1 Ijesu ọ shi eziafụ aani ẹwụrẹva vabẹ, dọ si ụmọ yụ wa ka, ẹẹ dụ ifẹ azeeshi jinẹ, doti ẹẹ fụ aza ikụ ọnri ẹngwụọzi aanini renyi renyii sha. 2 Ọmẹyani, irẹsha eziafụ ẹwụrẹva ẹnẹ yi: Ọzi ipaapa ọnọ vi Isaimoni ana zẹ shii shi Ipita, ọnri Andụrụ ọnyara aani; Ijẹmsi ọnri Ijọọnụ ọnyara aani ana vi ezi Izebede. 3 Ifiripi, Ibatoromeu, Itọmọsi, ọnri Imatiụ ọdimaana, Ijẹmsi ozi Afiyọsi ọnri Itadiyọsi. 4 Isaimoni ọna vi Ọnyiọyaya ọnri Ijudasi Iskariọti ọna vaa bafụ aani. 5 Ẹnẹwụrẹva ẹnẹni ọni Ijesu tụ itụ jinẹ, dọ kaa yụ wa ka, "Asụụ nọ izẹni anarimadọwụ nin ra, ọnri ka asụụ ngwụ irẹkụra ani Isamariya ọnyọnyi." 6 Akikọnọ, na we ne tu atẹmẹ ọi ireshi Isrẹni ene vu; 7 Ụ maa na, dụ waa ka irenube ọiza ka, 'Ijọva ineeku ọ gụrẹtẹ da.' 8 Ẹnẹni ẹngwụ raa zi, fụ wa yọ sha; enene su, sha wa kwẹẹtẹ; ọnikụ ọbani nini, mẹ wa nii; dụ wa dụ ifẹ azeeshi nin jinẹ. Ọfẹ ọnụụ dọ, ọfẹ ọnụ ra siọ yụ wa. 9 Asụụ si igoonụ, isiriva, navẹki ikupa tụni irapa awụ nini. 10 Asụụ za ampo waa jinẹ nin, navẹki auru ọsa, navẹki ivata ọ-nyi-orupa, navẹki ọchi ọkẹtẹ fụvọki anụkọrọ vana si isari aani yi. 11 Irẹkụra tụrirẹkụra ọnụ ra ngwụ nin, ọọ vi ọbani navẹki oweyi, u si ọza ebebaani ana va zụ dọ wụ pe ẹngwụ nin, dụ wa ya pe e netu ẹfi ọnụ vaa fiizọ nin. 12 Ụ mẹ ngwụ ireshi ọnọ nini, dụ wa kụ aza bo. 13 Aaviki ireshi ọna sẹrẹ yọ, navọ doti ẹngwụọrọ awụ ọ ya bẹrẹ wa nin. Ama aaviki ọzi vi ireshi ọna sẹrẹ, navọ doti ẹngwụọrọ awụ ọ varama ka wụ vẹ nin. 14 Ẹnẹna razi dọ wụ nin wụ, navẹki ẹnẹna razi zẹ wụ irẹyi awụ nin, waa jinẹ fiini ireshi ọnọ navẹki irẹkura ọnọ, bani ezi afụ awụ sha tụzo. 15 Inirẹiza, ma kaa yụ wụ nin ka, ọ vaa rọ Isodọmụ ọnri Igomora ẹngwụ ini ọkụshi ishọọji funa irẹkụra ẹnẹ. 16 Ree, ma tụ wụ nin jinẹ vene atẹmẹ ini akaakana ọdụmi nini, oo tu du we no ụvira vene isẹchichi nini, ama mẹ vene onekuku ana ra ma mẹ ọshimi. 17 Si eyipẹtẹ yi aza nin! Aza vaa za wụ nin nangwụ ini iragụ, ẹ vaa si inorii tu wu nin ini isinagọgụ aanini. 18 Ụmavọ daa za wụ nin nọ inọvidi igomina shi oshinọyi nini fụvọ ami, doti ẹ si mẹ ivenụ yụ wa ọnri anarimadọwụ nini. 19 Ụmẹ ọnẹ ra za wụ nin chire wa ụvọ, asụụ shafasha ki sẹnọ vọrọ kụ wa ka nin, navẹki ụ mẹ vaa ka nin. Fụvọki a vaa si isẹnụ vaa ka yụ wụ nin ẹfi re si tu. 20 Fụvọki ọzi vi ẹwụ ọnọ vaa karẹyi, ama ifẹ Ada wụ nin ọnọ vaa zirẹngwụ awụ karẹyi. 21 Ẹnyara vaa si ẹngwụ chire wa ụvọ ka wu ̣ọ, di ada za ozi aani chire wa ụvọ ka wụ ọ. Ezi vaa kwẹẹtẹ tu ada ọnri ọnyi, dẹ mẹ ki a wụ wa. 22 Aza bo vaa kụayi awụ fụvọ irẹsha ami. Ama ọzẹna ra siẹngwụdọ netu ẹtẹ ọna va dọọ tụ. 23 Ụmọnẹ raa mụya rụ wụ nin ini irẹkụra ọnya, zue fiizọ nin, dụ wa nọ irẹkụra ọsa nin, fụvọki irẹiza ọni maa ka yụ wụ ka, wai zụa zi irẹkụra bo ana yi Isrẹni ta, di Ozi Ọza ọ va varama vẹ. 24 Ọza anaa kọsụẹ isa, o me funa ọzẹnaa zụ ọ isa, navẹki di ozida funa oshirẹsụ aani. 25 Ọza anaa kọsụẹ vọnọ vọrọ ki o vene ọza anaa zụọ isa, di ozida vene oshirẹsụ aani. Aaviki a shi adareshi Ibezeebu, irẹsha ana vaa shi anreshi aani mẹ vee duvi tu aavọ! 26 Fụvavọ asụ shiangwa aanini, fụvọki ọzi nyi isenee kuoku ana razaa sii zụ, navẹki ana tẹ, ọna razaa yẹ. 27 Isẹnim ra ka yụ wụ ini oozi, kaa ini eyigede; ọnụ ra si ụtọ awụ wụ, showu aani inẹẹsụ ireshi. 28 Asu shiangwa ẹnẹna vaa zụ wụ ẹchiẹngwụ, dẹẹ ma zụ wụ ifẹ. Akikọnọ, ụ nyi angwashi ọza ana va zụ wụ ifẹ ọnri ẹchẹngwụ ineekụ ira. 29 Naveki aivi ikọvọ anaa na unomi ọnyọpandede ẹẹva? Tụavọtụavọ ọzi nyi ọnya ana vaa javọ di Oshomoshi razaa yẹ. 30 Ama ẹyi irẹsụ awụ vana zika. 31 A suu shiangwa, wa nyi ụbani funa ọnyọpandede ọrụrụ nin. 32 Fụvavọ, ana ra karẹyi ami inọvidi azẹnẹni, ẹmi zẹ va karẹyi aani inọvidi Adami ana yi ineeku. 33 Ama ọza ene re yi mi tẹtẹ inọvidi aza, vọni ẹmi ze vee yi tẹtẹ inọvidi Adami ana yi ineeku. 34 Asụụ ro ka ẹngwụọrọ ọnim za vẹshẹ ọnọni, ọzi vi ẹngwụọrọ, ama itakovi ọnim za vẹ. 35 Fụvọki mva mẹ ki oziọnọrụ o veyi irazi ka ada aani, di oziọnyẹnẹ veyi irazi ka ọnyi aani, di ose ozi veyi irazi ka ọnyi ọva aani. 36 Anreshi ọza ẹnẹ vaa vi ọnivi aani. 37 Ọzene re sirẹyi ada navẹki ọnyi funa mi, ọzi fụ anaa vi ayami, shi ọzene re sirẹyi ozi funa mi, ọzi fụ anaa vi ayami. 38 Ọzene rezi chema ọchi avashi aani doti ọ vatụra mi, ọzi fụ anaa vi ayami. 39 Ọzene re si ifẹ ẹshẹ aani, vọnọ vaa javọ. Ama ọza ọni ẹshẹ aani raa javọ fụvọ ami ve re e sii. 40 Ọzẹna ra tanụvọ dọ wụ, ọnọ tanụvọ dọ mi; ọzẹna ra tanụvọ dọ mi, ọ tanụvọ dọ ọzẹna tụ mi. 41 Ọza ana ra tanụvọ dọ ọkisẹ fụvọki ọkisẹ ọnọ vi, o vee re ọgụ ọkisẹ dọ; zẹna ra tanụvọ dọ ọnirẹiza fụvọki ọnirẹiza ọnọ vi, o vee re ọgụ ọnirẹiza dọ. 42 Ọzatụrọza ọna raa mẹ ọgụvọ yi ọzenya ini ezieweyi ẹnẹni, fụvọki eziafụ ami ẹnẹ vi, shọọ vi ipa enyi ofifu kẹnẹ ọnọ ka yụ wa, ma kaa yụ wụ inrẹiza, ka, ọzi nyi ọgụ aani me vee vu."