Imatiu 6

1 Si eyi pẹngwụ awụ nini, doti asọ vi ki waa mẹ ụkọrọ ọiza inọvidi aza, fụvọ de zu re wu nini. Aaviki avọ yọ, we zee re ọgụ dọ fiini ụvọ Adawụ ana yi ineeku. 2 Fụvavọ, aaviki waa mọiza, asuu showu ẹngwụ awụ vene ọfatụvakụ nini mẹẹ mẹ ini Isinagọgụ, ọnri ini orere, doti aza ẹzụ ga wa. Irẹiza ma kaa yụ wụ nini ka, ẹ dọ ọgụ aanini da. 3 Ama, aaviki waa mọiza, asụụ navọ ki ụvọọfa awụ ọọ yẹ isa ọni ụvọọri awụ aa mẹ. 4 Doti ọiza ọnụ waa mẹ ọ vi ini angwụmi. Ada awụ enee re wu ini angwụmi, vaa si ọgụ aani yụ wụ. 5 Aaviki waa tụozurenu, asụụ mẹ vene ọfatụvakụ nini. Fụvọki ee si ki ẹnẹ dinẹ tụozurenu ini Isinagọgụ ọnri ini orere doti aza e zu re wa. Irẹiza maa kaa yụ wụ nini, ka, ẹẹ dọ ọgụ aanini da. 6 Ama, aaviki waa tụozurenu, ngwụ irẹngwụ awụ na, guoze awụ, dụ wa tụozurenu shi Ada awụ ana yini angwu. Ada awụ enee retẹ ini angwụmi vee si ọgụ aani yụ wụ. 7 Aaviki waa tụozurenu, asụụ vatụra irẹyi kẹnẹ kẹnẹ nini, vene Ijẹntaini nin mẹẹ mẹ, fụvọki ee ro ki a vaa wụ ozurenu awụọnini fụvọ irẹyi ọrụrụ. 8 Fụvavo, asụụ fama wa, fụvọki Ada awụ nin ọ yẹ isẹni ọvọrọ kụ wa nyi, dụ va tangwa ve fisue nini. 9 Fụvavọ, wa maa ni tụozụrenụ nini: Ada ayi ana yi ineeku, ya da yi irẹsha awụ. 10 Navọ di ijọva awụ ọ vẹ. Di ya mẹ osisi awụ inẹshẹ venebiri ọ mẹ ya ineeku. 11 Si isari irajini yi yi. 12 Si aichamai ayi vaya ayi venebiri imẹ si aichama azẹnẹsa vaya aanini. 13 Asụụ za yi nangwụ ini amore, ama dọitụ fini ụvọ aza ẹshimi. Fụvọki ijọva vi ayi awụ, ụkata vi ayi awụ, ụga vi ayi awụ, poro pooro. Aami. 14 Fụvọki aaviki wa si aichama aza vaya aanini, di Ada awụ ana yi ineeku, ọn zẹ si aichama awụ vaya wụ. 15 Ama, aaviki wa zi si aichama aza vaya aanini, Ada awụ ọi zụa si aichama awụ vaya wụ 16 Aaviki waa bawẹ nini, a sụụ sụeyi vene ọfatụvakụ nin anaa vẹngwụ shi doti aza ẹ zụ yẹ ki ẹẹ ba awẹ. Irẹiza maa ka yụ wụ, ẹẹ dọ ọgụ aanini da. 17 Ama, waa bawẹ nini, nyina eyi awụ, dụ wa si angwẹ muna eyiirẹsụ, 18 doti asi azẹnẹsa yẹ kụ waa bawẹ nini, ọchishi Ada awụ nin ana yini angwụmi kẹnẹ. Ada awụ nin enee retẹ ini angwụmi vaa si ọgu yụ wụ nini ini orere. 19 Asụụ kụ ogu tẹ yi ẹngwụ awụ nin inẹshẹ, izẹni idegu ve zu yee du o sha, do ze kụrẹ ọnri ki izẹni oyi va zụụ chaka, do ne yi o. 20 Ama, kụ ogụ tẹ yi ẹngwụ awụ nin ineeku, izẹni idegu reizue yee duo, do rezee kurẹ, di oyi nini rai zụa chaka ireshi nee yi o. 21 Fụvọki izẹni ogu awụ nin ra ya, izọ ọni ọtụtụrụma awụ nini zẹ va yii ya. 22 Iri vi ọpa yi ẹngwụ ọza. Fụvavọ, iri awụ re zoza, ẹtofei vaa ngwụni ẹngwụ awụ bo. 23 Ama, iri awụ re duvi, ẹngwụ awụ bo ve shi yi oozi. Fụvavọ aaviki ẹtofei ana yininẹ awụ vi oozi oboro, oozi ọnọ mẹ va bani tu aavọ! 24 Ozenya ọi zụa fẹkẹ ọga ẹẹva, fụvọki ọ vaa kụayi ọnya, doo si irẹyi ọsa; ọọzi vọ va vi, dọ kụayitụra ọnya, dọ si eyi wụ ọsa. Wai zụa fẹkẹ Oshomoshi, dụ za fẹkẹ ogụ. 25 Fụvavọ ma kaa yụ wụ nin ka, asụ shafasha inọpati ẹshẹ awụ, ka, sụụ vaa ri navẹki sụụ vee fu ọnri ki su vee si ku ẹngwụ nini. Ifẹ ọza we rezi funa isari, navẹki ẹngwụ ọza we rezi funa ita? 26 Re, unomi nin ana yẹbẹẹba, e me chire, ẹ ma fa de ve ne pere tụni ụfọ, ama Ada awụ, ana yi ineeku aa pa wa. Navẹki ụ wa razi nyi ụbani funa unomi nini? 27 Yere ọnya ini awụ nin, ana va zụụ zirẹngwụ afasha, dọọ da ụvọ ọnya tụni ifẹ aani kẹ? 28 Sẹnẹvẹ dụ waa shafasha inọpati auru nini? Roo irẹyi ododo ana chi tụni avi, ẹ mẹẹ fụ. Ẹ ma mẹ akanya, ẹ ma ngwẹ owu, e me shi ita. 29 Di ma kaa yụ wụ nin ka, Isoromni mẹ nyi ụbani tu, azẹzi mẹẹ ẹngwụ vene ọnya ini ododo ẹnẹ. 30 Oshomoshi ra vọvọ si uzoza ku avi, ọnu wee re irajini, ama ụfụọ dee ne e ngwụni ira, u we ro ka ọi zụa si ita ene zoza funavọ ku wu ẹngwụ nini? Ọdọwụ awụ nini o weyi o. 31 Fụvavọ asụ shafasha ka, "Sii vaa rii" navẹki "Sii vee fu" ọnri ka "Sii vee chire." 32 Fụvọki isẹnẹni ọni Ijẹntaini nin ee sii zii zi. Ada awụ nin ana yi ineeku ọ yẹ ki ọvọrọ kụ wa nyi isẹnẹni nini. 33 Ama, bidi sii ijọva aani ọnri ọmimanasẹrẹ aani da, ụmọnọ, dọ vaa si anavọ bo tụọ yụ wụ nini. 34 Fụvavọ, asụ shafasha fụvụ fụọ, fụvọki ụfụọ ọnọ vaa shafasha ẹngwụ aani, ọkụshi ọzọọza vana nyi ọshimi ana yinaani.