1 Inaama ọni Ijesu kaa yi eziafụ aani isẹnẹ vaa mẹ da, dọ fiizọ nọ irekụra aanini na zụ wa isa, dọ zaa karenube. 2 Ọmẹyani, ẹfi ọni Ijọọnụ wụ ini ijaaru inọpati isa ọni Ikristi aa mẹ, dọ tụ eziafụ aani itụ: 3 ka ẹna fọ ọ ka, "Ẹwụ ọnọ wa vaa vẹ navẹki ye zi ọzẹsa?" 4 Di Ijesu tụoshi ka, "Wa na nin, wa na kitụ yi Ijọọnụ isẹnu re navẹki isẹnụ wụ nin. 5 Ogurii nin ee retẹ, Osụafụ nin aa zụsẹ, ọnikụ-ọbani nin vana mẹ ẹngwụ nii, ogụtọ nin aa wụrẹyi, a sha aza ene su kwẹẹtẹ, aa karenube ọiza yi onriwa nin. 6 Ẹdabẹrẹ ọnọ vi yi ọzạ ana razi mọikụ shi mi." 7 Eziafụ Ijọọnụ mẹ zi na, di Ijesu vẹrẹ aa karẹyi yi ạzọkọni ẹnẹ inọpati Ijọọnụ, "Sọnụụ nọ ini ụnọmi ne re nin ke?"--- avi dẹẹrẹ ọni ashi e sheni wa yọ? 8 Navẹki sẹnụ jinẹ ne re--- ọnọrụ ana kụẹnya ana nyi fẹnẹfẹnẹ wa yọ? Inirẹiza, ẹnẹna ra kụẹnya ana nyi fẹnẹfẹnẹ vana ra ini ireshi oshinọyi nini. 9 Navẹki sẹnụ jinẹ ne re nini ke--- ọkisẹ wa yọ? Ọọ vọvo ̣vi, maa kaa yụ wụ nin ka, o vene funa ọkisẹ kokoro. 10 Ọnọni vi ọza ana bidi chẹrẹ isa tẹtẹ inọpati aani ka, 'Ree, maa tụ ọnitụ ami tụọvidi awụ ana va kụoze sha yụ wụ.' 11 Irẹiza maa ka yụ wụ nin; ini akaakana ẹnẹnọ vi ki a ma zirẹngwụ ọnyẹnẹ, ọzi nyi ọzạ ana nyi ụbani inaanini funa ljọọnụ Ọsami. Tụavọtụavọ ẹzẹna nyi ụbani one weyi fu bo ini ijọva ineeku ọiza, vana nyi ụbani fu o. 12 Fụri ụmẹ Ijọọnụ Ọsami va ngwụ ụmaani, ọna fụrẹ a si ụkata ngwụni ijọva ineeku ọiza, ọnụkata nin renya enee re e dọ. 13 Fụvọki ọkisẹ nin ọnri ofi vana fụrẹ aa kisẹ dọ va nyi ki Ijọọnụ ọ vẹ; 14 Aaviki o zeweyi dọ zẹ, ọni ọnọ vi Enaija ana kọ vaa vẹ. 15 Ẹzẹna ra nyi ụtọ, ọ wụ. 16 Sọnim vaa si evereze ọnọni mọrọ kẹ? O vene ezi eweyi anaa merenyinyi inorere, dẹ yatụ, dẹẹ shi ẹngwụ, dẹẹ kaa yi ẹngwụ ka, 17 'Ye fu ofere yụ wụ, wa zi nyẹzẹ. Ya karẹsụ shi, we zi sune nini.' 18 Ijọọnụ mẹ vẹ, dọ razi ri isari, shi eche do re zi fụ, dẹ ka, 'Ọ nyi ifẹ azeeshi.' 19 Ozi Ọza mẹ va vẹ, dọọ ri, doo fu, dẹ zẹ ka, 'Avụ re e, ọ-ri-isari avụka-avụka ọnri ofueche ọnọ vi, dọ zẹ vi vi ọta ọdimaana ọnri anaichama nin.' Ama, ụkọrọ ụvira ọnọọ dọ ụvira renu." 20 Di Ijesu vẹrẹ ee du irẹkụra ọnọ yaa mukọrọ oshishozeyi bo ẹngwụ, fụvọki ezi rinẹ varama. 21 Oo du wu ku, ẹwụ Ikorazini! O du wu ku, ẹwụ Ibẹtisaida! Aaviki aa mụkọrọ oshishozeyi ẹnẹni ini irẹkụra Itaya ọnri Isidọni, vene aa mẹ mẹ ẹ ini irẹkura awụ nini, o yeen si ku ẹnẹ vụ ita ọvẹngwụshi, dee ku atitọ ọvẹngwụshi, dẹ yaan rinẹ varama. 22 Ama, ọkụshi ishọọji vaa rọ Itaya ọnri Isidomi ẹngwụ funa awụ nini. 23 Ẹwụ Ikapanọmụ, ụ wa vana kẹni ki a vaa ka wụ shirẹ na ngwụ ineekụ ọiza? Ọzi vọvọ vi, ineeku ọrọkọtọ ene vee ne wu ngwụ. Fụvọki aaviki Isodomi ana ya mụkọrọ oshishozeyi ana mẹ ininẹ awụ, ẹ yaan va yinaani ve tu irajini. 24 Ama, ma kaa yụ wụ ka, "ọkụshi ishọji vaa rọIsodọmi ẹngwụ funa wụ." 25 Ini ẹfi ọnọ, di Ijesu ka, "Ada, ana nyi ẹbẹẹba ọnri ẹtẹ, ma si ụga yụ wụ, ẹwụ ọnọ vi Ananyiyi, ineeku ọnri ẹshẹ, fụvọki isẹnẹni vọnụ si tẹ yi ẹnẹna nyi ụvira ọnri ọyiyẹ, dụ si ọ zụ ẹnẹna razi nyi ọyiye, venebiri ezi eweyi nini. 26 Ada, avọ ọmẹ vi vi, fụvọki ọ ngwụmi eyi ẹtẹẹtẹrẹ. 27 Adami ọ si isa bo chire mi ụvọ da; ọzi nyi ọzọnyọnyi ana yẹ Ozi, ọchishi Ada; ọnri ki ọ zi nyi ọzọnyọnyi ana yẹ Ada, ọchishi Ozi, ọnri ọzatụrọza ọni Ozi re si ki ọnọ siọ zụ 28 Waa vẹ, ve tu mi nin, ẹwụ nin a naa mẹ akanya, di ẹnya a ngwụ, mva si ifoshi yụ wụ nini. 29 Chema ọparaka ami dụ wa kọsụẹ finụvọ ami, fụvọki ọza shẹẹshẹ ọni ọtụtụrụma aani vanẹtẹ ọnim vi; u vee re ifooshi dọ yi ẹngwụ awụ nin. 30 Fụvọki ọparaka ami ọ rọ ẹngwụ, di ẹnya ami fẹrẹ.