1 Inaama ẹkụshi shinọnyi, di Ijesu ̣si Ipita, Ijemsi onri Ijọọnụ ọnyara aani, dọ sụ wa bẹrẹ ẹngwụ shirẹ irẹsụfa ana nẹba kokoro. 2 Da vara Ijesu ẹngwụ ineyi aanini. Eyirẹsụ aani dọọ za venebiri ọyi, aụrụ aani dọọ vụẹtẹ bẹnẹ-bẹnẹ venebiri ẹtofei. 3 De ve re ka, Imosisi ọnri Enaija, ẹ jinẹ ve tu o, de pe aa karẹyi. 4 Di Ipita tuoshị, dọ kaa yi Ijesu ka, "Ananyiyi, ozoza ki ya maan kụ yi izọnaani. Aaviki we si, mva ji ajẹngwụ ẹẹta, di ọnya vi ayawụ, di ọnya vi ayi Imosisi, dọ ọsa zẹ vi ayi Enaija." 5 Ọ ma ki karẹyi inụvọ, di egushi ana feyi kokoro vaku wa, di ọngwẹ ọnya fiini egushi ọnọ vẹ, dọ ka, " Ọnọni ọnọ vi Ozi ami ọnim ngwụayani, ọni inẹ ami shine tu; wee baatọ nin." 6 Ẹfi ẹni eziafụ aani wụ irẹyi ọnọni, di angwa shi wa kokoro, dẹ veyi kụẹtẹ. 7 Ẹfiọnọ, di Ijesu vẹ, dọ sụvọkani ụwa, dọ ka, "Kwẹẹtẹ nin, asuu shiangwa nini." 8 Ẹ mẹ veyi shirẹ, dọviki Ijesu renya ene kue re. 9 Ẹ mee chi vẹ fiini irẹsụfa ọnọ, di Ijesu ̣si ụmọ kaa yụ wa, ka, "Asụụ si etoore ọnọni zụ ọzọnyọnyi poro netu ẹfi ọni Ozi Ọza vaa sha kwẹẹtẹ fiini akaakana ẹnẹ ne fu su." 10 Di eziafụ aani fọ ọ ka, "Sẹnẹvẹ di ọyofi nini ka ki Enaija ọnọ bidi vaa vẹ?" 11 Di Ijesu tụoshi, ka, "Enaija vaa vẹ ini irẹiza, dọọ vaa si isa bo varama tụni udi aani." 12 Maa kaa yụ wụ nini, Enaija ọ vẹ da, ama dẹ razi yẹ. Akikọnọ, dẹẹ mẹ isa ene zeweyi shi o. Inoze ọnyọnya ọnọ, ọ ni Ozi Ọza vaa rụya inụvọ aanini. 13 Ụmọnọ di eziafụ aani va yẹ ka Ijọọnụ ọna mi isami, ọnọ karẹyi aani. 14 Ẹfi ẹnẹ vẹ ve tu azọkọni ẹnẹ, di ọnọrụ ọnya ve tu o, do kuẹtẹ tụni ọvidi aani, dọ ka, 15 "Ananyimi, nyi ayụva yi ozi ami, fụvọki ọ nyi ikụ obo, dọọ rụya kokoro. Fụvọki ẹfitụrẹfi ọnọ siọ sẹdụ, doo ne e ngwụni ira ọnri enyi. 16 Maa siọ ve tu eziafụ awụ nin, ama ẹizụ fụ ọ ikụ sha."̇ 17 Di Ijesu ̣tụoshi ka, "Evereze ọna razi nyi ọdọwụ ọnri ene nyeeyi, yere ishọnimi vaa ra pe wu nin ne tu kẹ?" Ishim vaa zụ siẹngwụdọ irẹyi awụ nin ne tu kẹ? Si ozi ọnọ ve tu mi." 18 Di Ijesu nyẹngwụrẹyi shi ifẹ azeeshi ọnọ, dọ dụ ọ jinẹ fiini ẹngwụ aani, di oziọnọrụ ọnọ dashi ini ụmụmọ. 19 Ini ẹfi ọnọ, di eziafụ Ijesu ve tu o ini oboka, dẹ ka, "sẹnẹvẹ di raizụ dụ ifẹ azeeshi ọnọ jinẹ kẹ?" 20 Di Ijesu kaa yụ wa ka, "Fụvọ ọdọwụ oweyi awụ nini. Inirẹiza, ma ka yụ wụ nin, aavika wa nyi ọdọwụ ene weyi venebiri ọina imọsitadi, ụ va zụụ kaa yi irẹsụfa ọnọni ka, "Kwẹẹtẹ fiizọ nangwụ akizọ," dọ vọvọ vi. Ọzi nyi isa ọnụ rai zụa mẹ nini. 21 Ama, ẹngwụ ifẹ azeeshi ọnọni ọ zaa jinẹ ọchishi zirẹngwụ ozurenu ọnri awẹ. 22 Ẹmẹ yi Iganini, di Ijesu kaa yi eziafụ aani ka, "A vaa si Ozi Ọza chire aza ụvọ, 23 dẹẹ wụ ọ; ini ọkụshi ọfụta, daa sha a kwẹẹtẹ," Eziafụ aani mẹ wụrẹyi ọnọni, di ẹngwụ aanini che, di inẹ aanini si du. 24 Ẹmẹ ngwụ Ikapanọmụ, di anẹrụ anaa dọ ẹkẹshi imaana, ve tu Ipita, dẹ ka, "Ọzụọzisa awụ nini waa tụ imaana ireshi irafẹkẹ navẹki ọ ma tụ? 25 Dọ voshi ka, "Ọọ tụ." Ama Ipita mẹ va ngwụ ineshi na, dọvi̇ki Ijesu ọnọ bidi karẹyi shi o ka, "Isaimọni, u me re irẹyi ọnọni tụ kẹ"? Ẹni oshinọyi ẹshẹ dọ imaana fiinụvọ aanini? Eziẹtẹ navẹki azẹga?" 26 Ipita mẹ kaa ka, "Fiiniụvọ azẹga," di Ijesu kaa yọ ka, "Ọọ vọvọ vi, eziẹtẹ vana natụ fiini imaana ọtitụ. 27 Ama, doti asụ mẹ wa ọikụ, wa nọ ini irefu, du we ne iwọ ngwụni enyi; isenyi ipaapa ọnu re tura jinẹ vẹ. Sha a irenu, u vee re ẹkẹshi enyisụẹ, wa siọ yi ẹnẹna dọ imaana, yi ẹmi ọnri ẹwụ nini.