1 Inụmavọ, di Ihẹrọọdụ Itẹtirachi wụ irẹyi Ijesu. 2 Dọ kaa yi ezida aani ka, "Ijọọnụ Ọsami, ọ sha kwẹẹtẹ fiini isu da. Fụvavọ ụkata ẹnẹni aa mụkọrọ ini ẹngwụ aani." 3 Fụvọki Ihẹrọọdụ ọ bidi za Ijọọnụ da, dọ kụ isa shaavọ, dọ siọ tụni ijaarụ fụvọ Ihẹrodiasi, ọna vi ose Ifiripi, ọnyara aani. 4 Ijọọnụ ọ kaa yọ ka, "Ofi ọ zi zẹ kụ wa siọ mẹ ose awụ." 5 Ihẹrọọdụ yaan wụ ọ, ama doo shiangwa aza, fụ̣vọki ẹ za a vene ọkisẹ. 6 Ama, ọ maa mẹ ọtitamayi ọkụshi ana si maa, di ozi ọnyẹnẹ Ihẹrodiasi nyẹzẹ ana ngwụ Ihẹrọọdụ eyi ini akaakana aza. 7 Dọ mẹ otowu, dọ shieku ka ọn vaa si isẹni o ree fi fisue yọ ọ. 8 Ọnya aani mẹ kaa yọ da isẹnọ vaa ka, dọ ka, "Si irẹsụ Ijọọnụ Ọsami tụni ọnyaa va yi mi izọni." 9 Dẹ ẹngwụ oshinọyi si vashi fụvọ isa ono fisue, ama, fụvọki ọ shieku da ini akaakana ẹnenee pe e risa, dọ si ụmọ yụ wa ka ẹ na me ̣ẹ. 10 Dọ tụ ki a na da Ijọọnụ irẹsu ini ijaaru. 11 Dẹ si irẹsụ aani tụni ọnyaa yi ozi ọnyẹnẹ ọnọ, dọ si ọ ne tu ọnyi aani. 12 Di eziafụ aani va si oku aani ne ne. Ẹ mẹ maan mẹ da, dẹ na kaa yi Ijesu. 13 Ijesu mẹ wụ da, dọ ngwụ ẹpa fiizọ nangwụ irasha ana jomi. Azọkọni mẹ wụ, dẹ si ụfụụfụ vatụra a fiini irẹkụra ọnọ. 14 Ijesu ọ vẹ ve tu wa, do re azọkọni ẹnẹ. Ọ nyi ayụva yụ wa, dọ fụ ẹnẹni ẹngwụ aa zi ikụ sha. 15 Oruva me tu, di eziafụ aani ve tu o, dẹ ka, "Izọni vi irasha ọni aza ra zi ya, ẹfi ọ si zina. Kaa yi azọkọni ẹnẹni ki ẹẹ na, doti e zu re isari shi ini irẹkụra ana gụrẹ wa." 16 Ama di Ijesu kaa yụ wa ka, "Ọ zi vọrọ ka ẹ na. Si isari yụ wa dẹ riọ." 17 Dẹ kaa yọ ka, "Yaa nyi ivụrẹdi ẹshi, ọnri isenyi ẹẹva." 18 Di Ijesu ka, "kụọ va yi mi." 19 Di Ijesu kaa yi azọkọni ẹnẹ ka ẹ yatụ tụni avi. Dọ si ivụrẹdi ẹshi ọnri isenyi ẹẹva ẹnẹ, do veyi shirẹ, do kụ Oshomoshi avọ, dọ da ivụrẹdi ẹnẹ, dọ siọ yi eziafụ aani, di eziafụ aani gaa yi azọkọni ẹnẹ. 20 Ẹnbo ẹ risa, di inẹ aanini shii. Dẹ kụ isari ana vẹtẹ, dẹ kụọ shi ụji ẹwụrẹva, do shii. 21 Ẹnẹna risa vi ọpati anẹrụ akashi oze ẹshi. Azẹzi za anyẹnẹ ọnri ezieweyi ika bẹrẹ wa. 22 Ụmụmọ dọ kaa yi eziafụ aani ki ẹngwụni ẹpa, dẹ dọvidi aani na ngwụni aka ọsa, dọ kaa yi azọkọni ẹnẹ ki ẹẹ na. 23 Ọ mẹ kaa yi azọkọni ẹnẹ da ki ẹẹ na, di ọn renya shirẹ nọ inẹẹsụfa na tụozurenu. Dọ yiizọ nangwụ oruva. 24 Ụmavọ, di ashi aa kụ, dọ si ẹpa aanini vaashirẹ vaachi ini akaakana irefu, ẹmẹ si zi gọdọ fiini ụtọ-ubobo. 25 Ini ajuveini, di Ijesu aa zụse inẹẹsụ enyi nee tu wa. 26 Eziafụ aani me re ki ọọ zụsẹ inẹẹsụ enyi, di irẹgashi ngwụ wa ẹngwụ, de nowu tụẹshẹ ini angwashi ka, "Arijẹnụ bẹdọ vaa yọ." 27 Ụmụmọ di Ijesu kaa yụ wa ka, "Nyi ọtụtụrụma nini, ẹmi yọ, asu shiangwa nini!." 28 Ipita o tụoshi, dọ ka, "Ananyimi, aaviki ẹwụ yọ, si ụmọ kaa yi mi ki ma zụsẹ inẹẹsụ enyi ve tu wu." 29 Di Ijesu ka, "Waa vẹ." Di Ipita jinẹ fiini ẹpa, dọ zụsẹ inẹẹsụ enyi nee tu Ijesu. 30 Ama Ipita me re ashi anaa kụ, di angwashi ngwụọ ẹngwụ. Ụmọnọ, dọ vẹrẹ aa ngwụni enyi na, do ve nowu tụẹshẹ ka, "Ananyimi, dọ mi tụ!" 31 Ụmụmọ, di Ijesu tanụvọ yi Ipita, do tura a jinẹ vẹ, dọ va kaa yọ ka, "Ẹwụ ana nyi ọdọwụ oweyi, sẹnẹvẹ dụ waa sha ayi ẹvẹẹva kẹ? 32 Ụmọni Ijesu ọnri Ipita ngwụni ẹpa, di ashi anaa kụ za dinẹ. 33 Di eziafụ Ijesu ana yini ẹpa nyima irẹsu yọ, dẹ ka, "Inirẹiza, Ozi Oshomoshi ọnụụ vi." 34 Ẹ mẹ jinẹ fiini enyi ọnọ da, dẹ na ngwụni irẹkụra Igẹnẹsarẹti. 35 Aza ana yi izọ me re Ijesu, dẹ yẹ ẹ, dẹ tụ itụ n ọ rasha bo ana varakara wa, dẹ si ẹnẹ ngwụọzi bo vetu o. 36 Dẹ dipẹ yọ ka, ọ navọ doti ẹnẹ sụvọ kani ụtọ auru aani kẹnẹ; ẹmẹ ya ana kani ọ, vọni ẹngwụ aanini ni.