1 Ini ọkụshi ọnọ, di Ijesu jinẹ fiini ireshi, dọ na yatụ tụni ụtọ-ubobo irefu. 2 Di azọkọni varakara a, dọ va ngwụni ẹpa, dọ na yatụ tụnaani, di azọkọni ẹnẹ dinẹ tụni ụtọ-ubobo. 3 Ụmonotu di Ijesu ee pe wa karẹyi ẹrụrụ ini ụshioche. Dọ ka, "Re, ọnaarẹ ọnyi ọ jinẹ tụra, do ne chire isa ọina. 4 O mee chire wa, di ẹnyi javọ tụni ụtọ-oze, unomi nin mẹ vẹ, dẹ tọọ wa ̣ri. 5 Ọina ọsa ẹ javọ tụni ẹtẹ irẹta ọni ezi razi ya ẹtẹrẹ. O zi ku dẹ chi, fụvọki ezi ọzi nyinẹ inaani. 6 Ama, ọyi mẹ jinẹ vẹ, de sira, de su vasha fụvọki ẹzi nyi ẹpa. 7 Ọina ẹsa ẹ javọ tụni ikeyi. Ụmọni ikeyi ẹnẹ aa fụ, dẹ za wa ri. 8 Ọina ẹsa ẹ javọ tụni ẹtẹ ozoza, dẹ tụ ẹtụtụ, ẹnyi vi avaavọ oze ẹchẹẹshi, ẹnyi vi oze ẹbẹrẹva, ẹnyi vi oze ofurẹwụ. 9 Ẹzẹna ra nyi ụtọ ana sii wụrẹyi, ọ wụ." 10 Di eziafụ Ijesu ve tu o, dẹ kaa yọ ka, "Sẹnẹvẹ dụ wa karẹyi yi azọkọni ẹnẹni ini ụshioche kẹ?" 11 Di Ijesu tụoshi, dọ kaa yụ wa ka, "A si oze tẹtẹ yụ wụ nin kụ wa nyi ọyiyẹ inọpati oshishozeyi ana yini ijọva ineeku ọiza, ama azẹzi siọ yụ wa. 12 Fụvọki ọzatụrọza ana ra nyi, vana vaa si bẹrẹ yi. Ama, ọzatụrọza ana razi nyi, ọi che ọnọ ra nyi, vana vaa dọ fụrẹụvọ. 13 Fụvavọ ọni ma sii si ụshioche karẹyi yụ wa; Fụvọki, shọọ daka vi ka ẹ sha iri sha, ọ zi nyi isẹnee re. Ẹẹ si ụtọ petẹ poro, ẹ zi wụ, ẹi zaa yi yẹ. 14 Ẹtoore ọni Aizaya re vana sẹ ini ẹngwụ azẹnẹ, ka, 'Ụ vaa wụ nin, ama wa zaa nyi ọyiyẹ nini; Ụ vaa sha irii sha nin, ama ọ zaa nyi isa ọnụ vee re nini. 15 Fụvọki ọtụtụrụma aanini vana kata, ụtọ aanini ọma wụrẹyi, dẹ kụ iri kuoku, doti asẹ si iri aanini retẹ, navẹki ẹ si ụtọ aanini wụrẹyi, navẹki ọtụtụrụma aanini ọ nyi ọyiyẹ, fụvọ de zụ varama ka Oshomoshị, di ma va fụ wa ikụ sha.' 16 Ama, ọda bẹrẹ ọnọvi yi ẹyi awu, fụvọ ki ee re ẹtẹ di ụtọ awụ aa wu irẹyi. 17 Ini Irẹiza, maa kaa yuwu nini ki ọkisẹ ọrụrụ ọnri ẹnẹna mẹ anasẹrẹ ee si ki ene re ẹngwu isa ọnụ wee re nini, ama di ee zi ree Ee si ki ẹnẹ wụ ẹngwu isa ọnụ waa wụ nini, ama dẹ razi wu. 18 Ọmẹyani, batọ tụni ụshioche ọnaarẹ ene ne chire isa ọina. 19 Ọza ana wụrẹyi inọpati ijọva ineeku ọiza, do rezi ye e, di eshu vẹ, dọ va kụ isẹne chire tụni ọtụtụrụma aani. Ọnọni ọnọ vi ọina ene chire tụni ụtọ-oze. 20 Ọina ene chire tụni ẹtẹ irẹta, ọnọ vi ọza ana wụrẹyi ọnọ, dọ dọ ọ rụjẹrụjẹ, 21 tụavọtụavọ, dọ razi nyi ẹpa shiẹtẹ, dọ shavọ ini ẹfi keere. Ụmọni ẹkatẹgwụ ọnri ụya vẹ, fụvọki irẹyi Oshomoshi ọzi dinẹ ininẹ aanini, dẹ varama. 22 Ọina ene chire tụni akaakana ikeyi ọnọ vi ọza ana wụrẹyi Oshomoshi, ama afasha renyi renyi ana yini ẹshẹ ọnri irivene ana yini ogu ọdidụ, ẹẹ za irẹyi Oshomoshi ọnọ mụnẹ, dọ mẹ ki asọ zụ tụ ẹtụtụ. 23 Ọina ene chire tụni ẹtẹ ozoza, ẹnẹ vi ọza ana wụrẹyi Oshomoshi, do ye e. Ọ tụ ẹtụtụ, ẹnyi vi avaavọ oze ẹchẹẹshi, ẹnyi oze ẹbẹrẹta, di ẹnyi vi oze ofụrẹwụ." 24 Di Ijesu zẹ si ụshioche ọsa zụ wa, dọ ka, "Ijọva ineeku ọiza o vene ezene chire ọina ọiza tụni irarẹ aani. 25 Ama, aza mẹ ta sụ inaafụ, di ọnivi nin ve chire ẹtụtụ ẹshimi vafura akụ ono chire, dẹ zi na. 26 Ụmọni akụ ẹnẹ chi, dẹ tụ ẹtụtụ, di avi ẹshimi ẹnẹ aa sha, dẹẹ fụ. 27 Ezida ẹzẹna nyi ẹtẹ ọnọ me ve tu o, dẹ kaa yọ ka, 'Oshi, kẹni ki ọina ọiza ọnụ chire tụni irarẹ awụ? Ọmẹzi di avi ẹshimi chi vafụra a kẹ?' 28 Dọ kaa yụ wa ka, 'Ọnivi ọnọ maan mẹ. Di ezida aani kaa yọ ka, 'Ụwa ki ye ne fu wa kụra kẹ?' 29 Di ọza ọna nyi ẹtẹ ọnọ ka, "Eiye, fụvọki aaviki we fu avi ẹshimi ẹnẹ, u ve zuu fu ana vi akụ bẹrẹ wa. 30 Navọ doti ẹ gẹẹ fụ vaabẹ netu ụmọni mva si kụ isa irarẹ gụ. Ụmẹ re tu ki ma kụ isa rarẹ ami, di ma kaa yi ọmụkọrọ nin ka, "Savọ tụ avi ẹshimi ẹnẹni kụra, pere wa gụ, dụ wa rụ wa ira, ama du we pere ana vi akụ, du we pe mi teni ọ tụni ụfọ ami." 31 Ụmonotu, di Ijesu ze chụshi ọsa zụ wa. Dọ ka, "Ijọva ineeku ọiza o vene ọina imọsitadi ọni ọnọrụ ọnyi si, do chire tụni irarẹ aani. 32 Ọina ọnọ, ono weyi fu ini ọina bo. Ama, ọmẹ chi, dọ si fụ, di ọchi aani bani funa ọchi ọsa nin ana yini irarẹ ọnọ. Dọ vara ọchi ọbani ọni unomi nin vẹ vaa da irẹngwẹ tụni avọchi aani." 33 Di Ijesu ze chụshi ọsa zụ wa ka, "Ijọva ineeku ọiza o vene ọva ọni ọnyẹnẹẹ ọnyi vafura ifụrawa ipa ẹẹta, do sio wu." 34 Isẹnẹni bo vọni Ijesu si ụshioche ka yi azọkọni; ọzi nyi ọnọ ka yụ wa dọ razi vi ini ụshioche. 35 Isẹnẹni ọ maan vi, doti isẹni a bidi ka tẹtẹ zirẹngwụ ọkisẹ nin ọ sẹ, ka, "Mva sharenu ami karẹyi ini ụshioche. Mva karẹyi isa anatẹ fụri ụmẹ ana si si ẹshẹ shiẹtẹ." 36 Ụmonotu, di Ijesu fiini akaakana azọkọni ẹnẹ, dọ ngwụ ireshi. Eziafụ aani ee ve tu o, ḍẹ ka, "Si afu irẹyi ụshioche avi ẹshimi ana yi inaarẹ ọnọ zụ yi". 37 Di Ijesu voshi ̣ka, "Ẹzẹna chire ọina ọiza ọnọ, ọnọvi Ozi Ọza. 38 Irarẹ ọnọ vi ẹshẹ; ọina ọiza ẹnẹ vi ezi ijọva ineeku ọiza. Avi ẹshimi ẹnẹ vi ezi eshụ, 39 ọnivi ene chire wa ọnọ vi eshu. Ọkikụ isararẹ gụ ọnọ vi ọikọọta ẹshẹ; ọmụkọrọ ẹshimi nin, ẹnẹ vi angẹni nini." 40 Fụvavọ, venebiri amẹ pere avi ọsa, da rụ wa ira, avọ ọnọ mẹ vaa vi ini ọikọọta ẹshẹ. 41 Ozi Ọza vaa tụ angẹni aani nin jinẹ, dee ve pere isa bo ana mẹ aichama, ọnri ẹnẹna mẹ ivi fiini ineeku ọiza, 42 dee ne wa ngwụni ira anaa za gidọọ, dẹẹ yi izo, dee sune, dẹẹ kụranyi. 43 Ụmavọ, ẹnẹnaa manasẹrẹ, dẹẹ zira venebiri ọyi ini ijọva Ada aanini. Ẹzẹna ra nyi ụtọ, ọ wụ. 44 Ijọva ineekụ ọiza o vene ogu ana tẹ tụni ẹtẹ. Ọnọrụ ọnyi o re e, dọ siọ tẹ. Ini ụjẹ aani, dọ na na isa ọnọ nyi bo, dọ siọ shi ẹtẹ ọnọ. 45 Ijọva ineeku ọiza o ze vi vene osofu enee si ireweyi ebebaani. 46 Ụmono re ireweyi ebebaani ọ̵nya ana nyi ụbani kokoro, dọ na na isa ọnọ nyi bo, dọ si ẹkẹshi aani shi ọ. 47 Ijọva ineeku ọiza o ze vi vene asha ene ne ngwụni irefu, dọ za isenyi renyi renyi. 48 O me shi, di ozube isenyi ẹnẹ tụra a jinẹ va ngwụni ụtọ-ubobo. Dẹ va yatụ, de pere ozoza aani shi ini isa, ama ene rezi zoza bo vana va sha. 49 Aani ọnọ mẹ vaa vi ini ọikọọta ẹshẹ. Angẹni nin vaa vẹ, dẹẹ va kụ aza ẹshimi fiini aza ọiza. 50 Dee ne wa ngwụni ira anaa za gidọọ, izẹnẹ va yaa jiorere, dẹẹ kụranyi. 51 Irẹyi ọnọni we ye wụ nini da?" Di eziafụ aani zẹẹ ka, "O ye yi da." 52 Di Ijesu va kaa yụ wa ka, "Fụvavọ ọyofi ana ra vara ọziafụ yi ijọva ineeku ọiza da, o vene ọza ana nyi reshi, dọ tụ isa ọkụkụ ọnri isa ọwọọwa jinẹ fụrẹ izẹnọọ kụ ogụ aani tẹ tụ." 53 Ijesu mẹ si ụshioche ẹnẹni zụ wa da, dọ fiizọ. 54 Di Ijesu va ngwụni ọkakooro aani, dọọ zụ aza isa ini Isinagọgụ aanini. Ụvọ ọnọ si zụ wa do shuweeyi, dẹ ka, "Yere izẹni ọza ọnọni dọ ụvira ọnri isa oshishozeyi ẹnẹni fụre ̣kẹ? 55 Aivi ozi ikafinta ọnọ yi? Aivi Imeri ọnọ vi ọnya aani? Aivi Ijemsi, Ijosẹfụ, Isaimọni ọnri Ijudasi ẹnẹ vi ẹnyara aani? 56 Ẹnyara aani anyẹnẹẹ bo wa ra zi yi izọni pe yi? Yere izẹno ye re isẹnẹni bo dọ kẹ?" 57 Di ayi ọ kụ wa tụọ. Ama di Ijesu kaa yụ wa ka, "Ọzi nyi ka ọkisẹ ọ ma nyi ụbani, ọchishi ini irẹkụra aani ọnri ini ovuovụ aani." 58 Ọ zi mụkọrọ oshishozeyi ọrụrụ izọ fụvọki ẹ ̣zi nyi ọdọwụ.