Imatiu 7

1 Asụụ me ishọji yi aza, doti asa mẹ ishọji yi awụ. 2 Fụvọki ishọọji ọnụ ra mẹ yi aza, ana vaa mẹ yụ wụ; ọnya-ụmọ ọnụ ra si mọ isa yi ọza, ana vaa si mọ yụ wụ. 3 Sẹnẹvẹ du wee re ẹchichi ana yini iri ọzọfụụva awụ, ama du rezi re ọchi ọvọvọrọ ana yini iri awụ? 4 Ụmẹ va zụ kaa yi ọzọfụụva awụ ka, "Navọ ma si ẹchichi ana yini iri awụ kụra, inaama ọni ọchi ọvọvọrọ yini iri awụ?" 5 Ẹwụ nin ọfatụvaku! Bidi si ọchi ọvọvọrọ ana yini iri awụ da, ụmọnọ du retẹ ẹtẹrẹ, dụ wa zụ si ẹchichi ana yini iri ọzọfụụva awụ kụra. 6 Asụụ si isa ana vi ọnini yi irezi nini; asụụ zẹ si si ireweyi tẹtẹ tụ inọvidi ụra nini. Ọọzivavọ, ẹ vaa kụafụshi o parafu, dẹ va vareyi, dẹẹ na wụ va sha. 7 Fisue, a vaa si ọ yụ wụ nini. Sii, ụ vee re e. Fuoze, a vaa na a yụ wụ. 8 Fụvọki ọzatụrọza ene re fisue, o ve re e dọ; ono re si sii, o ve re e; ọza ene re fuoze, a vaa na a yọ. 9 Yere ọza ọnya ini awụ nini, ọni ozi aani vee fisue ivụrẹdi, dọọ si irẹta yọ kẹ? 10 Navẹki oo fisue isenyi, dọọ si isẹchichi yọ kẹ? 11 Fụvavọ, aaviki ẹwụ nin azẹshimi ọ yẹ a mẹ mẹmẹ si isa ozoza yi ezi awụ nin, ụmẹ si ve ro ki Ada awụ nini ana yi ineeku ọ zaa si isa ozoza yi aza ene re fisue finụvọ aani? 12 Fụvavọ, isatụrisa ọnụ re si ki aza ẹ mẹ ka wụ vẹ, ọnuụ̣ ra mẹ ka wa na, fụvọki ọnọni ọnọ vi ofi ọnri irẹyi ọkisẹ nin. 13 Zi oze wẹẹrẹ ngwụ ireshi nini, fụvọki ọchọfọ ọnri oze ana nangwụ izọni aza yee vurii, vana gana. Aza anaa zi oze ọnọ vana rụrụ. 14 Ama, ọchọfọ ana nyi wẹẹrẹ, dọ fana, ọna ngwụni ẹshẹ poro pooro, aza chee kẹnẹ enee re e. 15 Si eyi pe ẹngwụ awụ nini fụvọ ọkisẹ anapẹ nini, ana si ụpa atẹmẹ kụẹngwụ, ama ọdụmi oduvi ẹnẹvi ininẹ. 16 Ụ vaa yẹ wa zirẹngwụ ẹtụtụ aanini. Ọza wa va zụ fa osinkara finẹsụ agagana, navẹki a fa ezụ finẹẹsụ ọchi ikeyi? 17 Ọchi ozoza vanaa tu ẹtụtụ ozoza, di ọchi ọshimi tu ẹtụtụ ọshimi. 18 Ọchi ozoza ọi zụa tu ẹtụtụ ọshimi, navẹki ọchi ọshimi ọ tụ ẹtụtụ ozoza. 19 Ọchi bo ana ra zi tu ẹtụtụ ozoza, vana vaa da nyẹtẹ, dẹ nee ngwụ ini ira. 20 Fụvọki zirẹngwụ ẹtụtụ aanini, ọnụ va si yẹ wa. 21 Aivi aza bo ana shi mi Ananyiyi, Ananyiyi ọnọ vaa ngwụ ini ijọva ineekụ ọiza, ọọzivi ẹnẹ naa mẹ osisi Ada ami ana yi ineeku renya. 22 Aza ẹrụrụ va kaa ini ọkụshi ọnọ ka, 'Ananyiyi, Ananyiyi, ii wa ra zi kisẹ ini irẹsha awụ, ọnri ka ini irẹsha awụ ya dụ azeeshi nini jinẹ, di zẹ mi mụkọrọ oshishozeyi renyi renyi ini irẹsha awụ?' 23 Ụmọnọ, mvaa kaa yụ wa ini orere, ka 'Maa zi yẹ wụ vụvụrụ! Fụrẹ meyi nini, ẹwụ ọnụkọrọ ọshimi nini!' 24 Fụvavọ, aza bo ana ra wụ irẹyi ami, dọ vatụra a, vana vene ọnụvira ana dareshi aani tụni irẹsụ irẹta. 25 Orishi mẹ zụ, di ọshaara enyi vẹ, ashi mẹ kụ, do tu ireshi ọnọ, ozi wu o, fụvọki a da a tụni irẹsụ rẹta. 26 Ama, ọzatụrọza ana ra wụ irẹyi ami, dọ razi vatụra a, vana vene ọnụra ana dareshi aani tụni irẹsụ ẹyẹrẹ. 27 Orishi mẹ zụ, di ọshaara enyi vẹ, di ashi kụ, do tu ireshi ọnọ, do wu o. Owiwu aani vana rata. 28 Ụmọni Ijesu karẹyi ẹnẹni ta da, isa bo ọnọ zụ wa dọ vi oshishozeyi yi azọkọni ẹnẹ. 29 Fụvọki ọ zụ wa vene ọza ana nyi ụmọ, o zi vene ọyofi nini.