¹ Tetapi Saulus, Ngancapm nak munoh kan muRed Tuhatn, Saul ngadap Imam Bakah, ² minta'k suRat ke Majelis-majelis di Damsyik, sak, ia panai napat kan tina'k atau laki yang nuna'k jalatn Tuhatn, ia nak nangkap ngan maek sida'k ke Yerusalem. ³ Dalapm pejalatn ia ke Damsyik, saat ia datakng ke kota yak, tiba-tiba ada sinaR daRi langit ngelilekng ia. ⁴ Ia Robah ke tanah, tedinga ponekng ia ada ingan :"Saulus, Saulus, ngapai kau ngaga Aku bea'k?" ⁵ Singol Saulus, "Sapai kau Tuhatn?" Joko'k ia: "Aku tok Yesus yang kau anok kadak aRi yak. ⁶ Tapi kau uwas langsokng angkat ke kota, dietn aku nak modah kau, apai yang kau pulah." ⁷ Maka nyaRohlah kan kabatn Saulus yang nyekobatn ia di jalatn, kaRena sidakk ninga ingan yak, tetapi bon sek siko'k pun yang mantau. ⁸ Saulus uwas lalu bediRi, nak muka'k mata, tapi mata ia bon tebuka, bon panai mantau apai-apai; sida'k aRos nuntotn ia tama'k ke Damsyik. ⁹ Pelama tiga aRi ia bon panai matau apai-apai, makatn-minom pe abotn. ^{12 10} Di Damsyik, ada siko'k muRed Tuhatn benama Ananias. Tuhatn bingan ke ia dalapm penompak, "Ananias!", jokok Tuhatn: "Tok Aku, Tuhatn!" ¹¹ Jokok Tuhatn, "Boh, angkat ke jalatn yang benama Jalatn LuRos, gogak mensia dilangkau Yudas, uRang Tarsus, di dia'k ada mensia nama Saulus, ia gek bedoa. ¹² Dalapm pantau ia, ada mensia nama Ananias tama'k ke dalam ngan numpang jaRi diatas ia, sak ia panai mantau age'k." ¹³ Tetapi Ananias modah, "Tuhatn, daRi banyak uRang, kuninga mensia yak, banyak penyahat, yang dipulah ia ke mured Tuhatn, di Yerusalem, ¹⁴ Ia dongan segala kuasa ngunyaR ngela kan mensia dalapm nama Duan" ¹⁵ Tapi jokok Tuhatn, "Angkat jak, ia nak kupakai sebagai alatku, kemaek namaku ke bangsa-bangsa laetn, seRota raja-raja ngan uRang-uRang Israel" ¹⁶ Aku nak nunjok ke ia bahwa banyak penderitaatn yang ia tangokng kaRena namaKu." ¹⁷ Lalu Ananias angkat, ia tama'k ke dalapm laman. Ia ngelotak jaRi diatas Saulus, jokok ia, "Mpalaku Saulus, jokok Tuhatn Yesus, yang nompak dere'k ia ke ikau saat kau koto'k, ia ngirepm aku sak ikau panai mantau ngan ponoh Roh Kudos." ¹⁸ Seketika yak, seakatn selaput mata ia tekobak, ngan ia panai mantau; ia uas dan dipone'k; ¹⁹ ia makatn ngan meRasa taga. ia diapm beRapai aRi di Damsyik. ²⁰ Bon kelemah ia langsokng ngesah tontang Yesus dilangkau semayakng, bahwa Yesus yak Anak Allah. ²¹ Semua kan mensia yang ninga ia meRasa nyaRoh lalu bingan, "Ukatn mensia tok yang ngunyar ngela di Yerusalem yang nyobot nama Tuhatn? Ia koto'k nak nangkap kan sia untok dibaek ke oRong imam-imam kepala." ²² Tetapi Saulus nyadi kuat ngan nangapm, ia mulah kesulitan di dalapm kelompok Yahudi di Damsyik melalui pembuktian Yesus yak Kristus. ^{25 23} Seudah bebeRapai aRi, uRang-uRang Yahudi nak munoh Saulus. ²⁴ Tapi rencana sida'k konak keponai Saulus. Sida'k ngogak peroma yang topat untok munoh Saulus. ²⁵ Tetapi mured Tuhatn ngame'k ia tang malapm aRi dindeng, nopo'k ia dalapm keranjakng. ²⁶ Ketika ia datakng ke Yerusalem, ia berusaha nak begabokng ngan kan mured Yesus, tapi sida'k golak ke ia, sida'k bon caya'k ke ia dah jadi mured Tuhatn. ²⁷ Tapi Barnabas nyempot ia ngan maek ia ke tongah kan mured Tuhatn, ia modah kesida'k bahwa Saulus dah antau Tuhatn di jalatn ngan Tuhatn pe dah bejantoh ngan Saulus, di Damsyik, Saulus pe ngumatn nyobot nama Yesus. ²⁸ Ia bedapat ngan sida'k yang tama'k ngan kluar Yerusalem. Ia bejantoh ngumatn dalapm nama Tuhatn Yesus ²⁹ dan bedebat dongan uRang Yahudi yang bebahasa Ibrani; tapi sida'k ja gohet nak munoh ia. ³⁰ Saat sida'k jeRahatn ia ninga yak, sida'k nabeh Saulus ke Kaesarea dan ngirepm ia k Tarsus. ³¹ Laga bak yak, semua gereja di Yudea, Galilea dan Samaria jadi aman ngan maketn tumboh; bejalatn dalapm jalatn Tuhatn kaRena golak ngan Tuhatn, dalapm kasih Roh Kudos. ³² Pada saat yak, Saulus bejalatn ke seluRoh daerah, ia ngunjong kan uRang pecaya'k, yang diapm di kota Lida. ³³ Dia'k ia bedapat ngan Aeneas yang dah lapatn tahotn beRidap, galekng diatas pangokng, ia ngidap lumpoh. ³⁴ Jokok Petrus ke ia, "Aeneas, Yesus Kristus nyomoh ikau. Uwas am, diRapi tilam kau," ia pe uwas logakng. ³⁵ Kan sia yang diapm di Lidda ngan di Saron mantau ia lansong bebalek ke jalatn Tuhatn. ³⁶ Saat yak di Yope, ada se uRang mured benama Tabitha, yang roti e, "Dorkas." Tina'k tok banyak bebuat baek, ponoh kaseh sayakng, yang dipulah manto'k uRang mensektn. ³⁷ Pada waktu yak, ia Rungo'k lalu mati; saat sida'k monek ia, ia dilotak dikamar atas. ³⁸ Sejak Lidda dampeng Yopee, kan mured ninga Petrus ada dia'k, sida'k ngirepm dua iko'k mensia ke oRong Petrus, memohon ke Petrus, "Tamah kami bah, onang lamat." ³⁹ Petrus uwas lansokng beRota ngan sida'k. Waktu ia sampai, sida'k lansokng nabeh ia ke kamar atas, kan janda-janda bediRi nunjok kan pakai ayok umpo'k Dorkas pRoma nyekobatn sidatk. ⁴⁰ Petrus nyuroh sida'k kluar ke kilah, belutot dan bedoa; nampah iko'k Dorkas, "Tabitha, uwas am." Lalu ia muka'k mata, nyinek Petrus lalu dudok. ⁴¹ Petrus nujot jaRi Dorkas; lalu ia nimpai kan uRang pecaya'k, kan janda-janda, bahwa tina'k yak dah idop. ⁴² Kejadiatn yak tesebaR di seluRoh Yope, banyak uRang pecaya'k ngan Tuhatn. ⁴³ Petrus diapm di Yope bebeRapai aRi dongan mensia yang benama Simon, seuRang Penyamak Kulet.