1 Furo ngue ddichukpa ke,ndiro dho ngue Nikodemu ro,Wayaudi djo bbo nga, 2 fuke,si ngue,Yesu dhi ngana,kuna,ro ke po ngueri : Rabbi,ko churi ngba ni ku Ginri kuso ro si na godhaba(docteur);dhonari ddichukpa le ma ka ndi nji ni nji na ii ddu,nga Ginri ku ndina ro nza ddi. 3 Yesu ka logoti ngu : Bbubbu,bbubbu ma ripo nidho,njati ddi le ki goni nza ro,ndidhi le nza ka ndi nja Ginri dza pi dhinga ri. 4 Nikodemu pori kedho:ddikpake ka ka ndi goni ngbachu dhe bl'o ndi goni ro? Ke ki ka ka ndingu ai ndi zna ndi ki ve goni dd'e? 5 Yesu ka logoti ngu:Bbubu,bbubbu ma ripo nidho,njati ddile goni nza dda na ma furigoti bblothi na ma ro,fu le nza ka ndi tsu Ginri dza pi dhingana ri. 6 Le ro nyo na le go na rits' ku le ro nyo,ndirigoti lethi na le go narits' ku le thi. 7 Nzi ni nanga keni mapo nidho na lo dho:Ri ka ngba ni ki goni. 8 Vuvu ra vu ndi ji na nga la djo,ndiri goti ni a ri bu chu r ni; ro ni nzi a ri si nanga chu ri,ro ri ra na nga ma nzi ddi.Bblo-Thi na goni na nru ku furi bbai chu. 9 Nikodemu pori kedho i : Fu rits ka ka ndi njini ngbari bbai? 10 Yesu ngu logoti kedho i: Ni ma chu niku Israeli dhi malimu ro,ka nichu fulo nza! 11 Bbubbu,bbubbu,ma ripo nidho,ko ngba kochu nari po,ndiri goti ko ngba ko nja na rits dho;ro ni ma nza ddi ko kodho nidho na bbubbu lo ri. 12 Njati ma dra dz'jo lo nidho ro ni uri ro nza,ndechu ni ka ka ri u ngbari bbai njati ma dra rana lo nidho ro? 13 Ddichukpake ro ma dji rana nzaddi,nga ndi ku rana ro thu nake ri ro,ndidhi fuke chu ku nru ddu rana ndiku ro. 14 Ddiddi Musa ngbe ngue su rona ngodjana,furi bbai chu ringani nru ddu ngbeni rona, 15 ndiro chu ngba uri na ndidhi le ka di nunu di na shinga na. 16 Dhonalo Ginri ji ngue dz bbo ro ke bbu ngue ddichukpa kuna addundi,ndiro ngba uri nake ka sani nzi,ro ndidhi le ka di nunu di na shinga na. 17 Ddidho,Ginri nza cho ngue leddu dz'djo lo d'idha dho ri,ro ndiro dz' ka go kechulu d'e. 18 Ngba u ke na ke dza lo nzi le d'hi ri;ro nza uke nake dza lo d'hini bblo,dhonalo ndike ngu ddichukpa Ginri ddu ro dho u nza ridho 19 Ro i lo d'idha ddiku,kadha si dz'jo ri,ndiro chu nru ji e ti ti nga kadha rnga na,dhonalo ndima dhi nji kpari ngue che nari dho. 20 Ddidho cheri nji na kru nru ndro kadha ndro,narigoti ndidhi nru ro nzi si kadha dhi ngana ri,nzi ndi ndima dhi nji kpari ka dhoni dd'e; 21 ro bbubbu lo nji nake ke si kadha dhi ngana si,ndiro ndidza nji ka dhoni dd'e,dhonalo funji kpari njie ni Ginri na. 22 Furigoti,Yesu,ndi una kpa mana ka ra Yudea dhi bbagu narigoti fuga kpa ka di,ddingana ddingana ndingu batiso bbu nari na. 23 Yoane maddi ngu batiso bbu Ainoni na,Salima kuso,dhonalo fuga ngue bbo ku na ddakpa;fugachu nru ngu si batiso badha dho. 24 Dhonari Yoana nza dd'e ngue tsu bedza na ri. 25 Ndechu nzi le rni lekana nari ka vu Yohana una kpakana ndidhi ddikpa Yaudi ke udha dza lodjo ndingu loti nari djots'na. 26 Kpa ra ngue Yohana dhi ngana,kpoa ka ripo: Rabi,nina ngue Yorodani dhi dda dzidzina nake,ndidhike dza lochu nidho e ngba,anjari ,ke batiso bbu,narigoti kru nru ra kedhi ngana. 27 Yohana ngu ngue logoti:Ddichukpa ke ma ka ndi ko rits ro nzi nza ndi si rana ro ro. 28 Ni niro tuni ngue madza lodho ro ma poeri : Ma nga ku Kristo ri,ma le choe kenji. 29 Tsedde is'le ku kpetske dza is'le;ndiro,kpetske dza luba chu ndikuro ndi a kechu r bbo hwe na : Furi ku madza bbubbu hwe. 30 Ri ka ngba ke dhidhi,narigoti ma thuthu. 31 Aro ro si nake si kru nru djolu;dz'dza ke ku dz'dza ke dhe,ro ke ti lo dz'djo nru bbai.Rana ro si nake si kru nru djolu, 32 kedho ngba ke nja na lo ma narigoti ngba ke r na na lo ma,ro ddichukpa le ma ko kedho fulo nzaddi. 33 Ngba ko kedho lodhodha na fuke dhori Ginri ku bbubbu ke. 34 Ddidho Ginri cho nake a Ginri dza lo dra,dhonalo Ginri nzi a bblothi bbu kedho ddidha na ri. 35 Le ba ji leddu ,ro kengu kru rits kedhona. 36 Ngba u leddu na le ku nunu di na shinga na;nza u leddu na le ka shinga nja nzi,ro Ginri dza tho ddi ku ledjo.