1 Ngoli shwesiriwi mu nyumba ye'mbohe higulu lya nahano. Na bwo ngola mushweke, namuyinginga kwo mutuulage ku njira yo mukahamagalirwa! 2 Mukizi nogerana mukati ko'butuudu bwoshi, munakizi yigendererana, iri munakizi gooyerana mukati ko'rukundo. 3 Mukizi gira umwete mu buguma mukati ko'mutuula. 4 Galyagagi amagala maguma, no'mutima mweru, guli muguma. hali no'mulangaliro muguma naho, gunali gwo'Rurema akamuhamagalira kwo. 5 Nahamwitu naye, ali muguma, no'bwemeere, buli buguma, no'bushukule nabwo, buli buguma. 6 Rurema yenyene alyagagi muguma, ye na yishe wa'bandu booshi. ye nali mukati ka booshi. 7 Kundu kwokwo, Kirisito akagashaanira ngiisi muguma witu, mu kumuheereza ikyage kyage kigabi. 8 Kyo kitumiri biyandisirwi mu mandiko meeru kwokuno "Ikyanya akazamuukiraga mwi'gulu, anatwala abandu bo akagwata imbira, abali heereza abandu ibigabi". 9 Yukwo kuzamuukira mwi'gulu, kuli kudetaga kuti? kuli kudetaga kwo Kirisito akatee gwanwa amanukira hano mukihugo, halinde anahika ikuzimu? 10 Uyo'ukatee manukira mu kihugo, ye kashubi zamuukira mwi'gulu, anahika ahali higulu lya byoshi, halinde analongaga ukukwira hooshi. 11 Yeyo Kirisito, ye kagabulira abandu ibigabi baguma wibagage ndumwa, na'bandi kwo bakiwi menyeesa abandu imyazi miija na'bandi, kwo babe bangere ba mashengero, na'bandi kwo bigiriza, 12 Rurema akagira kwokwo lyo alonga ukutegaanura abandu baage, balonge ukukizi mukolera bwija, de amagala ga kirisito gayubakwe, 13 Kwokwo, lyo tweshi tugaaba tukola no'buguma mu kuyemeera umwana wa Rurema na mukumumenya ne'nooka lyo tuganaaba tukoli kaniri mukati kaage, tunabe tutungiini lwoshi, nga kwo kirisito naye atungiini. 14 Abalyalya, bali mugendaga bagatebeereza abandu, mu kubalyeryega kugandi-gandi migirizo gaabo, tutaleke kwo gakizi tuhabura, tutakizi kiba nga'baana baanuke, bwobalimuba, nga midunda iri mukizi birindulwa ne'mbuusi, 15 Haliko twehe, tukizi detaga ibyokuli mukati ko'rukundo; halinde tube tukoli kaniri mu kirisito. Mukuba, yehe ye itwe liitu. 16 Ye natumiri amagala gooshi gali mubiikwa kuguma, mu kunanikwa na ngiisi luningo lwago. Na bwo ngiisi kirumbu kiriri mu kolaga, kyokitumiri amagala gooshi gali mukula, iri ganayiyubaka mukati ko'rukundo. 17 Kwokwo, namukomeereza mukati ka nahano, kwo mutakizi ki tulaanga nga'bandu be'kihugo! si boohe, inzaliro zaabo ziryagagi za busha-busha. 18 Na'menge gaabo, gayidisiri mwe'kihulu. Batakiri bagumaana mukati ka Rurema. Si keera bakayumuusa i'mitima yabo. Banakola bahwija. 19 Batakiri muyuvwa ishoni, kyo kitumiri bali mu yidulumbika mu bushule, na mungiisi bikoleere. Bayamiri bali no'lulehe-rehe lwo'kugira ngiisi gandi mabi. 20 Si mwehe, ngiisi byo mukayiga mukati ka kirisito, bitali byebyo! 21 Mukuba ikyanya mukayuvwa higulu, mwanayigirizibwa ibyokuli. 22 Yaho kare, mwalikizi sherebera mu kutebwa na'mifwije giinyu. Haliko buno, keera mukayigirizibwa kwo mutwikirage ku ngesho ziinyu za keera. 23 Mukizi tona imitono mihyahya mu'mutima. 24 Munabe biremwa bihyahya mukati ka Rurema, halinde mube bandu baage bataluule. munabe mugweti mugaagira ngiisi ibikwanini mukati ko'kuli. 25 Kwokwo, mutwikirage ku bibeesha! ngisi muguma winyu akizi bwira uwabo ibyokuli. Mukuba, tweshi tukolaga birumbu bya magala maguma. 26 Iri mwangayuvwa ubute, mutakizi leka mbu bimuyingize mu byaha, mutanakizi soosa izuuba mukirakiiri! 27 Mutakizi heereza shetaani ubulyo bwo'kumukola mwo! 28 Iri umundu angaabaga akiriri muzimba, atwikire ku buzimba bwage, anakizi gira imikolwa ikwanini na'maboko gaage, halinde lyo akalonge ibindu byo agakizi tabaala mwo a'bagoozirwi. 29 Mutanakizi kideta amagambo agatali ngago, si mukizi deta naaho amagambo miija. a'gangakizi tabaala abandi ku'magoorwa gaabo. kwokwo, ikyanya abandu bagamuyuvwiriza, bakalonge ukukana mu mitima yabo. 30 Mutanakizi ki jengeesa umutima mweru gwa Rurema. Mukuba, gwohe yo ngwati yo'kuyerekana kwo mwaye ki guluulwe ku lusiku lwe'mberuuka, 31 Mutakizi ki jinikirana, mutanakizi ki raakarirana, hatagirage ugakizi yigurumura, kandi iri kudukana, mutanakizi girirana buligo. 32 Si mwehe, mukizi girirana amiija, iri munayuvwirana indengeerwa. Mukizi kogana nga kwo Rurema naye keera akamukoga mukati ka kirisito.