Imatiu 5

1 Ijesu me re azọkọni ẹnẹ, dọ shirẹ nọ ini irẹsụfa. Ọ mẹ yatụ da, di eziafụ aani vetu o. 2 Dọ sharenu, dọọ zụ wa isa, ka, 3 "Ẹdabẹrẹ ọnọ vi yi aza ana vi onriwa ini ifẹ, fụvọki ijọva ineeku ọiza vi ayaanini. 4 Ẹdabẹrẹ ọnọ vi yi ẹnẹnaa jorere, fụvọki Oshomoshi vee fufu wa. 5 Ẹdabẹrẹ ọnọ vi yi ẹnẹna nyi ivefu shẹẹshẹ, fụvọki ẹni ẹnẹ vaa kụ ẹshẹ ogu. 6 Ẹdabẹrẹ ọnọ vi yi ẹnẹni ụngwẹ aa kụ ọnri ẹnẹni onyi aa kụ fụvọ ̣ irẹiza ọmimẹ, fụvọki inẹ aanini vee shi. 7 Ẹdabẹrẹ ọnọ vi yi ẹnẹna nyi ayụva, fụvọki e vee re ayụva dọ. 8 Ẹdabẹrẹ ọnọ vi yi ẹnẹnọ vi ki ẹ nyi ọtụtụrụma ọnini, fụvọki e vee re Oshomoshi. 9 Ẹdabẹrẹ ọnọ vi yi aza enee ji irazi, fụvọki ezi Oshomoshi ana vaa shụ wa. 10 Ẹdabẹrẹ ọnọ vi yi aza anaa mụya ri fụvọ isẹnẹsẹrẹ, fụvọki ijọva ineeku ọiza vi ayaanini. 11 Ẹdabẹrẹ ọnọ vi yụ wụ, aza ra kụ wụ ụfụ, dẹẹ mụya rụ wụ fụvọ ọdọwụ awụ, ọnri dẹ ka irẹyi ọshimi ana vi apinẹ shi wu fụvọ ami. 12 Jụjẹ, di inẹ awụ o shine kokoro, fụvọki ọgụ ọbani yi ineeku yụ wụ. Avọ ọna mẹ si ụya ri ọkisẹ nin ana vidi vẹ tụ wụ nin fụvọ ọdọwụ. 13 Ẹwụ nini ọnọ vi anọ yi ẹshẹ. Ama anọ ra si ushine aani ne ta, sa va kụ si mẹ kọ varama shine kẹ? Ọi kụ nyi isa va zụ siọ mẹ fụni ka va shaa, dạ kụ afụ shio. 14 Ẹwụ nin ọnọ vi ọpa yi azạ. Irẹkụra ana yini irẹsụfa ọ ma zụ si ẹngwụ tẹ. 15 Azeme fu ọpa, daa si uji ku o, ama a siọ gẹ ọchi irakọpa, dọ si ẹtofei yi aza ana ineeshi. 16 Navọ di ọpa awụ nin ọọ za inọvidi aza, dẹ zụ re ụkọrọ ọiza awụ nin, doti ẹ zụ sụga yi Ada awụ ana yineeku nin. 17 Asu ro kim vẹ ve du ofi navẹki ọkisẹ nini. Ma zi vẹ ki me ve du wa sha; ma vẹ ki ma va sụ wa vẹ ini ọmimẹ. 18 Irẹiza ma kaa yụ wụ nini ka, poro di ineeku ọnri ẹshẹ ọ parafu, ọzi nyi irẹyi ọchi ọnya ana vaa ji kụra fiini ofi vụụvụrụ, netu ẹfi ọni onbo vaa vara ọmimẹ. 19 Fụvavọ ọzatụrọza ene re du ene weyi fu keekere ini ofi ẹnẹni, dọ zẹ zụ aza nini ki ẹ vọvọ mẹ, a vaa shi ọzọnọ, ezene weyi fu keekere ini ijọva ineeku. Ama ọza ana ra mẹ ẹ, dọ zẹ kaa yi aza nin, ọni ọn ọvi ọza ana bani fu bo ineeku. 20 Fụvọki ma kaa yụ wụ nin ka, ọọzi vi ki ọmimẹ ẹtẹrẹ awụ nin fụna ayi ọyofi ọnri Ifarisi nini, wai zụa ngwụni ijọva ineeku ọiza nin. 21 Wa wụ nini amẹ kaa yụ wa, ini ụmọkụkụ ka, "A sụ wụ ọza, ọza ana ra wụ ọza, vana vaa veyi ki ayọtụnẹ ishọọji." 22 Ama ma kaa yụ wụ nin ka, "Ọza ọna kụayi ọzọfụụva aani, vana vaa yini ivi ishọọji. Ọza ana ra zẹ kaa yi ọzọfụụva aani ka, ọzi zarẹsụ, "vana vaa yini ivi," ama ọza ana ra ka yọ ọza ka. 'Ẹwụ Ọnụra!' vana vaa yini ivi ineeku ira. 23 Fụvavọ, aaviki wa si isa-irafẹkẹ aa nọ ini ọpẹtẹ, dụụ tamayi ki ọzọfụụva awụ ọ nyi irẹyi awụ tụninẹ, 24 navọ isa-irafẹkẹ ọnọ tụni ọvidi ọpẹtẹ, dụ wa varama ne teni akaakana ẹwụ ri ọza ọfụụva awụ, dụ wa va tangwa va mẹ isa-irafẹkẹ awụ. 25 Jantụ pe ọza ọni ẹwụ riọ ra nyi irẹyi ka inoze, ụ maa nọ ini ikootu nini, ọọzivavọ, ọ va si wụ yi ọmọkarẹyi, di ọmọkarẹyi si wụ chire ọnọpa ụvọ, da vọọ kụ si wụ tụni ijaarụ. 26 Irẹiza ma kaa yụ wụ, wai zụa jinẹ fiizọ poro du we si ụta awụ bo. 27 Wa wụ kaa ka a da, ka, 'Asụụ sẹrẹka.' 28 Ama ma kaa yụ wụ nin ka, ọza ene ree re ọnyẹnẹ, di eyi ani razi fiini ẹngwụ aani, o pe e sẹrẹka da ini ọtụtụrụma aani. 29 Iri ụvọri awụ ra mẹ kụ wa jigege, tụ ọ jesi, du we ne e ta. Fụvọki, ọ dashi ka, aka ọnya ini ẹngwụ awụ ọ da ne ta, fụna ki e ne ẹwụ ụvọta ngwụ ineeku ira. 30 Ụvọri awụ ra mẹ kụ wa jigege, da a kụra, dụ we ne e ta. Fụvọki, ọ dashi ka, aka ọnya ini ẹngwu awụ ọ da kụra, fụna ki e ne ẹwụ ụvọta ngwụ ineeku ira. 31 A zẹ ki kaa ka, 'ọza ene re yi ose aani, ọ si iwe ivenu yọ.' 32 Ama maa kaa yụ wụ nin ka, ọza ene re yi ose aani, ọọzi vi ka fụvọ irẹka ọsisẹ, vana mẹ ẹ ki ọ̣ sẹrẹka. Ọza ana ra nyi ọnẹẹ ene yi tẹtẹ da, vana zẹ si sẹrẹka. 33 Zẹtụọ, wa zẹ wụ da kaa ka yi anụmọkụkụ nin ka, 'Asụụ shieku apinẹ, ama mẹ isa ọnụ ra shieku aani yi Ananyiyi. 34 Ama ma kaa yụ wụ nini ka, asụ shieku vụụvụrụ; asụụ si ẹbẹẹba shiekụ, fụvọki izọ ọni Oshomoshi yatụ tụ. 35 Asụụ si ẹtẹ shieku, fụvọki izọ ọni Oshomoshi kụ afu shi; navẹki Ijerụsanẹmụ, fụvọki irẹkụra oshinọyi ọbani ọnọ vi. 36 Asụụ si irẹsụ awụ shieku, fụvọki wai zụa mẹ ki ẹyi awụ ọnya ọ vi ọvụọvụ, navẹki ojooji. 37 Ama navọ di irẹyi awụ ọ vi, 'Ee, ee' navẹki 'Eiye, eiye', isẹne re funa ẹneni, vana fiidi eshu vẹ. 38 Waa wụ ki a kaa ka, "Ọza ra tụ wụ iri ọnya, ẹwụ ọnọ zẹ tụ ọ iri ọnya; Ọza ra tụ wụ anyi ọnya, ẹwụ ọnọ zẹ tụ ọ anyi ọnya." 39 Ama maa kaa yụ wụ nin ka, ọza ra mẹ wụ ọshimi, asuu si atọ. Akikọnọ, ọza ra nya wụ arifẹ ini okura ụvọri, zẹ vara okura ụvọfa yọ. 40 Ọza ra shi wu irẹka ini ikootu, dọ dọ wụ abada, si ọtụnẹ auru aani bẹrẹ yọ. 41 Ọzatụrọza ana ra si ụkata za wụ zụsẹ imeeri ọnya, kụafụ zaa zụsẹ imeeri ẹẹva. 42 Ọzatụrọza ọna ra pa wụ isa, siọ yọ, asụ vara irama ka ezene re si ki ọnọ dọ isa zere finụvọ awu. 43 Waa wụ nini, ki a kaa ka, 'Ụ bẹdọ sirẹyi ọza ọfụva awụ, ama dụ kụayi ọnivi awụ nini.' 44 Ama, ẹma kaa yụ wụ nin ka, sirẹyi ọnivi awu, dụ wa tụozụrenụ yi azẹna mụya rụ wụ. 45 Fụvọ dụ wa zụ vi ozi Ada awụ ana yi ineekụ. Fụvọki ọni ọnọ mẹ ki ọyi ọ sha tụra azẹshimi ọnri azọiza, ọni ọnọ mẹ ki orishi ọọ zụ ku azọiza ọnri azẹshimi. 46 Aaviki ezene sirẹyi awụ kẹnẹ ọnụ ve sirẹyi aani, yere ọgụ ana yi inaani.? Ọdi maana nini warama mẹ avọ? 47 Waa kụ ẹẹnyara awụ renya, sẹnụụ mẹ ọnụụ si fụna ẹzẹnavọ? Ẹnẹna razi yẹ Oshomoshi wa rama mẹ avọ? 48 Fụvavọ ụ bẹdọ vi ọgụgụrigụ nini vene Adayi ẹbẹẹba mẹ vi ọgụgụrigụ.