¹ Maka, Allah ngingat Nuh di kaluhan satua liar, maupun satua sameluman sa naan pahengau e huang bahtera hio. Di Allah nhgulah riwut malewus ga entu bumi maka ranu gin mulai mahak. ² Aye gin manutup kaluhan mate ranu kalaleman bumi di manawang-manawang ranu sa naan ta langit, sa hampe uran tadoh minau neke langit. ³ Ranu sa manutup bumi sa magin mahak hampe ta ahir neke 150 andrau hio ranu samagion ba kurang. ⁴ Ta wulan sa kapitu di andrau sa kapituwalas ta wulan hio, so ot lah bahtera hio ta pagunungan Ararat. ⁵ Ranu tarus mahak hampe wulan sa kasapuluh hio, santuruk-santuruk gunung haot mulai tena. ⁶ Sa haot epat pulu andrau, Nuh nguka pintu sa haot na ulahe ta bahtera hio. ⁷ Udi hio, aye nyanafas erang gagalk di wurung hio samiding go aro ga hampe ranu mahak neke hadap bumi. ⁸ Udi hio, Nuh gin nyanafas erang kaikui wurung merpati mat ngarasa inunkah ranu haot mahak ta hadap tane. ⁹ Akan tetapi, merpati hio bakoi kaiuh kahaba uneng matakei ulah ranu masih nutup bumi sahingga merpati hio waleng ga bahtera. Nuh ngasang tangan e pahengau nyama merpati hio, balalu nunna e waleng ga huang bahtera. ¹⁰ Udi pitu andrau, Nuh waleng nyanafas merpati hio neke bahtera. ¹¹ Sanya andrau e, merpati hio waleng ga Nuh pahengau nuna rawen Zaitun sagar huwang wawa e. Maka hio, Nuh karasa ulah ranu haot mahak neke muka bumi. ¹² Maka, Nuh ngandrei pitu ndrau lagi, balalu waleng nyanafas merpati hio. Wayah iti, merpati hio bakoi waleng ga bahtera. ¹³ Waktu taun welum Nuh sa ga 601, ta andrau ka isa hio, ranu haot mahak neke muka bumi di Nuh nguka hapau bahtera di ngini ulah muka tane haot kering. ¹⁴ Waktu andrau karuampulu pitu wulan ka rueh, muka tane haot bujur-bujur karing. ¹⁵ Udi hio, Allah ba paner ga Nuh, ¹⁶ "Kaluarlah neke bahtera hio, hanyu, harau nu, anak-anak nu, di harau-harau here. ¹⁷ Lapas bo lah kaluhan mahluk welum naan pahengau tenga nu; wurung-wurung, satua-satua, pahengau sa kaluhan sa marayap ta entu bumi mat here ba anak pinak di batamah rama ta hamau bumi." ¹⁸ Maka, Nuh kaluar pahengau hara, anak-anak, di mantu-mantu e. ¹⁹ Kaluhan satua liar, kaluhan satua sa marayap, di kaluhan wurung baiua neke bahtera. Kaluhan satua kaluar neke bahtera, raenai-raenai manurut jenis e. ²⁰ Udi hio, Nuh namuan isa altar mat memuliakan Tuhan. Aye nuna papire wurung di papire satua sa halal, balalu ngami satua hio ta altar mat persembahan tutungan ga Allah. ²¹ Tuhan ngenguh persembahan nu, ta hio nampaeson Aye. Maka, Tuhan bapaner huang atei e, "Aku bakoi akan lagi ngutuk tane ulah kajahatan marasia, elah bo niat atei marasia hio jahat neke muda e. Di aku gin bakai angara lagi mambinasakan satiap mahluk welum ta entu bumi sameh sa haot ku ulah. ²² Salawah bumi masih naan, wayah mule di wayah mutik marisak di malqaing, wayan kamarau di wayan uran, hengau kaandrau di kamalem akan terus naan."