1 Ijọva ineeku o vene ọnaarẹ ana kwẹẹtẹ ini ọnẹnẹ viriviri, do ne si ọnụkọrọ, ana vaa mụkọrọ ini ụbazi aani. 2 Ẹ mẹ gẹ sẹ ofu yi ẹngwụ, dọ gẹrẹngwụ yụ wa ka, ọn ve si ọzọnyọnya aanini Idẹnariọsi ọnya ini irẹkụshi; dọ ka ẹ ngwụni ụbazi awụọni. 3 Ọ varama jinẹ inọpati iwakati ọfụta, do ze re ọnụkọrọ ọsa ana vọọ dinẹ kẹnẹ ini ofu. 4 Dọ kaa yụ wa ka, "Ẹwụ nin ọ zẹ ngwụni ụbazi ami, dụ wa na mụkọrọ nin kim vee si isẹnẹ ra sẹrẹ yụ wụ nini. "Dẹ va na vẹrẹ ụkọrọ. 5 Ọ zẹ jinẹ inọpati iwakati ishinọnyi ọnri iwakati ishinna dọ viki isọnyọnya ọnọ mẹ. 6 Ini ụpọnya tụọ, inọpati iwakati ẹwụrọnya, ọọ zẹ jinẹ tụra, do re ọnụkọrọ ọsa nin ana zẹ dinẹ kẹnẹ. Dọ kaa yụ wa ka, 'Sẹnẹvẹ dụ dinẹ kẹnẹ nin, dọ razi nyi ọnụ waa mẹ nini fụrọnẹnẹ?' 7 Dẹ kaa yọ ka, "Fụvọki ọzi nyi ọzọnyọnyi ana shi yi na mụkọrọ." Dọ kaa yụ wa ka, "Ẹwu nin ọ zẹ ngwụni ụbazi, dụ wa na mụkọrọ nin." 8 Oruva me tu, di ọza ana nyi ụbazi kaa yi ọga ọnụkọrọ aani ka, "Shi ọnụkọrọ ẹnẹ, du we si wa ụta, vẹrẹ fiini ene keke nangwụ ọi ipaapa." 9 Ụmọni ọnụkọrọ ana dọ ini iwakati ẹwụrọnya vẹ, de si wa idẹnariọsi ọnya, ọnya. 10 Ụmọni ọnụkọrọ ipaapa nin vẹ, de ro ka ẹni vaa dọọ funavọ. Ama, dọviki idẹnariọsi ọnya ọni ọzọnyọnya aanini dọ. 11 Ẹfi ene si wa ụta da, dẹẹ rifufu, de ne tu ọzẹna nyi ụbazi. 12 Dẹ ka, 'Iwakati ọnya ọni ọnụkọrọ ana vẹ keke si mụkọrọ, ama we si ẹyi rụ wa ụta ẹbẹbẹ, ẹyi ọnọ vi ki ya mụkọrọ fu, dii vana yini ọyi fụrọnẹnẹ.' 13 Di ọzẹna nyi ụbazi ọnọ tụoshi, dọ kaa yi ọzọnya ini aanini ka, "Ọtami, ọzi nyi isa ọshimi ọnim mẹ ka wụ vẹ. Ụ wa razi zẹ mi ka ụ vaa dọ idẹnariọsi ọnyạ?" 14 Dọ isẹnẹ ra vi ayawụ, dụ wa si zi oze awụ. Ẹmi ono zeyi ki mvee si anụkọrọ ene keke vẹ ụta ọnyọnya ọnim si yụ wụ nin. 15 Navẹki ma zi nyi ụmọ ki me no isa ọnim nyi ome zemeyi? Navẹki ụ waa kụshini nin fụvọ ki ma shụvọsha.’ 16 Avọ ọnọ mẹ vi vi; onekeke vaa vi ọnipaapa, di ọnipaapa vi onekeke." 17 Ijesu mẹ aa shirẹ nọ Ijerụsanẹmụ, dọ shi eziafụ aani ẹwụrẹva tụoboka ẹ maa na inoze, dọ kaa yụ wa ka, 18 Re, ya shirẹ aa nọ Ijerụsanẹmụ, a vaa si Ozi Ọza chire oshirẹsụ arụfa ọnri ọyofi nini ụvọ." Ẹ vaa jivi is yọ; 19 dẹẹ va siọ chire anarimadọwụ nini ụvọ kẹ mẹ isiya, dẹ nya ijampa, dẹ wụọ ini ọchi-avashi. Ama ini ọkụshi ọfụụta, a vaa shaa kwẹẹtẹ". 20 Inaani, di ọnyi ezi Izebede ọnri ezi anẹrụ aani ve tu Ijesu. O nyimarẹsụ yọ, do fisue isa fiini ụvọ aani. 21 Di Ijesu fọ ọ ka, "Sẹnẹ ya wụ ọtụtụrụma ọnụ wee si?" Do tụoshi ka,"Si ụmọ kaa ki ezi anẹrụ ami ẹviva ẹnẹni, ki ẹ zụ yatụ ini ijọva ineeku awụ; ọnya inụvọọri, ọsa inụvọọfa." 22 Ama di Ijesu tụoshi ka, "Wa zi yẹ isa ọnụ wee fisue aani? U we ve zu fu fiini ipa ọnim ve yee fu ọmẹyani nin?" Dẹ kaa yọ ka, "Ii ve zu fu o." 23 Dọ kaa yụ wa ka, "Maa vana yẹ ka u vee zuu fu fiini ipa ami. Ama ini kụ wa yatụ tụni ụvọọri ọnri ụvọọfa ami, ọzi vi ẹmi ọnọ vaa mẹ ọnọ, fụvọki Adami o teni ọ tẹtẹ da yi ẹnẹnọ va siọ yi." 24 Ụmọni eziafụ aani ẹẹwụ anavọ wụ irẹyi ọnọ, dẹ mọikụ kokoro shi ẹnyara ẹviva ẹnẹ. 25 Ama, di Ijesu shi wa pe ẹngwụ, dọ ka, "Waa yẹ nin ka ọdọvidi anarimadọwụ nini vanaa si ụkata kụ wa zi, di azẹbani aanini a mẹ ụmọ tụra wa irẹsụ. 26 Ama ọzi bẹdọ vọvọ ya ini akaakana awụ nini. Akikọnọ, ọzatụrọza ene re si ki ọnọ nyi ụbani ini akaakana awụ nin vọnọ vọrọ ka ọ vi ozida awụ nini, 27 ọnri ki ọzatụrọza ene re si ki ọnọ vi ọdọvidi ini akaakana awụ nin, bẹdọ vi ozida awụ nini. 28 Venebiri Ozi Ọza mẹ razi vẹ ki a va mẹ ozida yi ọni, ama ọ vẹ ki ọnọ va mẹ ozida, doti ọnọ si ẹshẹ awụọni dudi ẹshẹ aza ẹrụrụ. 29 Ẹmẹ jinẹ fụri Ijẹriko, di azọkọni vatụra a. 30 Ọ nyi ogurii ẹẹva ana yatụ tụni ụtoze. Ẹmẹ wụ ki Ijesu aa parafụ, de nowu ka, "Ananyiyi, Ozi Idevidi, nyi ayụva yi yi." 31 Di azọkọni ẹnẹ aa tụ wa ofụvọ ka ẹ navọkụ. Ama, dee nowu fụavọ ka, "Ananyiyi, Ozi Idevidi, nyi ayụva yi yi." 32 Umavọ di Ijesu pẹkafụ, dọ shụ wa, dọ fọ wa ka, "Sẹnu we si ki ma mẹ yụ wụ nini?" 33 Dẹ kaa yọ ka, "Ananyiyi, yee si ki yee retẹ." 34 Inaani, di Ijesu nyi ayụva yụ wa, dọ si ụvọ kani iri aanini. Ụmụmọ, dẹ vẹrẹ ee retẹ, dẹ vatụra wa.