Imatiu 8

1 Ụmọni Ijesu chi fini irẹsụfa vẹ da, di azọkọni vatụra a. 2 Re, ọnikụ ọbani ọnya me ve tu o, do kuẹtẹ inọvidi aani, dọ ka: "Ananyiyi, aaviki wee si, ụ va zuụ̣ mẹ ki ma ni." 3 Di ijesu tanụvọ kani ọ, dọ ka, "Mee si, ẹngwụ awụ ọ nii." Ụmụmọ di ikụ ọbani aani ta. 4 Di Ijesu kaa yọ ka, "Re ki wa zi ka yi ọzọnyọnyi. Waa na, na si ẹngwụ zụ arụfa, dụ wa na mẹ isa ọni Imosisi si shiẹtẹ ka mẹ, doti ọ vi iveenu yụ wa ki ẹngwụ awụ ọ nii." 5 Ụmọni Ijesu ngwụ Ikapanọmụ, di oshirẹsụ ashoja ani Iromu ve tu o, dọ ka, 6 "Ananyiyi, ozida ami osụafụ sụavọ, doo rụmanya ineeshi." 7 Di Ijesu kaa yọ ka, "Maa vẹ di ma va fụọ ikụ sha." 8 Di oshirẹsụ ashoja ọnọ tụoshi, dọ ka, "Ananyiyi ma zi fụ ọza ọnụ va zụụ ngwụ ireshi aani, vọọ si irenu kaa kẹnẹ ki ẹngwụ ozida ami ọ nii. 9 Ẹmi nyẹmbẹ vana yini afụ ọnụmọ, dim zẹ nyi ashoja nin ana yini afụ ami. Maa kaa yi ọnọni ka, 'Na,' dọọ na. Maa kaa yi ọsa ka, 'Vẹ,' dọọ vẹ, ọnri ka, maa kaa yi ozida ami ka, 'Mẹ ọnọni', dọọ mẹ ẹ." 10 Ijesu mẹ wụ irẹyi aani, do shieeyi, dọ va kaa yi ẹnẹna vatụra a ka, "Ini irẹiza, maa kaa yụ wụ nin, mei rire ọza ana nyi ẹngwụ ọdọwụ ọnọni ini ẹtẹ Isrẹni." 11 Ma kaa yụ wụ, aza vaa vẹ fụrẹ aka izi ọyi jinẹ fụrẹ, ọnri izi ọyi yaa ngwụẹtẹ, dẹ yatụ pe Abrahamụ, Aiziki ọnri Ijakọbụ ini ijọva Oshomoshi, dẹẹ gaa ri isari. 12 "Ama, ẹnẹna vi ezi ijọva ẹshẹ ọnọni vene vee ne ngwụni oozi ẹshẹẹshẹ, ẹnẹ va yaa jiorere, dẹ zaa kụranyi." 13 Di Ijesu ka yi oshirẹsụ ashoja ọnọ ka, "Waa na, ọ si ya yụ wụ vene ụmẹ nyi ọdọwụ." Di ẹngwụ ozida ọnọ nii ịni ẹfi ọnọ gẹdẹgẹdẹ. 14 Ụmọni Ijesu ngwụ ireshi Ipita, do re ọnyi ose Ipita mẹ sụ tẹtẹ, di iiva aa mẹ ẹ. 15 Di Ijesu va sụvọ kani ọ ụvọ, di iiva ọnọ fiini ẹngwụ aani. Inaani, dọ kwẹẹtẹ, doo su wa ọzọga. 16 Ome tu orụva, da kụ azẹrụrụ ana nyi ifẹ azeeshi ve tu o. Ọọ si irẹyi aani dụ ifẹ azeeshi ẹnẹ jinẹ, dọ zẹ fụ wa ikụ bo sha. 17 Inoze ọnọni, da si irẹyi ana zirẹngwụ Aisaya ọkisẹ ka sẹ, ka: Ọni ụvọta ọ si ẹngwụ aani dọ ikụ ayi ọnri ẹngwụọzi ayi renyi renyi. 18 Ijesu me re azọkọni ana varakara a, dọ kaa yụ wa ki ẹnẹ fiizọ, doti ẹnẹ nọ akajinẹ irefu Iganini. 19 Ụmavọ di oyofi ọnya ve tu o, dọ ka, "Ọzụọzisa, mva vaatụra wụ irasha tụrirasha ọnụ raa nọ. 20 Di Ijesu kaa yọ ka "Irada ẹ nyi ụsi aanini, avọ ọni unomi nini mẹ zẹ nyi irẹngwẹ, ama Ozi Ọza ọzi nyi irasha ọnọ va si irẹsụụ tụ. 21 Di oziafụ aani ọsa ọ kaa yọ ka, "Ananyiyi, daka yi mi oze, di me ne ne oku ada ami da." 22 Ama, di Ijesu ka, "Vatụra mi, dụ wa navọ di ẹnẹne fu su ee ne oku aanini." 23 Ijesu mẹ ngwụ ẹpa, di eziafụ aani vatura a ngwụ ọ. 24 Ashi ọbani ọ kwẹẹtẹ inẹẹsụ irefụ, netu ka, enyi aa daa ku ẹpa. Ama di Ijesu aa sụara. 25 Di eziafụ aani ve tu o, dẹ sha a, dẹ ka, "Dọ yi tụ Ananyiyi, Yee vee vurii o." 26 Di Ijesu ọ kaa yụ wa ka, "Sẹnẹvẹ du wee shiangwa nin? Ọdọwụ awụ nin o weyi o!" Dọ va kwẹẹtẹ, dọ tụ ashi ọnri irefu ofụvọ, da ashi za dinẹ keri. 27 Do shi azẹnẹ eyi, dẹ ka, "Yere ẹngwụ ọza, ọni ọnọnị vi kẹ, ọni ashi ọnri irefu ọnọ wụ irẹyi tụrenụ? 28 Ẹfi ọni Ijesu vẹ aka ọfụva irẹkụra Igadareni, di anẹrụ ẹẹva ana nyi ifẹ azeeshi ve tu o. Ini irikuta ẹnẹ fụrẹ vẹ, bẹri ọikụ ọshimi; ọzi nyi ẹzẹna va zai naa zi oze izọ parafụ. 29 De nowu zẹtẹ, dẹ ka, "Sẹnẹ kụ ẹyi rẹwụ gẹ kẹ, ẹwụ Ozi Oshomoshi? Ụ wa vẹ izọni kụ wa va mụya riyi, di ẹfi ayi ọ tangwa ve tu?" 30 Ụmavọ, ọ nyi ụra ẹrụrụ ẹnyi anaa tẹẹtẹri, ini ọgụrẹ wa. 31 Di ifẹ azeeshi ẹnẹ dipẹ yi Ijesu ka, "Waa dụ yi jinẹ, navọ di ya ngwụni ẹngwụ ụra ẹnẹni." 32 Di Ijesu kaa yụ wa ka, "Waa na nin!" Ẹ mẹ jinẹ vẹ, dẹ ngwụninẹ ụra ẹnẹ, di ụra ẹnẹ bụdụ chi fiini irẹsụfa ọnọ na ngwụni irefu, de vurii shi inenyi. 33 Di ẹ̵nẹnaa pa ụra ẹnẹ zue fiizọ, nangwụ ini irẹkụra, dẹ na ka isa bo ana mẹ, inọpati ẹnẹna nyi ifẹ azeeshi. 34 Di anrẹkụra ẹnẹ bo jinẹ vẹ ve tu Ijesu. Ụmọni e re e, dẹ dipẹ yọ ka ọ jinẹ fiini ọkakooro ọnọ.