¹ Saulus udah onak kalau dere'k e allah ja mati , mulai dari nyak dipulahlah pemasalah bakah ke jemaat atau mensia-mensia yang ada di Yerusalem , lalu abes nyak bedotaknglah kan mensia mensia yang pecaya'k ke seluruh oRong kota Yudea dongan Samaria , kecuali sida'k rosul. ² Mensia mensia yang beriman datankg dan ngubor stefanus dongan asa ati yang melangaR pilok. ³ Tapi saulus ngogak jemaat dongan mulah kacau, inya tamak dari langkau sutek ke langkau sutek lalu nya narek dongan ngaser kenlaki dongan kentinak lalu ditomak ke penyaRa . ⁴ Dah nyak mensia-mensia yang pecaya'k yang udah bedotakng tade'k modahkan pekata/firman. ⁵ Dah nyak si Filipus tok ingkas ke sutek kota Samaria lalu nya modah tontakng ristus ke sida'k. ⁶ Pas kebanyak mensia udah ninga dongan mantau tana-tana yang dipulah Filipus , sida'k jadi yake'n dongan pecaya'k dongan apai yang dipodahnya. ⁷ udah nyak kebonyak mensia yang udah ninga dongan buleh pekata nyak keluar semongat-semongat yang jahat mabak beles, kapetn ngora . Ada mensia yang cacat cela dongan timpakng pun somoh. ⁸ Tang ke dah yak timol sukacita dikota nyak. ⁹ Dan lagek dekota nyak ada siko'k mensia yang nama e Simon, nya dah lamat bedukotn panai nyiher; biasa e nya mulah katn mensia Samaria temponga , dongan ngako'k dere'k e uRang nyang pentekng. ¹⁰ Kebonyak uRang Samaria, dari nyang elos ke nyang bakah, ada asa temponga dan pecaya'k ke inya, dah nyak sida'k modah, "Mensia ito'k nya,lah kuasa Allah nyang dipodah bakah." ¹¹ Sida'k ninga apai yang dipodah inya, badi inya udah mulah sida'k pecayak dongan gangak sepanyang-panyang waktu dongan sihir e. ¹² Tapi waktu sida'k pecaya'k dongan apai yang udah dipodah Filipus tontang kitab Injel dongan modah tontang kerajaan Allah dan tontang nama Yesus Kristus, dah nyak sida'k (kantina'k laki) dibabtis. ¹³ dah nyak Simon kedere'kpun jadi pecaya'k dah nyak inya dibabtis , inya langsong namah dongan Fillipus, abes nyak Simon pe mantau tana-tana yang bakah dongan kereja-kereja yang baek laga si Fillipus, inya pun jadi temponga lala. ¹⁴ Pas para rasul di Yerusalem ninga ke uRang Samaria udah nerimak pekata Allah, sida'k ngutos Petrus dongan Yohanes untok sida'k. ¹⁵ Pasnya di dietn, Petrus dongan Yohanes mendoakan sida'k, sak sida'k buleh dan napat Roh Kudus. ¹⁶ Badi laga ke sampai pelamah nyak, Roh kudus upan turun ke siko'k mensia pe, dongan lage'k sida'k ongkah dibabtis dialapm nama Tuhatn Yesus. ¹⁷ Dah nyak Petrus dongan Yohanes ngelotak jaRi diatas sida', dah nyak Roh kudus langsong diteRimak sida'k. ¹⁸ Waktu Simon mantau kalau Roh kudus diunyuk ngelolok nampekng jaRi sida'k rasul, inya nawarkan duet ke Petrus dongan Yohanes. ¹⁹ nya bekata, "BoRe'k aku kuasa macam ito'k gam, sak sapaipun nyang ku lotakkan jaRi diatas e sak napat Roh kudus." ²⁰ Tapi Petrus bingan ke inya," Biar am duet perak ikau losi tamot namah ikau, badi ikau dah bepiker nak moli karunia Allah pakai duet. ²¹ Bon isek jatah dongan hakkau dalapm uRosan tok, badi hati ikau bon konak diadapatn Allah. ²² Kobak dari nyak betobat am atas penyahat dere'k kau, dongan bedoalah ke Tuhatn , sak sentuha ngampon ati ikau tok . ²³ Dongan lage'k aku mantau kalau ikau ada dalapm racon yang pekak dongan lage'k ada ikatatn dosa." ²⁴ Simon nyawab ngan bejantoh , "Bedoa am ke Tuhatn untok aku , sak bon sek daRi pekata-pekata ikau nyak tejadi keaku." ²⁵ Sewaktu Petrus ngan Yohanes udah besaksi ngan menyobotkan pekata Allah, sida'k bebalek ke Yerusalem; ngan sepanyakng pejalatn, sidak memodahkan Injil di banyak kampong-kampong daRi mensia Samaria. ²⁶ Seudah nyak siko'k malaikat Tuhatn bejantoh ke Fillipus dan bingan, "Kojat am ngan angkat ke aRah Selatan jalatn nyang ke senontang daRi Yerusalem ke Gaza"( Jalatn tok ada di padakng gurotn.) ²⁷ Dah nyak inya bangket ngan angkat. Pantau, di dietn ada siko'k kenlaki Ethiopia, seuRang kasim daRi pembesar dibabah kuasa Kandake, ratu mensia Ethiopia. Inya nyang nangong jawab ke kekaya e. Inya datangk ke Yerusalem untok semayakng. ²⁸ Inya lagek di dalapm pejalatn pulakng numpakng keReta e kapeng maca bukok alkitab nabi Yesaya. ²⁹ Waktu nyak Roh bingan ke Fillipus, "Angkat am ngan dompekng koetn keReta in." ³⁰ Dah nyak Fillipus langsong koRong inya , ngan ninga inya lagek keborah maca nabi Yesaya, dah nyak nya bejantoh "Apaikah ikau ngeReti apai yang lage'k ikau baca ?" ³¹ URang Ethiopia nyak modah ngan bejantoh, "Kati aku panai ngeReti tej bon sek mensia yang mimekng aku?" Inya nyuRoh Fillipus sak naek kekeReta ngan dudok disepiak nya. ³² Ayat kitab suci yang de baca mensia sida'k Ethiopia nyak adalah tok, "Macam siko'k domba nya tuntotn ke dalapm pemantaian; ngan macam anak domba nyang keluaR dipeRodap pengunteng bulu e, inya bon nak muka mulut e: ³³ Didalapm pemansakng nya yang jahat ada umpoknya nyang diRampas: Sapaikah nyang nantek nyeritakan asal e? Soal e nyawa inya diame'k daRi bumi." ³⁴ Udah nyak uRang kasim nyak betanyak ke Fillipus, jokok nya, "Aku betanya'k ke ikau, untok sapaikah nabi nyak bejantoh? untok dere'k e gona atau untok sida'k laetn?" ³⁵ Dah nyak Fillipus nongaR pe bejantoh, inya mukak daRi kutipan pekata daRi tulesatn dalapm kitab Yesaya untok modah tontang Yesus ke inya. ³⁶ Pas sida'k bejalatn, dataknglah sida'k dioRong yang beaRai; dah nyak mensia kasim nyak bejantoh, "Pantau, ada aRai didito'k, apai yang ngatoh aku bon di baptis gam?" ³⁷ {Saletnan maRe'k nyang tebaek melosi kis. 8:37 , Fillipus modah, " tek ikau pecaya'k dongan segenap ati ikau, ikau panai dibaptis." Mensia Ethiopia nyak nyingol, " Aku pecaya'k kalau Yesus Kristus nyak nyalah Putra Allah."}* ³⁸ Abes nyak uRrang Ethiopia nyak nyuroh keReta e langsong beRonti. Dah nyak sida'k tuRotn ke dalapm aRai, baek Fillipus dongan uRang Kasim, dah nyak Fillipus maptes nya. ³⁹ Seudah sida'k keluaR daRi dalapm aRai; Roh Allah maek Fillipus angkat, URang Kasim nyak bon panai mantau Fillipus lage'k, dah nyak inya ngelanyot bejalatn dongan Rinu Raya. ⁴⁰ Abes nyak Fillipus timol di Asdot ngan inya ngelolok Rong nyak, inya modah tontang Injil ke seluRoh kota-kota sampai datakng ke Kaisarea.