Imatiu 9

1 Ijesu ọ ngwụni ẹpa jinẹ nọ irẹkụra aani. 2 Ree, da si osuẹngwụ ọnyi tụni upoto ve tu o. O me re ọdọwụ aanini, di Ijesu kaa yi osuẹngwụ ọnọ ka, "Ẹwụ ozi, ngwareyi sha. A si aichama awụ vayawụ da." 3 Di oyofi ẹnyi aa kaa inakaakana ẹngwụ aanini ka, "Ọnọrụ ọnọni aa ka isaanyisi." 4 Ijesu ọ yẹ isẹnee ro, dọ ka, "Sẹnẹvẹ du wee ro isọshimi ini ọtụtụrụma awụ nini? 5 Yere ana rẹngwụ fu ka ka, 'A si aichama awụ vayawụ,' navẹki, 'Kwẹẹtẹ dụ waa zụsẹ?' 6 Ama dụ wa zụ yẹ nin ki Ozi Ọza ọ nyi ụmọ ọsisi aichama ọza vayaani ini ẹshẹ, dọ kaa yi osuẹngwụ ọnọ ka, "Kwẹẹtẹ, si upoto awụ, dụ wa neeshi awụ." 7 Di ọnọru ọnọ kwẹẹtẹ, dọ neeshi aani. 8 Ụmoni azọkọni ẹnẹ re isa ọnọ, o shuweeyi, dẹ sụga yi Oshomoshi ana si ẹngwụ ụmọ ọnọni yi aza. 9 Ijesu mẹ fiizọ, dọọ na, do re ọnọrụ ọnyi anaa shi Imatiu, ana yatụ tụni ajẹngwụ izẹni a yaa dọ imaana. Dọ kaa yọ ka, "vatụra mi." Dọ kwẹẹtẹ, dọ vatụra a. 10 Ijesu mẹ yatụ ọnọ vaa ri ineeshi, re, di ọdimaana ẹrụrụ ọnri anaichama nini bẹrẹ Ijesu ọnri eziafụ aani aa risa. 11 Ụmọni Ifarisi nini re e, dẹ kaa yi eziafụ aani ka. "Sẹnẹvẹ di ọzụọzisa awụ nini ọnri ọdimaana nini shi anaichama nin gaa risari kẹ?" 12 Ijesu mẹ wụ, dọ ka, "Aza ẹni ẹngwụ razi zi, e mee si ọmọzikụ, ẹnẹni ẹngwụ aa zị renya enee si ọmọzikụ. 13 Na kọsụẹ isẹnẹ vi afụ irẹyi ọnọni, 'Ayụva ọni mee si, aivi isẹvọ.' Aivi ẹnẹnaa mẹ ana sẹrẹ ọnim vẹ vaa shi ki e rinẹ varama, ama anaichama nini." 14 Ụmavọ di eziafụ Ijọọnụ ve tuo, dẹ ka, "Sẹnẹvẹ di ẹyi ọnri Ifarisi nini aa bawẹ ẹfi bo, ama eziafụ awụ ẹ ma bawẹ?" 15 Di Ijesu fọ wa ka, “Aza ọmụsha anaa nyi ọnẹẹ wa va zụ nyi inoodu ụmọni ọmụsha ọnọ yi yizọ pe wa? Ama, ẹfi aa vẹ ana va sii si ọmụsha anaa nyi ọnẹẹ fiini akaakana aanini, ụmavọ dẹẹ vaa bawẹ. 16 Ọzi nyi ọza ana vaa si ita ọwọọwa, dọọ gẹ za auru ọkụkụ, aa vọvọ mẹ, ita ọwọọwa ọnọ vana vaa naa finaani, dọọ vi ki ụmavọ ọnọ va kụ si na fu. 17 Navẹki daa va eche ọwọọwa shini ampo ụpa eche ọkụkụ, aa vọvọ mẹ, ampo eche ọkụkụ ọnọ vana vaa na, di eche ọnọ vasha, di ampo ụpa ọnọ nyẹmbẹ si du, ama ampo ụpa ọwọọwa, anaa va eche ọwọọwa shi, dọọ ma nyi ene du." 18 Ijesu maa ki karẹyi ẹnẹni yụ wa, di ọdọvidi Iju nini ọnya vẹ, do nyima irẹsu yọ, dọ ka, "Ozi ami ọnyẹnẹẹ vana shẹshẹ su, ama vẹ wa va sụvọ awụ tụra, kọ vaa sha kwẹẹtẹ." 19 Di Ijesu ọnri eziafụ aani kwẹẹtẹ, dẹ vatụra a. 20 Re, ọnyẹnẹ ọnyi ana si irayi ẹwụrẹ̵va ee re isụfẹ, ọ vẹ inaama Ijesu, dọ si ụvọ kani ụtọ auru aani. 21 Fụvọki ọ kaa yi ẹngwụ aani ka, "Aaviki ma zụ si ụvọ kani auru aani, mvaa dashi" 22 Ama, dọ vareyi, do re e, dọ ka, "Ẹwụ ozi ọnyẹnẹ, nyi ọtụtụrụma; ọdọwụ awụ ̣ọ mẹ wụ dashi da." Di ẹngwụ ọnyẹnẹẹ ọnọ ni ini iwakati ọnọ. 23 Ụmọni Ijesu ngwụ ireshi ọdọvidi Iju ọnọ, do re ofu-ofeere nini ọnri azọkọni anaa sụọkụ nyamaa. 24 Dọ ka, "Wa na, ozi ọnyẹnẹẹ ọnọ ozi su, ara ọnọọ sụ." Ama de nyi o unyi isiya. 25 A mẹ dụ azọkọni ẹnẹ tụẹshẹ da, dọ ngwụni irẹngwụ, dọ si ụvọ za a ụvọ, di ozi ọnọ kwẹẹtẹ. 26 Di irẹyi ọnọni garashi ini ọkakooro ọnọ. 27 Ijesu mẹ fiizọ, di oguri ẹẹva vatụra a, dee nowu ka, "Nyi ayụva yi yi, ẹwụ Ozi Idevidi!" 28 Ụmọni Ijesu ngwụ ireshi vẹ da, di oguri ẹnẹ ve tu o. Di Ijesu fọ wa ka, "Ụ wa dọwụ ka mva zụụ mẹ ọnọni? "Dẹ voshi ka, "Ẹn, Ananyiyi." 29 Di Ijesu si ụvọ kani wa irii, dọ ka, "Ọ vọvọ ya yụ wụ nin venebiri ọdọwụ awụ nini," 30 di irii aanini sha. Di Ijesu tụra wa ụtọ ka asẹ navọ ki ọzọnyọnyi ọ wụ irẹyi ọnọni." 31 Ama, di azẹnẹva ẹnẹ, na gara irẹyiọnọ shi ini ọkakooro ọnọ bo. 32 Azẹnẹẹva ẹnẹ maa na, da si evuvu ọnya, ọni ifẹ azeeshi yini ẹngwụ aani ve tu Ijesu. 33 A mẹ dụ ifẹ azeeshi ọnọ fiini ẹngwụ aani da, di ọnọrụ evuvu ọnọ karẹyi. O shi azọkọni ẹnẹ eyi, dẹ ka, "Azezi meen rire ẹngwụ isa ọnọni ini Isrẹni yẹẹyẹ!" 34 Ama, di Ifarisi nin aa kaa ki, "Ụkata oshirẹsụ azeeshi ọnọ si dụ wa jinẹ." 35 Ijesu ̣ọ ngwụ irẹkụra ẹnẹ bo, shi oweyi, shi ọbani. Dọọ zụ wa ini Isinagọgụ aanini, dọọ karenube ọiza ọi ijọva ineeku, dọ fụ aza ikụ ọnri ẹngwụọzi renyi renyi sha. 36 O me re azọkọni ẹnẹ, dọ nyi ayụva yụ wa fụvọki ẹẹ nyi ọkatẹngwụ, do ku du ẹnbo eyi. Dẹ kụ si mẹ atẹmẹ ana razi nyi ọkụatẹmẹ ri. 37 Dọ kaa yi eziafụ aani ka, "Isa rarẹ ana vi ẹ nyiọya, ama ọnụkọrọ irarẹ che ọnọ yinaani. 38 Fụvavọ, jantụ tụozurenu shi Ananyiyi ana nyi isa irarẹ, ka, ọ tụ ọnụkọrọ nini ngwụ inaarẹ."