1 Ijesu mẹ karẹyi ẹnẹni da, dọ fụri Iganini na ngwụ ọkakooro Ijudiya ana yi akajinẹ okufa Ijọdani. 2 Azọkọni ẹ vatụra a, dọ fụ wa ikụ sha. 3 Ifarisi nini e ve tu o, dẹ mọọre, dẹ kaa yọ ka, "Ọ wa vọrọ ka ọza o yi ose aani, dọọ da iwe yọ ka ọnọ zi kụ nyi?" 4 Di Ijesu voshi ka, "Ụ we rezi re ka ki, ọza ana mẹ wa fiini ivẹrẹ ọ mẹ wa ọnọrụ ọnri ọnyẹnẹ?" 5 Ọzẹna mẹ wa vana kaa ka, 'Fụvọ ọnọni ọni ọnọrụ vaa navọ ada bẹrẹ ọnyi aani, dọọ na vabẹrẹ ose aani, di ẹnẹviva si vi ọnya ini ụpẹngwụ?' 6 Fụvavọ ẹi kụa vi ẹẹva, ama dẹ si vara ọnya ini ụpẹngwụ. Fụvavọ, isẹni Oshomoshi ra za vaabẹ da, a sọ nyi ọzẹna sha wa shi." 7 Dẹ kaa yọ ka, "Sẹnẹve di Imosisi si ụmọ yi yi ki ya da iwe yi ose ayi, doti ya zẹ dụ wa na kẹ?" 8 Di Ijesu kaa yụ wa ka, "fụvọ ọtụtụrụma ọkata ọnụ nyi nin ọnọ mẹ ki Imosisi ọ kaa yụ wụ nini ka, u ve zuu yi ose awụ nin, ama ọzi vi avọ ọmẹ vi fini ivẹrẹ. 9 Maa kaa yụ wụ nin ka, ọza ene re yi ose aani, dọ razi vi fụvọ irẹka ọsisẹ, dọ na si ọnẹẹ ọsa, vana sẹrẹka; ọnọrụ ọna ra zẹ na si ọnẹẹ ene yi tẹtẹ, vana zẹ si sẹrẹkạ." 10 Di eziafụ Ijesu kaa yọ ka, "Aavika avọ ọmẹ vi yi ọnọrụ ọnri ose aani, ozi zoza ki ọza ọ nyi ọnẹẹ. 11 Ama di Ijesu kaa yụ wa ka, "Ọzi vi aza bo ẹnẹ va zụụ dọ ọzizụ ọnọni, ọchishi ẹnẹna si oze yi, ẹnẹ va zụụ dọ. 12 Fụvọka ọ nyi osụretụ ẹna vọvọ ya fi ininẹ ọnya aanini vẹ, ama dọ nyi osụretụ ẹnyi, ọnọ vika aza ẹnẹ vọvọ mẹ wa, dọ zẹ nyi ẹnẹna mẹngwa aanini osụretụ fụvọ ijọva ineeku. Ọza ana ra zụ dọ ọzizụ ọnọni, navọ doti ọ dọ ọ." 13 Ụmavọ da ku ezieweyi vetu o doti ọ sụvọ tụra wa, do tụozurenu yụ wa, ama di eziafụ aani ee du wa ẹngwụ. 14 Di Ijesu ka, "Navọ di ezieweyi ẹnẹni ẹ vẹ idami, asa jiwa-oze, fụvọki ijọva ineeku vi ayaanini." 15 Ọmẹ sụvọ tụra ezi ẹnẹ da, dọ fiizọ, dọọ na. 16 Re, ọnọrụ ọnyi o vetu Ijesu, dọ kaa yọ ka, "Ọzụọzisa, yere isa ọiza onim bẹdọ vaa mẹ doti ma nyi ẹshẹ poro pooro?" 17 Di Ijesu kaa yọ ka, "Ọmẹ zi dụ fọ mi inọpati isene zoza? Isa ọnya kẹnẹ ono zoza, ama, aaviki wee si kụ wa ngwụni ẹshẹ poro pooro, waa si ụmọ aani mụkọrọ." 18 Di ọnọrụ ọnọ ka, "Yere ụmọ ọnọ vi?" Di Ijesu kaa yọ ka,"Asụụ wụ ọza, asụụ sẹrẹka, asụụ yuyi, asụụ divenu apinẹ, 19 si ụbani yi ada awụ ọnri ọnyi awụ, sirẹyi ọzọfụụva awụ vene ẹngwụ awụ." 20 Di ọnọrụ ọnọ kaa yọ ka, "Isẹnẹni bo vọnim vatụra. Sẹnẹ kụ vọ mi kẹ?" 21 Di Ijesu kaa yọ ka, "Aaviki wee si kụ wavi ọgụgụrigụ, na dụ wa na na ogu ọnụ ra nyi, doti wa gaa yi oniriwa nini, ụ vaa nyi ogu ineeku; dụ wa va vatụra mi." 22 Ama, ọmụsha ọnọ mẹ wụ isẹni Ijesu ka, dọ si ayiodụ fiizọ, fụvọki ọ nyi ogu ọrụrụ. 23 Di Ijesu kaa yi eziafụ aani ka, "Irẹiza ọni maa ka yụ wụ, ọ vaa ngwụẹngwụ ka ọpisa nin ẹ ngwụni ijọva ineeku ọiza. 24 Di me ze teni kaa yụ wụ nin, ka, Ọ rẹngwụ yi irankụmi ka ọ zi iri ọrishi jinẹ funa ki opisa nin ẹ ngwụni ijọva Oshomoshi." 25 Eziafụ aani mẹ wụ, dọ vi isẹne shuweeyi, dẹ ka, "Yere ẹzẹna va zụ dọọtụ aavọ kẹ? 26 Ijesu o re wa, dọ ka, "Aa si tụni ayi aza, ọzi vi isa ana va zụụ mẹ, ama aa si tụni ayi Oshomoshi, isa bo vi ọvivimimẹ." 27 Ụmavo, di Ipita voshi, dọ kaa yọ ka,"Re, ya navọ isabo dii vatụra wụ. Sẹnii vaa nyi aavọ kẹ?" 28 Di Ijesu kaa yụ wa ka, "Inirẹiza maa kaa yụ wụ nin ka, inẹshẹ ọwọọwa, efi ọni Ozi Ọza va yatụ tụni ogede aani, ẹwụ nin ọnọvi ki wa vatụra mi nin, vaa yatụ tụra ogede ẹwụrẹva, ini ụmẹ ishọọji irẹkụra ẹwụrẹva Isrẹni. 29 Aza bo ọnọ vi ki ẹ navọ ireshi, ẹnyara anẹrụ, ẹnyara anyẹnẹ, ada, ọnyi, ezi navẹki ẹtẹ fụvọ irẹsha ami, e ve re e dọ ini oze ẹchẹshi, dẹ zẹ riọgụ ẹshẹ poro pooro. 30 Ama, ẹrụrụ ana vi ọzi ipaapa vaa vi ọza ene keke; ene keke, vaa vi ọza ipaapa.