Kigajo 3

1 E beene witu! Mukati kiinyu, mutakiziba na'bigiriza bingi-bingi! Muyijagi kwo twe'bigiriza, twe tugabuzibwa bweneene mu ku twirwa ulubaaja. 2 Tweshi tuli mu hubaga ku njira nyingi nyingi. Kundu kwokwo, iri agaaba atungiini lwoshi! 3 Kiri ne'fwarasi, tuli mu zisimbahya mu kuta,bukaga ibyuma biniini mu binwanwa byazo. kwokwo, lyo tulonga ukurongoora amagala gaazo gooshi. 4 Na'mashuba kwakundi, kundu gali muba mahamu bwenene, ganabaagage galimutundwa ne'mbusi ngayu. haliko gali mu rongoorwa ku lupahwa luniini naaho. ganagendage ngiisi he'kirongoozi kilozizi. 5 Kwokwo, no'lulimi, kundu kiryzgzgi kirumbu kiniini kya'magala. haliko luli mu yihaya ku magambo mahamu. Mukengeere kwo kiri ne'hiriro hiniini hiri mu yiji boyola "namuhirye" wo'lubako. 6 No'lulimi nalwo, luli mu gulumiraga, gulu-gulu! Mu birumbu byoshi bya magala ululimi lwo luyijwiragi bwenene mwa'mabi. luli mu shereza umundu lwoshi. iri lunamuyasa mwo'muliro mukati ka byoshi. Na lwonyene, luli mu yasibwa no'muliro gwe'nakwerere. 7 Abandu bali mu komoola imilala yoshi ye'nyamiishwa, na yo'tunyuni, na ye ibiri mu yibulula, kiri na ya ibiri mu nyaja. 8 Si ululimi lwohe ndaye mundu uwanga lukomoola! lulyagagi lubi ngana! lunali ludaali-daali. lunayijwiri mwo kolobwe. 9 Tugweti tugakizi koleesa indimi ziitu mukuyivuga Daata nahamwitu. zinali zo tuli mudaaka mwa'bandu, kundu Rurema akababumba ku njusho yage. 10 Mukanwa kaguma, mwo'muli mu yoka amagambo go'kuyivuga, na go'kudaaka. Ebeene witu! Mwene yibyo, bitakwaniinagi kwo bibe ho! 11 Si ndakyo kirigo ikyangalyokaga mwa'miiji miija, mbu kinalyoke na mwa'malulu! 12 E beene witu! Bitangaziga kwe'kiti kyo'mutiini kyanga tongeka kwe'bitumbwe bye'mizehituni, no'muzabibu kwakundi, gutanga tongeka kwe'bitumbwe byo'mutiini, kiri ne'kirigo kya miiji go'muunyu, ki tangalyokaga mwa'miiji miija. 13 Mukati kiinyu, ka mulyagagi umwitegeereza, anali mu sobanukirwa? aahogo! akizi yerekana ubwitegeereze bwage. mu kukola mukati ko'butuudu, Ee! ubutuudu, bubaagage bwo bugayerekana ubwitegereze bwage! 14 Haliko, iri mitima yinyu yangaaba mwo'bululu, haaho mutakizi ki yihaya mbu memuli no'bwitegeereze! Mutanakizi kibeeshaga, mbu muli bandu bo'kuli. 15 Ubwitegeereze mwene yubwo, butalyosiri mwigulu. si bulyagagi imwa shetaani yenyene. 16 Mukuba, ngiisi ha'bandu bali muba no'lugi, banabe bali mu kubirania, haaho ho hali akalugi, na ngiisi gandi mabi. 17 Haliko, iri abandu bangaaba bali no'bwi tegeereze ukulyoka mwi'gulu, boohe, bali muba beeru, banali bandu bo'mutuula, banali mu nogerana no'kusimbahana, banayijwiri mwo'lukogo ne'bitumbwe biija, Batali mu giraga indoola, batanali mwo'bulyalya. 18 Abandu bo'mutuula, ngiisi byo bali mu byalaga, bali mu yiji biyimbula mwo ibikwanini imbere lya Rurema.