu tsidjo,ddiro. 16 Ngasnga,ke una kpa thu dda tsoro ro. 17 Kpa dji bbu na ro ro,kpa ngu da ddadjolu adzi Kapernaumu na.Nga ti ngue bbl'o ro,Yesu chu nza dd'e ngue si kpa na ddingana ri. 18 Nga ngu vu bbo,dda ngu ngbeni ngbe. 19 Ngba ndima ti ngue dda le ko dre-dre-nga aro ndidjo mburi na ddima dre-dre-nga gbo nari goti,kpa nja Yesu ddadjo ndibbiro bbu kuso ndi ndi dr'ro do lu kpa. 20 Ro Yesu pori kpadho i: Iri ku ma ro;nzi ni nji do! 21 kpa ngu ji ndima dd'u ke bbu na ro bbu si ngue dda tso tso bbl'o. 22 Chadzi ddatsoro ma ngue na ndru dd'i ngue bbu ma ddatsoro ddikpa nari utso,ndirigoti Yesu dji ngue fu bbu na nza ndi una kpa na ddinga nari,ndirigoti kpa chu ngue ke ra e ngu tsidjo ddiro nari. 23 Bbu dyi,nja bbu kpari si ngue Tiberiade dhi ngu naro ndi u tuni nga ndru nyo ngue na ngana fuga chu Bboke ngu ngue madha Gindri dho, 24 Fu ndru kpari,dd'i ngue Yesu ma ndi una kpa mana ku nga fu bbuna nari utso ro,kpa tsu bbu na ndimaro kpa ra Yesu ne Kapernaumu na. 25 Ngba ndima ba ke dda dzi dzi nari goti,kpa pori ke ni i: Rabbi,ni ka si iga ngba saa na? 26 Yesu pori kpadho i: Bbubbu,bbubbu,ma ripo nidho ni ma ne,nga ddu kpari manji na lo dho ri ri,ro ri ku ni nyoe nga na nyo li eni o li nari. 27 Ani nji nji,nga sa sani na nyodho ri ri,ro nunu di na shinga djo nga nja na ritsi djo nari chu ndru ddu ka ndi bbu nidho;dhonari ri ku kechu Baba Gindri du ro ndidza ji ri 28 Kpa pori keni: Ko ka konji addu,nja ko nji Gindri dza nji dd'e? 29 Yesu ngu logoti kpadho: Gindri dza nji ku,Gindri cho nake le u nari. 30 Anji ddu kodho,kpa di ripo keni,ndiro chu konja ndirigoti ko u ni u maddi dd'e? 31 Ko bbai nyo ngue mana ngo dja na,ndi le ndi na lo pori nari bbai:Ke bbu ngue mukati kpanyo rana ro. 32 Yesu pori ki kpadho: Bbubbu bbubbu ma ripo nidho,Musa nza bbu ngue rana ro si na mukati nidho ri,ro madza Baba bbubbu ku na rana mukati; 33 dhonari Gindri dza mukati,ku rana rothu nake ndirigoti shinga bbu dz'djo ndrudho nake. 34 Kpa ngu logoti kedho: Bboke,abbu fu mukati ko nyo nzi nzi. 35 Yesu pori kpadho: Ma ku shinga dhi Mukati ddikpake si madhi ngana ro,ke di u na nzi,ddikpake u ma ro ke di dda dyu na nzi. 36 Ro,ma ripo nidho i,ni nja ma nja,ndiri goti ni u ma nza. 37 Baba bbu madho na kru ndru si ku madhi ngana,ndirigoti ma nzi si ku kpa pu bbaidjo ri; 38 Dhonari ma si rana ro,nga ma ji na lo dho ri ri,ro ma cho nake ji na lo dho. 39 Ddichu,macho nake ji nalo ku nzi ma vi ndibbu madho na ritsi ro ddikpa ma,ro ma ka ri ga ga ngo ve sini nadyi. 40 Madza Baba ji nari ku,ddikpake nja ndru ddu ro ndirigoti ke u ke ro ke ba nunu di na shinga;ndirigoti ma si ke ga ga ngo ve sini nadyi. 41 Wayaudi nanga ngu nunu fu lodho,dhonalo Yesu po ngue ri i: Ma ku na a rana ro thu na mukati. 42 Kpa di ripo keni i:Iri ka ku nga Yesu ri,Yozefu ddu ri,ike ba ma le i mana ka kochu nza? Ro rika addu dho ke ripo:Mathu na a rana ro? 43 Yesu ngu logoti kpadho:Nzi ni nanga nu ni kana pa. 44 Ie ma nza ka ndi si madhi ngana,nza chocho ma na Baba dr ndi dr ro ndiri goti mabbu ga le ga nari ndidho ngo ve di sini nadyi. 45 Ri ndini nebi kpana i: Kpadho longa ddi ku ni Gindri djo cho.Furo chu ngba r lo Gindri djo nake ndiri goti le ddi dho longa nake si madhi ngana 46 Ie ma nja Gindri ro nza,ddichu Gindri kuso ro si nake dhe;riku fuke chu nja Gindri ri. 47 Bbubbu,bbubbu,ma ripo nidho ddikpa ke u ma ro fuke ba ku nunu di na shinga. 48 Ma ku shinga dhi mukati. 49 Ni bai nyo ngue mana ngodja na,ro kpa cheni kru. 50 Iri ku rana ro thu na mukati ndiro chu ri nyo nake nzike dhedhe ro. 51 Ma ku shi di na rana ro thu na mukati.Njati ddike nyo fu mukati ro,ke di ku nunu;ndirigoti ma si bbu kedho na mukati,ku ma ndi,chu ma bbu ku dz'djo ndru dhi shinga dho. 52 Furi ndima r ro,Wayaudi di guni ndima kana,i ndima ripo ro:Ke ka ka ndibbu ndiro nyo ko`nyo ngbachu dhe? 53 Yesu ngu logoti ki kpadho:Bbubbu,bbubbu,ma ripo nidho nyo ndru ddu ro nyo nza ro,nari goti ni ju keju nzaro,ni na shinga ro ku nga nga nga. 54 Ddikpake nyo ma ro nyo ndirigoti ndi ju ma ju ro fuke di nunu;ndirigoti ma si ke ga ga ngo ve di sini nadyi. 55 Dhonalo ma ro nyo ku nyo nganga,ndirigoti ma ro ju ku tho thonga ju dha dho na ritsi. 56 Ddikpake nyo ma ro nyo ndirigoti ndi ju ma ju ro fuke di mana,ndirigoti madi ke na. 57 Shi di na Baba cho e ma nari bbai,ndirigoti ma di shi ke lu,furi bbai ddikpake nyo ma ro nyo ro ke si di shi mana. 58 Iri ku rana ro thu na shinga dhi mukati.Ri nga ku ni bai kru ndima che ngue ni ro nyo ngue na cha mana bbai ri: Ddikpake nyo i mukati ro fuke di shi. 59 Yesu ngu fulo dra Synagogi na,lo ndingu ddi Kapernaumu na na ngana. 60 Bi ngue na ke una kpa,fulo ndima r nari goti,di ripo i: I lo ronga dyu che bbo;i lo ka ka ndi r ni ie dho? 61 Yesu dd'i ngue fulodho ndi una kpa nanga nunu nari utso ro,ke pori i:Fulo ka nithi bubu? 62 Ro njati ni nja ndru ddu dji ndi ngu ndi si ngue na ngana nari ro?.... 63 Riku bblohi chu ra longa tu ri;le ro nyo ro ku nga ritsi ri.Ma dra nidho nalo ku thi dhi lo ndirigoti shinga dhi lo. 64 Ro nikana ku nzi ri u na kpa.Dhonalo Yesu chu ngue ndi una kpa kana nzi ngu ri u na kpa ndirigoti bbu si ndi bbu nake mana kru. 65 Ke ndri i lo ki: Riku fulodho chu ma po e ri nidho ddikpale ma ka ndi si ma dhi ngana nza,nza Gindri bbu ndi tho mbi tso ro. 66 Fudyi nga djoro,ke una bi ngue na kpa nyi ngue nga ke una ro nyi,kpa ra ndima dho ddi chuna. 67 Yesu pori ndi una dre ndidjo aro ri na kpadho: Ndo ni chu ka addu bb'o,ni maddi ani ra fukpa bbai. 68 Simoni Petro ngu logoti kedho:Bboke ko ka ra ku ngbaga? Ni ku shinga dhi loba. 69 Ko u ri u ni ku Kristu Gindri dza tse tse nake. 70 Yesu ngu logoti kpadho:Ri ka ku nga machu vu e ni dre ndidjo aro ri na nari ri a? Ro ni kana ddikpake ku go nganga. 71 Fulo ke ngu po Yuda Iskariota djo,Simoni ddu: Dhonari ri ku kechu ka si ke bbu ri.