Ridza bbombi 5

1 Furi goti ngue,Wayaudi dhi nyo le nganyo na bbo ddo(fete),ndirigoti Yesu ka dji Yerusalema na. 2 Furo,Yerusalema na,choho chembu dhi kala chu tsoro,ngue ddikpa luluni na dda betesaida ndiro dho ngue Waebrania dha na ro,ndiri goti mbu ndi chu tso ngue ro. 3 Fu chu kpari tsena ddo ngue nari ku dhe na kuna ndru kpari ma,nga nyo ku na ndru kpari ma,tsuko tsu na ndru kpari ma,ddo ddoni na ndru kpari ma,dda ronga jani nari ndima bb'o ro. 4 Dhonari ddikpa malaika ngura thu kru saa ro dda bbu na,dda nanga jadha dho;furo nji tsu ddana bblo ddana nga jani ro na fule ngura go thechu,ngbari bbai ma ngue na dhe naro. 5 Fuga ngue ddikpa kpetsike dhena bblo ndi nji cho dre-drenga-gbo-ndidjo arro-ri na ro. 6 Yesu,nja ngue ke ddo ndi ddo ro,ngba ndichuri ke dhe nji bicha nari ro,ke ka ripo kedho:Nika ji ri ngba ni gogo? 7 Dhe dhi ke ngu ngue logoti: Pi,ma tsotso ko ndidjo ma ddana bblo dda na nga jani ro na le ro ku nga,ndirigoti,i ma ji ma ra ro,nja le a thu thechu maro nji ddana. 8 Adani,Yesu pori kedho,adzi nitse ra,nari goti abbi. 9 Fuga fuga thechu fuke go ngue;ke ka ndi tse ra dzi,bbidha na thechu. 10 Ri ngue ddikpa sabato ddodyi. Wayaudi di nga dhu fo ro dhe go e na ketso: Nju ku Sabato ddo;ri nza ka e ni dd'u ni tsena ra nju ri. 11 Ke ngu lo goti kpadho: Ma goe nake po eri madho i: Adz'ni tse ra,ndirigoti abbi. 12 Furo kpa dhuri ketso i: Fo pori ni ni i: Add'u nitse ra,ndirigoti abbi? 13 Ro fo ro dhe go e na ke nza chu ngue ie ma ri ku nari ri;dhonari Yesu tsu ngue nu fuga ndru kpari kana. 14 Furo ddikpacha,Yesu si fo ro dhe go e na kero Gindri dza dza na,furo ke pori kedho: Anjari,ni go go;nzi ni nji chenga ki vi ro,nzi afuri djolu ku na lo ba niki ro. 15 Furo fuke ra ndidho,pulu pulu ndi si ri dra Wayaudi dho ri e na Yesu go e ndi ri. 16 Riku fulo djotsina chu Wayaudi ngu Yesu ne hwidha dho ri,dhonari ke ngu fu ritsi kpari nji Sabato dyi. 17 Yesu ngu logoti kpadho: Madza Baba nji nji kpadjo ma ni dhe;ma maddi,manji nji nji. 18 Riku fulo dho chu,Wayaudi ngu Yesu gu ne dhe dho pli ri,nga Sabato ddo kpali ke ngu sa nari ri,pli si si ri kengu Gindri nzi Aba ndi,ndirigoti ke ngu ndi nga nga nzi Gindri. 19 Yesu po nja lo ki kpadho,i ndi ripo ro: Bbubbu,bbubbu,ma ripo nidho,ndru ddu nza ka ndinji ritsi ro ndi djo djo ri,ke kru ku na ritsi njidha nja Aba ndi nyona;ndirigoti kru Baba nji na ritsi,leddu ka ndi njiri hwe. 20 Dhonalo Baba ji leddu,nari goti ke ke ka ndi nji na ritsi dho kedho kru;furigoti kedho ku bbobbo ji na iri djolu si na bi ku na lo,ndiro chu ninga keni bblo dd'e 21 Dhonari,ddi ddi Baba dhedhe na ndru ga ndirigoti ndibbu o shinga ndrudho,furi bbai maddi leddu ka ndibbu shinga ngba uri na le dho. 22 Baba nzi ra lodd'i ndru djo ri,ro kengu lo dd'idha dhi jadha leddu dho, 23 Furo chu kru ndru ma leddu ddi ddi leba bbai.Nza ma leddu na le ma cho cho ke na Baba ma nzadi. 24 Bbubbu,bbubbu ma ripo nidho,ddikpake ri madza lo ro,ndirigoti ke u chocho e ma nake ro,fuke na ku shinga kedjo le lo ki dd'i nzi,ke da dhe naro shinga dhi ngana. 25 Bbubbu,bbubbu, ma ripo nidho dyi ro si ni,ri ma si bb'o ni fudyi dhedhe na ndru si Gindri ddu chu ri;ndirigoti fule chu ri na ndru si di shi 26 Dhonalo Baba ku shinga na ndi nganga na,nari bbai kebbu addu ndi maddi di shinga na ndi nga nga na fuchu. 27 Ndirigoti kebbu lo ledd'i na na kpakpa nga kedho,dhonari ke ku ndru ddu. 28 Nzi nibba fulo ke ni nga pa;dhonari dyi ro si ni nadyi na dd'udz na ndru si le chu ri,kpa si ngbeni dd'odz naro ngbe. 29 Bblo nji ngue ri na ndru si ngbeni shinga dho,ro che nji ngue ri na ndru lo dd'idha dho. 30 Ma nza ka manji ritsi ro ma maro ri:Riku r ma r na lo ro ro chu,ma lo dd'i ri;narigoti madza lo dd'idha ku cho,dhonari ma nzi maji na lo ne ri,ddichu chochoma nake ji nalo. 31 Ri e ma maro ma lo ngu madjo ri ro,ma djo ti ni na lo ku bbubbu. 32 Nja dd'ike ro ku ni ndi loti madjo ro,ro machu na lo ku iri ke ti madjo nalo ku cho ni. 33 Ni cho ngue Yoane,furo ke ti nari e bbubbu ku nalo. 34 Ro madho chu nza dd'ike dra e lo ri;ro ma ilo po,ndiro chu ni go go dd'e. 35 Yoane ngue roro na tala ndirigoti dyu dyu na tala,ndirigoti ni ji e ri ninji hwe ro se se kedza fu tala kudjo. 36 Ro ma,ma ku dra le dra na lo na Yoane djolu;dhonari Baba bbu manji na nji,funji nganga dhe manji nari,dho nari ku ma ku bbubbu cho Baba cho nake. 37 Chocho e ma na Baba dhe dra e cho lo madjo.Ni nza r e kechu ro ri,ni nza njae ke nyodjo nga ma ddi ri, 38 kedza lo ddi ku ni na nga,dhonari ni u cho ke cho e na ke nza. 39 Ni lo nanga ne ni ri dya fulo nga ni ne nari na ni ba ku nunu di na shinga:Ro ri ku fu lo nanga nedha kpari chu madza lo dho. 40 Ro ni ji ni si madhi ngana nza nja niba shinga dd'e! 41 Manzi ra madza kadha ko ndru dhoro ri. 42 Ro machu nari ku iri ni na ku Gindri dza jidha nga. 43 Ma si madza Baba ro dho na,furo ma ni ma ko nzidhe;njati ddikpake si ndi nga nga ro dho na ro,ni fuke ko ko. 44 Ri ka ku ngbachu dhe ni ka ni uri ri ni kalu ni nidhi kadha ne ro,nzi ningu Gindri ddiro dza kadha ro ma ne ro? 45 Nzi ni dyari riku machu ka ninga bbu Baba dho ri;ninga si bbu nake,ku Musa,ndidjo ni li e nidhi ngaddidha bbo ro. 46 Dhonari njati ni u e Musa ro,ni u e ma maddi,dhonari kechu ndi e nga madjo. 47 Ro njati ni u ke ndi e nalo nza ro,ka ngbari bbai ni ka ni u madza lo?