Kigajo 3

1 Niehe Pahulu, ngoli shwesiriwi mu nyumba ye'mbohe higulu lya Yesu kirisito, gira lyo ndonga ukumutabaala, mwe mutali Bayahudi. 2 Ku kasiisa, keera mukayuvwa ngiisi kwo Rurema akanzikiiriza guno mukolwa ku lukogo lwage, halinde ndonge ukumutabaala. 3 Mukuba, îbyâli bishamiragi, Rurema keera akabimbishuulira, nga kwo keera nga'muyandikira ku bwofi mu galya gandi maruba. 4 Ne'ri mwangashubi gasoma, lyo mugamenya bwija ngiisi kwo ngoli sobanukirwi ne'bya Kirisito, kundu byali bishamiri. 5 Yako kambishwa higulu lya Kirisito, yaho keera Rurema atâli zaazi kabishuulira abandu. Haliko buno, keera abimenyeesagya indumwa zaage ndaluule, kuguma na'baleevi baage, ku njira yo'Mutima Mweru. 6 Na îbyâli bishamiragi, byo byebi: kwo abatali Bayahudi nabo bagalonga kuguma na'Bayahudi ku biri mu myazi miija, kwokwo, lyo nabo baba mu magala ga Kirisito, banabe bakola mulonga ku ngiisi byo Rurema akagwanwa alagania abandu mukati ka yesu Kirisito. 7 Iyo Myazi Miija, Rurema akambiika kwo mbe mukozi wayo, anagashanira ku lukogo lwage, ukukulikirana no'bushobozi bwage bwingi. 8 Kundu nie toohiragi mu bandu baage booshi, haliko ku lukogo lwage anambiika kwo ngizi menyeesa abatali Bayahudi imyazi Miija higulu lya kirisito, inali mwo'bugale bwa'kahebuuza! 9 Rurema, ye kabumba ibindu byoshi. Kundu kwokwo, ngiisi byo akashungika, byâli yamiri bibisirwi. Halikago yako kambishwa kaage, anambeereza umukolwa, gwo'kumenyeesa abandu ku bweranyange ngiisi kwo agakoleesa. 10 Kwokwo buno, ashungisiri kwo agakoleesa ishengero, halinde lya'batwali ba mu kyanyanya, kiri na'banabushobozi baamwo, bamenye bwija ngiisi kwo ali mu koleesa ubwitegereze bwage ku njira za kwingi-kwingi. 11 Yibyo byoshi, kwokwo kwo Rurema âli mali gwanwa abishungika ukulyokera, Na buno keera abikoleesa mukati ka nahamwitu Yesu Kirisito, 12 Na bwo tukoli yemiiri Kirisito, tukola no'bulyo bwo'kuyegeera Rurema ku bakaruuke, iri tunakania imitima. 13 Kundu ngweti ngalibuukaga higulu liinyu, namuyinginga kwo mutavunike imitima. Mukuba, yaga malibu gaani, go gali mu muleetera ubulangashane. 14 Ngweti ngafukama imbere lya Daata. 15 Mukuba, ye shyoko ye'milala yoshi iri mwi'gulu, na iri hano mu kihugo. 16 Ngweti ngamuhuuna kwo akizi musikamya mu mitima yinyu ku bushobozi bwage bwa'kahebuuza ku njira yo'Mutima gwage. 17 Kirisito akizi tuula mu mitima yinyu, iri munakizi mulangaalira. na kwakundi, ngweti ngahuuna Rurema kwo akizi musikamya mu rukundo lwage. 18 Mwehe, kuguma na'bandi bandu baage booshi, mushobole ukumenya ngiisi kwo'rukundo lwa Kirisito luli luhamu bweneene: mu butambi-tambi, na mu bula-bula, na mu kugenda higulu, na mu kuyika haashi. 20 Rurema, ikyanya ali mu koleesagya ubushobozi bwage mukati kiitu, ashobwiri ukugira ibye ngingwe bweneene ukuhima byo twangamuhuuna! Anganagira, kiri na abatali mu mitono yitu. 21 Kwokwo, abandu be'bibusi byoshi bakizi yamaga bagweti bagamuhuuza mwi'shengero, mukati ka Yesu kirisito. Bikizi ba kwokwo, halinde imyaka ne'myakuula!