Imatiu 4

1 Ụmọnọ, di Ifẹ Ọnini si Ijesu shirẹ nọ ini ụnọmi, di eshu na mọọre. 2 Ijesu mẹ bawẹ ẹkụshi ẹbẹẹrẹva, ọọdụ ọnri irafụ da, di ụngwẹ aa kụọ. 3 Di ọmọzare ọnọ vẹ, dọ kaa yọ ka, "Aaviki Ozi Oshomoshi ọnụụ vi, si umọ kaa yi irẹta ẹnẹni ki ẹ vara ivụrẹdi." 4 Ama di Ijesu voshi ka, "A chẹre ̣ẹ ka, 'Aivi zirẹngwụ ivụrẹdi renya ọni ọza va zi mẹshẹ, ama zirẹngwụ irẹyi bo ana ra jinẹ vẹ fiini irenu Oshomoshi.'" 5 Ụmọnọ, di eshu si Ijesu nọ irẹkụra ọnini ọnọ, dọ si ọ na tụni ogegerege irẹsụ itẹmpụrụ, 6 dọ kaa yọ ka, "Aaviki Ozi Oshomoshi ọnụ vi, ji vanyẹtẹ, fụvọki a chẹrẹẹ ka, "Ọ vaa si ụmọ kaa yi angẹni aani ki ẹ̣ mọgụvọ yụ wụ, dee chema wụ tụni ụvọ, doti a sụ na ji igege." 7 Di Ijesu kaa yọ ka, "Aa zẹ chi chẹrẹẹ ka, 'Wa zi bẹdọ mọ Ananyiyi, Oshomoshi awụ, re." 8 Di eshu zẹ si ọ nọ ini irẹsụfa ana nẹba kokoro, dọ si ijọva irẹkụra renyi renyi ana yini ẹshẹ ọnọni ọnri ụbani aanini zụ ọ. 9 Dọ kaa yi Ijesu ka, "Isẹnẹni bo ọna va sii yụ wụ, aaviki wa zẹẹ kụ wa vakuẹtẹ̣ yi mi."̇ 10 Ụmọnọ, di Ijesụ kaa yọ ka, "Zi kavana yi mi, ẹwụ eshụ! Fụvọki aa chẹrẹẹ ka, 'Ụ vaa fẹkẹ Ananyiyi Oshomoshi ọna nyụ wụ, ọni rẹnya ọnụ vaa vakuẹtẹ̣ yi."' 11 Ụmọnọ, di eshu fiidi aani, di angẹni nin va fẹkẹ ẹ. 12 Ijesu mẹ wụ ki a za Ijọọnụ, de chire e tụni ijaarụ, dọ varama nọ Iganini. 13 Dọ fụri Inazarẹti na ra ini Ikapanọmụ, ana yini ụtọ irefu Iganini, ana yini ẹtẹ Izebụrọni ọnri Inafitaani. 14 Ọ vọvọ mẹ fụvọ di isẹna ka zirẹngwụ Aizaya ọkisẹ, ọ zụ sẹ kaa, 15 "Ẹwụ ẹtẹ Izebụrọni ọnri ẹtẹ Inafitaani, ana yi ọgụri ụtọ irefu, aa para Ijọdani fu, ana vi Iganini ọi Ijẹntaini nini! 16 Aza ana yatụ ini oozi ee re ẹtofei ọbani da, shi ẹnẹna yatụ ini okakooro ọnri ụmama isuọwụọza, vọni ẹtofei zẹ ngwụ ne tụ." 17 Fiini ẹfi ọnọ, di Ijesu vẹrẹ ee showu irenube ọiza ka, "Rinẹ varama fiini aichama awụ nini, fụvọki ijọva ineeku ọ si kavape." 18 Ijesụ maa zụsẹ ini ụtọ irefu Iganini, o re anẹrụ ẹnyara ẹẹva, Isaimọni anaa shi Ipita, ọnri Andụrụ ọnyara aani, ki ee ne asha ngwụ enyi, fụvọki ozube isenyi ẹnẹ vi. 19 Di Ijesụ kaa yụ wa ka, "Waa vẹ, dụ wa vatụra mi nini, ki mva vara wụ nin aza anaa za aza, vene ụ mẹmẹ aa za isenyi nini aavọ." 20 De ne asha aanini tẹtẹ ini ụmụmọ, dẹ vatụra a. 21 Ijesu mẹ zụsẹ fiizọ, do ze re anẹrụ ẹnyara ẹẹva ọsa, Ijemsi ozi Izebede ọnri Ijọọnụ ọnyara aani, dẹ yini ẹpa bẹri Izebede ada aanini, dee teni asha aanini gẹ, di Ijesu shụ wa, 22 dẹ navọ ẹpa ọnri ada aanini, ini ụmụmọ, dẹ vatụra Ijesu. 23 Ijesu ọ varakara ọkakooro Iganini zii zi, dọọ zụ aza isa ini isinagọọgụ, dọọ karenbe ọiza ijọva Oshomoshi, dọọ fụ aza ikụ ọnri ẹngwụọzi renyi renyi sha ini akaakana azẹnẹ. 24 Di irenụbe inọpati aani garashi Isiriya bo, di azẹnẹ va kụ ọnẹngwụọzi nin bo ve tu o, ana nyi ikụ renyi renyi ọnri ẹnẹni ẹngwụ aa zi, shi ẹnẹni azeeshi aa zama, shi ẹnẹni obo aa za, shi osuẹngwụ nin. Di Ijesu fụ wa ikụ sha. 25 Di azọkọni ụnọmpa vatụra a fụri Iganini, Idẹkaponisi, Ijerusanẹmụ ọnri Ijudiya, shi fụri akajinẹ Ijọdani.