Imatiu12

1 Ini ọkụshi Isabaati ọnyi, di Ijesu aa zi irarẹ akụ parafụ. Ụngwẹ ma kụ eziafụ aani, dẹ vẹrẹ aa ji akụ ẹnẹ, di ẹ riọ. 2 Ama Ifarisi nini me re wa, dẹ kaa yi Ijesu ka, "Avu we re eziafụ awụ maa mẹ isaanyisi ini ọkụshi Isabaati." 3 Ama di Ijesu kaa yụ wa ka, "We zi ri re ka nin, isẹni Idevidi mẹ, ụngwẹ maa ku ̣ọ ọnri aza ana ya pe e? 4 Dọ ngwụ ireshi Oshomoshi na, dọ na ri ivụrẹdi ana si tụni ọvidi Oshomoshi, ọnọ vi ki isaanyisi yọ, ki ọ riọ, shi ẹnẹna ya pe e, ọọsi fiini arụfa nini. 5 U we rezi re ini iwe ofi ka, arụfa nin mẹmẹ ngwụni itẹmpụrụ ini ọkụshi Isabaati, dẹ mẹ isaanyisi da razi jivi yụ wa? 6 Ama, ma kaa yụ wụ nini ka, ọza ọnya ana nyi ụbani fụni itẹmpụrụ yi izọni. 7 Waa yaan yẹ isẹni irẹyi ọnọni si zụ, 'Ayụva ọnim si, aivi isẹvọ; wa zi yaan jivi yi ọza ana razi rivi. 8 Fụvọki Ozi Ọza ọnọ vi Ananyiyi tụra ọkụshi Isabaati." 9 Ụmonotu, di Ijesu kweẹ̣tẹ fiizọ, dọ ngwụni isinagọgụ aanini na. 10 Re, ọ nyi ọnọrụ ọnyi ene suvọ izọ, di Ifarisi nin fọ Ijesu ka, "Ọ waa sẹrẹ ki a fụ ọza ikụ sha ini ọkụshi Isabaati?" Doti e roze jivi yọ ka ọ mẹ ivi. 11 Di Ijesu kaa yụ wa ka, "Ọwa nyi ọzọnyọnyi ini akaakana awụ nini, ọnọ vi ki ọ ̣nyi atẹmẹ ọnya, di atẹmẹ ọnọ zina ngwụni ụsi ana nyinẹ ini ọkụshi Isabaati, do rezee nee tura a jinẹ fiini ụsi ọnọ? 12 Dọ va si vi ọza ana nyi ụbani funa atẹmẹ! Fụvavọ, ọ sẹrẹ ka, a mẹ ọiza ini ọkụshi Isabaati." 13 Di Ijesu va kaa yi ọnọrụ ọnọ ka, "Tanụvọ jinẹ" Ọ mẹ tana a, di ụvọ aani varama nudi aani venebiri ụvọ ọfụụva. 14 Ama, di ifarisi nini va jinẹ na shọma, dee si oze ẹnẹ vaa sii wụ ọ. 15 Ẹngwụ mẹ karẹyi yi Ijesu, dọ tụ fiizọ. Di azẹrụrụ vatụra a, dọ fụ ẹnbo ikụ sha. 16 Dọ jọọ ụmọ yụ wa ka, asẹ navọ ki aza ẹ yẹ ki ọni yọ, 17 fụvọ di isa ọna ka tẹtẹ zirẹngwụ Aizaya ọkisẹ, ọ va si sẹ, ka, 18 "Re, Ozida ami ọnim ni yi; ọnim ngwụayiani, di inẹ ami shine tu o. Mvaa si Ifẹ ami tụra a, doo showu ishọọji yi Ijẹntaini nini." 19 Ọ zaa nyi ẹshankata, o zee nowu tụẹshẹ; ọzọnyọnyi ọi zụa wụ ọngwe aani ini orere. 20 Ọ vaa si ụmẹnẹ pe ẹnẹna razi nyi ụkata mẹshẹ. Ọ zaa wụ enenee vee su, netu ẹfi ọnọ vaa sii si ishọọji ọna vọrọ tụeba, 21 dọọ vi ka, ini irẹsha aani, Ijẹntaini nini vaa nyi ọkụayitụra ana nyi ụfụ shiẹtẹ. 22 Ụmonotu, da si oguri ọnyi ana vi evuvu, di ifẹ azeeshi yini ẹngwụ aani, ve tu Ijesu. Di Ijesu fụ ọ ikụ sha, di ọnọrụ ọnọ va kụ zụa karẹyi, doo retẹ. 23 Azọkọni ana yizọ vono osheyi, dẹ ka, "Ụ wa ki Ozi Idevidi ọni ọnọrụ ọnọn vi?" 24 Ama, Ifarisi nin mẹ wụ inọpati irẹyi oshishozeyi ọnọni, dẹ ka,"Ọnọrụ ọnọni ọi zụa dụ ifẹ azeeshi fụrẹ aza ẹngwụ, ọọzi vi zirẹngwụ ụkata Ibẹzẹẹbu ana vi oshirẹsụ ifẹ azeeshi nin." 25 Ama, Ijesu mẹ yẹ isẹnee ro, dọ kaa yụ wa ka, "Ijọva tụrijọva ana razi nyi ọma ọnya vana vaa tuosusu ọnri ki irẹkụra navẹki ireshi ana razi nyi ọma ọnya, ẹ zaa nyi ụfụ shiẹtẹ. 26 Aaviki eshu ọ dụ eshu jinẹ, ọnọ vi ki ẹ zi nyi ọma ọnya. Ijọva aani mẹ va zụụ nyi ụfụ shiẹtẹ? 27 Aaviki ụkata Ibezẹẹbu ọni maa sii dụ ifẹ azeeshi jinẹ, yere ụkata ọni ezi awụ nin aa si dụ wa jinẹ kẹ? Fụvọki ezi awụ nin ẹnẹ vaa mẹ ishọọji yụ wụ nin. 28 Ama, aaviki Ifẹ Oshomoshi ọni maa sii dụ ifẹ azeeshi jinẹ, ọnọ vi ki ij̇ọva Oshomoshi o chi ve tu wu nin da. 29 Ọza mẹ va zụụ ngwụ ireshi ọnụkata nee yi ẹnya aani, ọọ zi vi ka ọ savọ sụ ọnụkata ọnọ da. Ẹfiavọ ọnọ va zụụ si kụ ẹnya aani fụrẹ ireshi. 30 Ọza ana razi ya bẹrẹ mi, vana kaachire mi; ọza ana razi pe mi peregụ, vanaa garaa vasha. 31 Fụvavọ, ma kaa yụ wụ nin, a vaa si aichama ọnri isaanyisi bo vaya ọza; ama azẹzaa si aichama vaya ẹzẹna ka isaanyisi shi Ifẹ Ọnini. 32 Ọzatụrọza ana ra karẹyi ene rezi ze shi Ozi Ọza, a vaa siọ vaya aani. Ama, ọzatụrọza ana ra karẹyi ene rezi ze shi Ife Ọnini, azẹzaa siọ vaya aani ini ẹshẹ ọnọni, navẹki ini ẹshẹ ana vaa vẹ. 33 Mẹ ọchi, doti o zoza, ẹtụtụ aani vee zoza; navẹki mẹ ọchi doti o duvi, ẹtụtụ aani zẹ va vi ọshimi, fụvọki ẹtụtụ ọchi ana sii yẹ ọchi. 34 Ẹwụ nini ezi ibe, ọmẹ vi ki azẹshimi ọnụụ vi nini, ụ mẹmẹ va zụụ karẹyi ọiza nin kẹ? Fụvọki, fiini irẹyi ọrụrụ ana yini ọtụtụrụma ọza, ọna si karẹyi. 35 Ọza ọiza vanaa mẹ isọiza, fụvọki isọiza ono shi o inẹ; ọnri ka ọza ọshimi, fiini isa ọshimi ene shi o inẹ ọnọ si mẹ ọshimi. 36 Ma kaa yụ wụ nin ka, ini ọkụshi ishọọji, aza vaa kụrenu aanini inọpati irẹyi ana razi zarẹsụ ẹnẹ ka. 37 Fụvọki irẹyi irenu awụ ọnọ vaa mẹ wụ rishi; irẹyi irenu awụ ọnọ zẹ va zẹ mi mẹ wụ rivi." 38 Ụmonotu, di ọyofi ọnri Ifarisi ẹnyi tụ Ijesu oshi, dẹ ka, "Ọzụọzisa, ye si ki ye re ọtẹrẹwa fiini ụvọ awụ." 39 Ama, di Ijesu voshi, dọ kaa yụ wa ka, "Evereze azẹshimi ọnri ọsẹrẹka nin ee si ọtẹrẹwa. Ama, ọzi nyi ọtẹrẹwa ana vaa si zụ wụ nin, ọọsi fiini ọtẹrẹwa Ijoona ọkisẹ. 40 Ijoona mẹmẹ mẹ ẹkụshi ẹẹta ọnri irafụ ẹẹta ininẹ isenyi ọbani, avọ ọni Ozi Ọza mẹ vaa mẹ ẹkụshi ẹẹta ọnri irafụ ẹẹta ininẹ ẹtẹ. 41 Irẹkụra Ininẹvẹ vaa veyi ka evereze ọnọni ini ishọọji, daa jivi yọ. Fụvọki ee rinẹ varama ẹmẹ wụ irenube ọiza ọni Ijoona ka. Ama re, ọza ene funa Ijoona yizọni. 42 Ọnyẹnẹẹ ọna vi Oshinọyi ana yi aka ụvẹtẹ, vaa veyi ka evereze ọnọni, dọọ jivi yọ. Ọnyẹnẹ ọnọ vana fụri irasha ọgọdọ vẹ, ka, ọnọ va wụ ụvira Isoromoni, ama ọza ana bani fu Isoromọni yizọni. 43 Ifẹ ana razi ni, ra jinẹ fiini ẹngwụ ọza da, dọ parafu e si ẹtẹ ana wara, doo si ifooshi, ama do rezi re. 44 Ụmonotu, dọ ka, 'Mva varama nini ireshi ọnim tụ fụrẹ. Ọ mẹ varama da, do ne tu ka ee shi ireshi ọnọ, de teni ọ. 45 Dọọ varama na kụ ifẹ azeeshi ishimba ọsa ene duvi fu o vatụrẹngwụ, ẹnbo dẹẹ gẹ varama nọ inaani na ra. Ọvavirama ọzọnọ, doo si duvi funa ọmẹ ya ini ipaapa. Avọ gẹdẹgẹdẹ ọnọ vaa vi yi evereze ọshimi ọnọni." 46 Ijesu maa ki karẹyi yi azọkọni ẹnẹ, re, di ọnyi aani ọnri ̣ẹnyara aani dinẹ tụnẹshẹshẹ, dee si ki ene pe e karẹyi. 47 Di ọzẹnyi vẹ va kaa yọ ka, "Re, ọnyi awụ ọnri ẹnyara awụ ẹ dinẹ tụnẹshẹshẹ, ee si ki enee pe wu karẹyi." 48 Ama, di Ijesu voshi yi ẹzẹna yọ ka, "Ẹnẹvi ọnyi ami ọnri ẹnyara ami?" 49 Dọ va tanụvọ shi eziafụ aani, dọ ka, "Re, ẹnẹni ẹnẹ vi ọnyi ami ọnri ẹnyara ami! 50 Ọzatụrọza ana ra mẹ isẹni Adami ana yi ineeku si, ọzọnọ ọnọ vi ọnyara ami ọnọrụ, ̣ọnyara ami ọnyẹnẹẹ ọnri ọnyi ami."