"Ta awuk hio, angaran pauka mate ranu ga kaluarga Daud di pamuneng Yerusalem mat ngahapus dosa di kacemaran. Bakoi Naan Lagi Nabi Palsu Ta awuk hio, kalahiolah firman Tuhan samesta alam, "Aku angaran nyanawoh aran-aran berhala neke negri hio sahampe here bakoi kaingate lagi. Aku gin angaran nulak para nabi di roh kacemaran neke negri hio. Amun isaulun banubuat lagi, amah di inee sa haot nganak aye angaran ngantuh gaaye, 'Hanyu bakoi angaran welum lagi, ulah hanyu namposo demi aran TUHAN!' Amah di inee sa haot nganak aye angaran nyuduk aye ganyah aye banubuat. Ta awuk hio, para nabi angaran kahaba mangan ulah gana panginiane jari nabi. Here bakoi lagi makai jubah bawulu mat namposo; Tatapi, here angaran ngantuh, 'Aku lain isaulun nabi, malahan aku isaulun pangusaha tane, ulah tane ayelah harta naaku neke halus.' Amun naan ulun sa nyantane gaaye, 'Bakas batan inunkah sa naan ta tenganu hio?' Aye angaran nuing: Hiolah batan sa kuhaba ta lewu sahabat-sahabat!" "Hai pedang, buanlah tahadap gembala-Ku, tahadap ulun sa paling akrap pahengauku!" kalahiolah firman TUHAN samesta alam. "Wunulah sang gembala sahampe domba-domba angaran tapisah-pisah! Aku angaran makai tangan-Ku tahadap sa maleme. Maka, angaran tarajadi ta sakaluhan negri, kalahiolah firman TUHAN, rueh pertelu nekee angaran nasanawoh, kaluhane matei binasa, tatapi sepertelue angaran muneng welum. Aku ngannak sepertelue hio huang apui di angaran nampasegah here samehdi ulun nampasegah perak. Aku angaran manguji here samehdi ulun manguji amas. Here angaran nerau aran-Ku di Aku angaran nuing here. Aku angaran ngantuh: here ayelah umat-Ku, di here angaran nuing: TUHAN ayelah Allahku!"