Imatiu 21

1 Ijesu ọnri eziafụ aani maa kavape Ijerụsanẹmụ, de tu Ibẹtifage ọgụrẹ Irẹsụfa Onivi, inaani di Ijesu tụ eziafụ aani ẹẹva itụ, 2 dọ kaa yụ wa ka, "Wa nọ irẹkụra ana gụrẹyi nini, waa ngwụ izọ kẹne, u vee re ikẹtẹkẹtẹ ana za chire tụzọ bẹrẹ ozi aanị. Ngwara wa, dụ wa za wa ve tu mi. 3 Aaviki ọ nyi ọzẹna karẹyi shi wụ nin inọpati aani, dụ wa kaa yọ ka, "Ananyiyi o si wa onino," ụmụmọ ọzọnọ vaa navọ ki wa kụ wa ve tu mi nin." 4 Isẹnẹni vana mẹ fụvọ di irẹyi ana ka tẹtẹ zirẹngwụ ọkisẹ ọ zu gẹ. 5 "Kaa yi ozi Izayọni ọnyẹnẹ ka, "Re, oshinọyi awụ nini aa vẹ vee tu wu nin, ọza ana vẹngwụ shiẹtẹ, ọ shirẹ ozi ikẹtẹkẹtẹ."' 6 Inaani di eziafụ aani na mi isa ọni Ijesu kẹ mẹ. 7 Dẹ si ikẹtẹkẹtẹ ọnri ozi aani, dẹ tụ aụrụ aanini tụra wa, di Ijesu shirẹ tura. 8 Ẹrụrụ ini azọkọni, de tụ ita aanini tụ noze, di aza ẹnyi ji avọ ọchi, dẹ tụọ tuni oze. 9 Di azọkọni ana yi inọvidi ọnri irama, dee nowu ka,"Hosanna! Ozi Idevidi! Ẹdabẹrẹ ọnọvi yi ọza ana vẹ ini irẹsha Ananyiyi! Hosanna ini ẹbẹẹba keekere!" 10 Ijesu mẹ ngwụ Ijerụsanẹmụ da, di irẹkụra boo sheni. Dẹ ka, "Ẹnẹvi ọza ọnọni kẹ?" 11 Di azọkọni voshi ka "Ijesu ọkisẹ fụri Inazarẹti ana yi Iganini yọ." 12 Umẹ ọnọ ngwụni itẹmpụrụ, dọ dụ aza ana sofụ ini ireshi Oshomoshi jinẹ. Dọ tụ itevụrụ ene ye che ẹkẹshi ụvọ vakụ, shi irẹfu ̣ẹnẹ yaa na onekuku. 13 Dọ ka yụ wa ka, "A chẹrẹẹ ka, "A vaa shi ireshi ami, ireshi ana yaa tụozurenu, ama dụ vara a tụni ireshi oyi nini." 14 Inaani, oguri ọnri osụafụ nini, ee ve tu o ini itẹmpụrụ, dọ fụ wa ikụ sha. 15 Ụmọni oshirẹsụ arụfa nini ọnri ọyofi nin re ụkọrọ oshishozeyi ọni Ijesu mẹ, ọnri ụmẹ ẹnẹ wụ ki ezieweyi nin ee nowu ini itẹmpụrụ ka, "Hosanna yi ozi Idevidi," di ayi kụ wa. 16 Dẹ ka yi Ijesu ka, "Ụ wa wụ irẹyi ọni azẹnẹ aa ka?" Di Ijesu kaa yụ wa ka, "Ẹẹn! U we rezi re ka ini iwe ọnini nin ka, "Fiini irenu ezieweyi ọnri ezinụvọ nin, ọni ụga va yia vi ọgụgụrigụ'?" 17 Dọ fụri ida aanini, dọ nọ irẹkụra Ibẹtani, dọ na sụ izọ. 18 Ini ọnẹnẹ, Ijesu mẹ varama nọ Ijerụsanẹmụ di ụngwẹ aa kụ ọ. 19 O re ọchi ifigi ọnya inoze. Ọ mẹ gụrẹ ọchi ọnọ, o zi re ẹtụtụ ọnyọnyi ini inẹẹsụ aani, ọchishi avi renya. Dọ kaa yọ ka. "Wai kụ zụa tụẹtụtụ poro; ụmụmọ, di ọchi ọnọ wẹngwụani. 20 Eziafụ aani me re e, do shuweeyi, dẹ ka, "Ọchi ọnọni mẹ mẹ dinẹ si wẹngwụani kẹ?" 21 Di Ijesu voshi ka, "Irẹiza ma ka yụ wụ nin, wa nyi ọdọwụ, dụ razi sha ayi ẹvẹẹva nin, ọzi vi isa ana mẹ shi ọchi ọnọni kẹnẹ ọnụ vaa mẹ nin, ama ụ va zụ kaa yi irẹsụfa ka, 'Fụ kwẹẹtẹ we zina na ngwụni irefu,' dọ vi ọmimẹ. 22 Isa ọnụ re fisụe ini ozurenu awụ, dụụ nyi ọdọwụ, u ve re e dọ." 23 Ijesu mẹ ngwụni itẹmpụrụ, di oshirẹsụ arụfa nini ọnri azẹkụ azẹnẹ ve tu o, ọ maa zụ aza isa, dẹ ka, "Yere ụmọ ọnụ waa sii mẹ isẹnẹni ọnri ka ẹnẹ si ọ yụ wụ?" 24 Di Ijesu voshi, dọ kaa yụ wa, ka, "Ẹmi zẹ va fọ wụ nin ipẹpẹẹ ọnya. Aaviki wa voshi aani yi mi, mva kaa yụ wụ nin ụmọ ọni maa si mẹ isẹnẹni. 25 Izi isami ọi Ijọọnụ, fụrẹ vẹ kẹ? Fiineeku wa yọ, navẹki fiidi anẹshẹ? Dẹ va kue pe ẹngwụ kaa ka, "Aaviki ya kaa ka, fiineeku yọ, ọ va fọ yi ka, ‘Sẹnẹvẹ dụ razi va dọọwụ nin kẹ?' 26 "Ama aaviki ya kaa ka, Fiidi anẹshẹ yọ, yee shiangwa azọkọni," fuvoki ẹnbo vene re Ijọọnụ vene ọkisẹ." 27 Dẹ voshi yi Ijesu ka, "Ya zi yẹ." Dọ zẹ kaa yụ wa ka, "Ẹmi nyẹmbẹ ma zaa kaa yụ wụ nin ụmọ ọni maa si mẹ isẹnẹni." 28 Ama, sẹnẹ ẹwụ nin ro? Ọnọrụ ọnyi ọ nyi ezi anẹrụ ẹẹva. Do ne tu ọnipaapa dọ ka, 'Ozi, na mụkọrọ ini ụbazi ami irajini.' 29 Di ozi aani voshi ka, "Ma zaa nọ, ama ụmotụ dọ vara ọtụtụrụma aani, dọ na mụkọrọ ọnọ. 30 Ọnọrụ ọnọ ọ tụ ozi aani ọfụva, dọ zẹ karẹyi ọnyọnya yọ. Di ozi ọnọ voshi ka, "Adami, mva nọ," ama dọ razi va nọ. 31 Ini ezianẹrụ ẹviva ẹnẹ, yere ana mẹ osisi ada aani kẹ?" Dẹ voshi ka, "Ọzi ipaapa." Di Ijesu kaa yụ wa ka, "Inirẹiza, maa kaa yụ wụ nin, ọdimana ọnri ọsẹrẹka nini vaa ngwụni Ijọva Oshomoshi tụ wụ nini. 32 Fụvọki Ijọọnụ ọ vẹ tụ inoze ana vọrọ, ama wa zi dọọwụ nini. Ama idọdimana ọnri ọsẹrẹka nini dọọwụ. Shi ume ri re isẹnẹni nin, we zi rinẹ varama, wai zẹ di dọọwụ nini. 33 Batọ tụni ụshioche ọsa nini. Ọ nyi ọnọrụ ọnyi ana nyi ẹtẹ. Dọ da ụbazi, dọ fọva kara, dọ chi okoro, izẹna yaa kwọrọ ẹtụtụ eche. Dọ da ireshi oserẹtẹ, dọ si ụbazi ọnọ chire ọkụrarẹ nini ụvọ. Dọ jinẹ nọ irẹkụravabẹ ọsa. 34 Ẹfi ọna sii fa ẹtụtụ maa gụrẹtẹ, dọ tụ ezida ẹnyi ne tu ọkụrarẹ ẹnẹ ka ẹna dọ ẹtụtụ awụọni vẹ. 35 Ama di ọkụrarẹ ẹnẹ za ezida ẹnẹ, de tu ọnya, dẹ wụ ọsa; de ne ọsa akụkụ. 36 Dọ zẹ tụ ezida aani ọsa ana rụrụ fụna ọi ipaapa, di ọkụrarẹ ẹnẹ si ụya rụ wa vene ọi ipaapa nin. 37 Inama aani, di ọza ọna nyẹtẹ ọnọ tụ ozi aani ụvọta na, dọ ka, 'Ẹ vaa si ụbani yi ozi ami.' 38 Ama, ọkụrarẹ ẹnẹ me re ozi aani ọnọ, dẹ geyi, dẹ ka, ‘Ozi ọnọni ọnọ vaa kụ ogu ada aani. A navọ di ya wụ ọ, di ya si ogu aani vara ayayi. 39 Di ọkụrarẹ ẹnẹ si ọ nọ ini irama ụbazi, dẹ wụ ọ. 40 Ụmọni̇ ọnọrụ ana nyi ụbazi ra vẹ, sẹnụ ro ki ọ va sii mẹ ọkụrarẹ ẹnẹ kẹ?" 41 Dẹ kaa yi Ijesu ka, "Ọ vaa wụ azẹshimi ẹnẹ bo vasha, dọ si ụbazi ọnọ yi ọkụrarẹ ọsa nin, ana vaa si ẹtụtụ ana vi ayaani yọ, ẹfi re tu." 42 Di Ijesu kaa yụ wa ka, "Ọnọviki we zi ri ree ka ini iwe ọnini nin ka, 'Irẹta ọni ọtụrireshi nini yi tẹtẹ, ọsi vara oboro irẹta ana nyi ụbani tụni ireshi.' Ananyiyi ọnọ vọ vọ mẹ, dọ vi oshishozeyi. 43 Fụvavọ, ma kaa yụ wụ nin ka, ijọva Oshomoshi vana vaa dọọ fiini ụvọ awụ nini, da si ọ yi irẹkụravabẹ ọsa ana vaa tụ ẹtụtụ. 44 Ọzatụrọza ene re zina nya irẹta ọnọni, vana vaa sẹ ripiripi. Ama, ọzatụrọza ọni irẹta ọnọ re zina nya, vọnọ vaa kwọrọ vaasha. 45 Ụmọni arụfa ọbani nin ọnri ifarisi nini wụ ụshioche ẹnẹ, dẹ yẹ ka ẹni ọnọ karẹyi shi. 46 Dee ve bee ki ẹnẹ za a, ama dee shiangwa azọkọni ana gụ, fụvọki aza vana si ọ vene ọkisẹ.