Pasal 6

1 Rengeilah inun sa naeau TUHAN, "Buanlah, belalah dirinu ta hadap gunung-gunung! Elahlah suaranu narengei ulah bukit-bukit, 2 Rengeilah,hai gunung- gunung, pangaduan TUHAN, pasanglah silu, hai dasar-dasar bumi! sasatuue, TUHAN baperkara tahadap umat-E, di Aye mat baperkara pahengau Israel. 3 Umat-Ku, inunkah sa kuulah ga hanyu? Inunkah Aku nampauyuh hanyu? Tuinglah Aku! 4 Sasatuue, Akulah sa maju di nengau hanyu balua neke tane Mesir, di haot ngabebas hanyu neke lewu perwalahan. Aku ngabebas hanyu neke perwalahan, di haot mangutus Musa, Harun, di Miryam ga hanyu. 5 Umat-Ku, itunglah pahengau maeh inun sa narancangkan ulah Balak, Raja Moab, di inun sa natuinge ga Bileam anak Beor, di inun sa tarjadi ta Sitim hampe ga Gilgal, mat hanyu karasa ulahan-ulahan katuu TUHAN." Sa Nakangakan Tuhan neke takam 6 Pahengau inunkah aku harus mahadap TUHAN, di tunuk manyambah ga Allah ta uneng entu? Inunkah aku harus mahadap Aye pahengau kurban-kurban tutungan, pahengau anak lembu baumur isa taun? 7 Tarimekah TUHAN ga ribuan domba jagau, ga puluhan ribu etak ilau? Inunkah aku manyarahkan anak matuehku ulah palanggaranku di wua kandunganku sabagai dosaku karaerai? 8 "Hai marasia, TUHAN haot kawara ga hanyu inun sa maeh. Inunkah sa natuntut TUHAN neke hanyu: salain balaku adil, mancintai kasatian, di welum ranah atei ta hadapan Allahnu?" Inun Sa Naulah Israel? 9 Rengeilah TUHAN wara ga kota-kota, "Ayelah bijaksana mat takut ga aran-E." Rengeilah, hai suku-suku bangsa di ulun sa muneng kota! 10 Koimungkin Aku koiingat harta bana kafasikan ta lewu ulun fasik, di takaran efa efasa kurang di takutuk hio? 11 Koimungkin Aku mambiarkan ulun sa ngawuah neraca palsu bakoi nahukum atawa pundi-pundi baisi watu timbangan tipu daya? 12 Ulun-ulun sugih ta kota hio penu pahengau kakarasan, panduduke ngantuh oso di lela huang wawa here penu tipu daya. 13 Ulah hio, aku mulai mangkung hanyu, mananduskan hanyu ulah dosa-dosanu. 14 Hanyu mat kuman, tatapi bakoi matjari wising. hanyu mat mangamuk ulah kalauan, hanyu mat matnyingke sasaisa, tatapi bakoi iyuh manyalamatkane. Inun sa hanyu salamatkan mat Kunyarah ga pedang. 15 Hanyu mat ngamule tatapi bakoi mat masi, Hanyu mat ngiik wua zaitun, tatapi bakoi baurap pahengau ilaue. Hanyu mat ngiik wua anggur, tatapi bakoi ngoot hasil anggure. 16 Hanyu mat baprang taguh ga katatapan-katatapan Omri di hadi ulahan babuhan Ahab, hanyu mat umma garayang here sahampe Aku nampajari hanyu saisa kangerian di panduduknu mat natampajari sasaran paneran. Kalahiolah hanyu mat manangung cela neke pihak bangsa-bangsa."