1 Ifarisi ọnri Isadusi nini e vee tu Ijesu, dẹ zamare. Dẹ kaa yọ, ki ọ si ami zụ ẹni fiini ovurukutu. 2 Ama dọ tụoshi, dọ kaa yụ wa ka, "Ụmẹ oruva re tu, dụụ kaa nini ka ẹtẹ vee zoza, fụvọki ovurukutu o vi." 3 Aaviki ini ọnẹnẹ yọ, dụụ kaa nin ka, ẹtẹ ozee zoza fụvọki ovurukutu o vi, do ze shoozi. Waa yẹ ami ọni ovurukutu si zụ nini, ama wa zi yẹ ami ọni efi si zụ nini. 4 Evereze oduvi ọnri ayi ọsẹrẹka nin ee si ami, ama ọzi nyi ami ana va si yụ wa, ọchishi ami ọi Ijoona. Inaani di Ijesu fụrẹ wa ụvọ, dọ na. 5 Ẹfi ọni eziafụ aani tu akọsa, dẹ tamayi ka ẹnẹ zi za ivụrẹdi. 6 Di Ijesu kaa yụ wa ka, "Sieyipe ẹngwụ awụ nini, dụ wa yarazi nin, fụvọ ọva Ifarisi ọnri Isadusi nini. 7 Di eziafụ aani gee roo inakaakana aanini, dẹ ka, "Fụvọki ya zi za ivụrẹdi ọnyọnyi chaụvọ yọ." 8 Ijesu ọ yẹ isọnee ro, dọ ka, "Ẹwụ nin ana nyi ọdọwụ oweyi, sẹnẹvẹ du we roo inakaakana awụ nin kaa fụvọki wa zi za ivụrẹdi ọnyọnyi yọ nin kẹ ?" 9 Wa zi yi yẹ nini, navẹki wa zi tamayi ivụrẹdi ẹshi ana ga yi aza akaashi oze ẹẹshi, ọnri ka, waa zi yẹ uji ya ana kụ ewuri ọna vẹtẹ shi? 10 Navẹki ivụrẹdi shimba ọni aza akaashi oze ẹẹna ri, ọnri ụji ya, ana kụ ọna vẹtẹ shi? 11 Sẹnẹvẹ do rezi ye wu nin ki ma zi karẹyi inọpati ivụrẹdi yụ wụ nin kẹ?" Sieyipe ẹngwụ awụ nini, dụ wa sieyi petẹ yi ̣ọva Ifarisi ọnri Isadusi nini. 12 Ẹfiavọ dẹ va yẹ ka ọzi vi ̣ọva ọna si ivụrẹdi wụ ọnọ ka, ama ẹ sieyipetẹ yi ọzizụ Ifarisi ọnri Isadusi nini. 13 Ini ẹfi ọnọni, Ijesu mẹ vẹ ini ọkakoro ana gụrẹ Isesaria Ifiripi, dọ fọ eziafụ aani ka, "Ẹni aza kaa ki Ozi Ọza ọ vi kẹ? 14 Dẹ ka, "Azẹnyi ki Ijọọnụ Ọsami, azẹnyi ki Enaija; di azẹnẹsa ki Ijeremaya, navẹki ọnya ini ọkisẹ nini." 15 Dọ ka yụ wa kaa, "Ama, ẹnẹ ẹwụ nin ki ma vi kẹ? 16 Isaimọni Ipita, dọ ka, "Ẹwụ ọnọ vi Ikristi, Ozi Oshomoshi ana ra." 17 Ijesu ọ tụoshi, dọ kaa yọ ka, "Ẹdabẹrẹ ọnọ vi yụ wụ Isaimọni ozi Ijoona, fụvọki ọzi vi ẹchiẹngwụ ọnri anya ọnọ shafụ irẹyi ọnọni sha yụ wụ, ama Adami ana yi ineeku. 18 Ma zẹ kaa yụ wụ tụọ ka, ẹwụ ọnọ vi Ipita, ini irẹsụ irẹta ọnọni ọni mva da ichọọchi ami tụ. Ọchọfọ ineeku ọrọkọtọ ọi zue funa ini irẹkụ. 19 Maa si ikọkọrọ ijọva ineeku ọiza yụ wụ. Isatụrisa ọnụ raa sụ inẹshẹ vana vaa sụ ineeku; isatụrisa ọnụụ raa ngwara inẹshẹ, vana vaa ngwara ineeku." 20 Ẹfiavọ, di Ijesu si ụmọ kaa yi eziafụ aani ka, a sẹ kaa yi ọzọnyọnyi ka ọni ọnọ vi Ikristi. 21 Fụri ẹfiavọ, di Ijesu vẹrẹ aa ka yi eziafụ aani ki ọni bẹdọ vaa nọ Ijerụsanẹmụ naa rụya isẹrụrụ ini ụvọ azẹkụ, oshirẹsụ arụfa nin shi ọyofi nini, dẹẹ wụ ọni, daa va sha ọni kwẹẹtẹ ini ọkụshi ọfụụta. 22 Inaani, di Ipita siọ nọ ini oboka, dọ tụọ ofụvọ ka, "Isọnọni ọva zi gọdọ yụ wụ Ananyiyi, isọnsọnyi ọ zaa kani wụ." 23 Ama di Ijesu vareyi, dọ kaa yi Ipita ka, "Parafu nọ inaama ami, ẹwụ eshu!" ọmọza sẹdụ ọnụ vi, fụvọki wa zi tẹsi yi isa ana vi ayi Oshomoshi, ama isa anẹshe.̣" 24 Di Ijesu va kaa yi eziafụ aani ka, "Aaviki ọ nyi ọza enee si ki ọnọ vatụra mi, o ze ki ọzọnọ o yi ẹngwụ aani tẹtẹ, dọọ si ọchi avashi aani, dọọ vatụra mi." 25 Fụvọki, ọzatụrọza one ree si ki ọnaa dọ ife awụọni tụ, vene vee ne e ta; ọzatụrọza ene re ne ifẹ aani ta fụvọ ami, o ve re e si. 26 Yere ọgụ ọna yinaani yi ẹzẹna nyi ẹshẹ ọnọni bo, ama do ne ifẹ aani ta? Sẹni ọza va zụ si dudi ẹshẹ aani kẹ? 27 "Fụvọki, Ozi Ọza vaa vẹ ini ụga Ada aani bẹrẹ angẹni aani nini. Ẹfi ọnọ, ọ vaa si ọgụ ọzọọza yọ venebiri ọmimẹ aanini. 28 Irẹiza, ma ka yụ wụ nin, azẹnyi yini akaakana awụ nin, ana dinẹ tụzọni, ana razaa sieyigẹrẹ isu netu ẹfi one ve sii re ki Ozi Ọza ee chi vẹ ini ijọva aani."