Imatiu 22

1 Di Ijesu zẹ karẹyi yụ wa ini ụshioche ka, 2 "Ijọva ineeku o vene oshinọyi ọnyi, ana kụẹnya upe ọnyi nyi ọnẹẹ yi ozi aani. 3 Dọ tụ ezida aani ki ẹ na shi ẹnẹna tụshi ki ẹ vẹ ini upe ọnọ, ama dẹ razi vẹ." 4 Di oshinọyi ọnọ zẹ varama tụ ezida aani ọsa, ka, 'Kaa yi ẹnẹna si iwe shi ka, "Re, ma mẹ isari tẹtẹ da. Maa zẹ wi wụ ụnọ ọrụrụ tẹtẹ ọnri ki maa mẹ isa anavọ bo da. Vee pe mi rupe nini.'" 5 Ama ẹ zi shọ irẹyi, dẹ zi na; ọnyi ọ si zi oze irarẹ aani, di ọsa si zi oze ofu aani. 6 Di ẹnẹnavọ za ezida ẹnẹ, dẹ mụya rụ wa, dẹ mụshi nyi wa, dẹ wụ wa. 7 Di ayikụ oshinọyi ọnọ, dọ va tụ ashoja aani, dẹ na wụ ọwụọza ẹnẹ, dẹ ri irẹkụra aanini ira. 8 Inaani, dọ kaa yi ezida aani ka, "Ẹfi ọnyi-nyi ọnẹẹ o tu da, ama ẹnẹna tụshi ẹ zi bẹri. 9 Fụvavọ, wa nọ ini oze ọbani, izẹni oze ya gẹ bo, dụ wa na shi ẹzẹnụ re re, ki e ve pe mi rupe. 10 Di ezida aani jinẹ nọ ini oze ọbani, de pere aza ene re gụ, shi aza ọiza, shi ọshimi. Di ireshi ẹnẹ yaa rupe ọnọ shi yi aza. 11 Ụmọni oshinọyi ngwụ ireshi ọni azẹga nin yatụ shi, do re ọnọrụ ọnyi izọ ana razi kụẹnya ana sii siọnẹẹ. 12 Di oshinọyi va kaa yọ ka, 'Ọtami, u me re dụ ngwụ izọnaani vẹ, du razi kụẹnya ana si siọnẹẹ kẹ?' Ama di ọnọrụ ọnọ rai zụ voshi. 13 Inaani, di oshinọyi kaa yi ezida aani ka, 'Sụ ọnọrụ ọnọni rafụ rụvọ, du we ne e jinẹ ngwụni oozi rim rim, izẹna yaa jorere, daa kụra anyi.' 14 Fụvọki aza ẹrụrụ ana shi, ama aza che ana nii. 15 Di Ifarisi nini na shọma ẹ mẹmẹ vee re Ijesu za ini rẹyi aani. 16 Dẹ tụ eziafụ aanini beri aza Ihẹrọdụ nin ne tu Ijesu. Dẹ ka, "Ọzụọzisa, yaa yẹ ki ọni irẹiza ọnụụ vi, dụ waa zụ aza oze irẹiza Oshomoshi. We me si ki ọza ọ ji zụ wụ ọnri ki wa ma ni ọza remeyi inakaakana aza. 17 Kaa yi yi isẹnu ro. Ọ wa vọrọ ki yee si imaana yi Isiza navẹki ọzi vọrọ?" 18 Ama Ijesu ọ yẹ isọshimi enee ro, dọ kaa yụ wa ka, "Sẹnẹvẹ dụ wa mọmire re nin kẹ, ẹwụ nin ọjọzavene? 19 Ẹkẹshi imaana ọnụ dọ nin, si ọ zụ mi." Dẹ va tụ idẹnariọsi tụ ẹshẹ zụ ọ. 20 Di Ijesu fọ wa ka, "Ẹnẹ nyi ụmọma ọnri irẹsha ọnọni?" 21 Dẹ voshi ka, "Isiza yọ." Di Ijesu kaa yụ wa ka, "Si isa ana vi ayi Isiza yi Isiza, dụ wa si ayi Oshomoshi yi Oshomoshi." 22 Ụmọni ẹ maan wu, do shuweeyi. Inaani, dẹ fiida aani, dẹ na. 23 Ini ọkụshi ọnọ di Isadụsi ẹnyi, ana kaa ki ọshisa kwẹẹtẹ ọzi yi naani, ve tu o. Dẹ fọ ọ ka, 24 "Ọzụọzisa, Imosisi ọ kaa yi yi ka, 'Ọnọrụ re su dọ razi ma ozi, ọnyara aani ọnọrụ vaa kụ ose aani ogu doti ọ zụ ma ozi yi ọnyara aani." 25 Ọ nyi ẹnyara ishimba, di ọi ipaapa nyi ọnẹẹ, dọ va nyi ki o osu, ama dọ razi ma ozi, di ọfụụva kụọ ogu. 26 Avọ ọni ọfụụva ọnri ọfụụta, pooro nangwụ ọfụ-shimba mẹ ya. 27 Inama aani, di ọnyẹnẹ ọnọ ve su. 28 Ini ụmẹ ọshisha kwẹẹtẹ, ẹni ọnyẹnẹ ọnọ vaa vi ose aani ini ẹni ishimba ẹnẹ." 29 Di Ijesu voshi yụ wa ka, "We nyeeyi nin da, fụvọki wa zi yi iwe ọnini ọnri ụkata Oshomoshi nin." 30 Fụvọki inọpati ọshisha kwẹẹtẹ, ẹ ma nyiọnẹẹ navẹki ọva. Akikọnọ, ẹ si mẹi angẹni ineeku. 31 Inọpati ọshisha kwẹẹtẹ fiini isu, ọnọviki we zi ri re ka, ini isọni Oshomoshi ka yụ wụ nini ka, 32 "Ẹmi ọnọ vi Oshomoshi Abrahamụ, Oshomoshi Aiziki ọnri Oshomoshi Ijakọbụ nini. Oshomoshi ọzi vi Oshomoshi ẹnene su, ama Oshomoshi ẹnẹna yinaani." 33 Ụmọni azọkọni wụ ọnọni, di isa ọnọ zụ wa shuweeyi. 34 Ụmọni Ifarisi nin wụ ka Isadusi nini ezi re oshi va yi Ijesu, de pere ẹngwụ gụ. 35 Ọzọnya inaanini ana vi ọyofi, dọ fọ ọ ipẹpẹẹ ọnọ si zama re, ka, 36 "Ọzụọzisa, yere ụmọ ene fu keekere ini ofi kẹ?" 37 Di Ijesu kaa yọ ka, "Si ọtụtụrụma awụ bo sirẹyi Oshomoshi Ananyiyi, vabẹri ifẹ awụ ọnri inẹ awụ." 38 Ọnọni ọnọ vi ụmọ ipaapa, ọni ono ze fi fu. 39 Ụmọ ọfụụva, o vene ọi ipaapa, "Sirẹyi ọnọfụụva awụ vene ụmẹ sirẹyi ẹngwụ awụ. 40 Inẹẹsụ ụmọ ẹviva ọnọni, ọni ụmọ bo ọnri ọkise nin dinẹ tụ." 41 Umonotu, Ifarisi nin me pi pere gụ, di Ijesu fọ wa ipẹpẹẹ. 42 Dọ ka, "Sẹnụ ro inọpati Ikristi nin kẹ?" Yere ozi ẹzẹnọ vi kẹ? Dẹ voshi ka, "Ozi Idevidi." 43 Di Ijesu kaa yụ wa ka, "Ọmẹzi di Idevidi ini ifẹ shi Ananyiyi ka, 44 'Ananyiyi ọ kaa yi Ọnanyimi ka, "Yatụ tụni ụvọri ami, ne tu ki ma mẹ ọnivi awụ izẹnụ vaa kụ afụ shi?'" 45 Aaviki Idevidi ọ shi Ikristi 'Ananyimi,' ọmẹ va si vi ozi Idevidi?" 46 Ọzi nyi ẹzẹna zụ voshi irẹyi ọnọ ọnri ki fụri ẹfiavọ ọi kụ nyi ẹzẹna zai fọ ipẹpẹẹ tụọ.