¹ Mǝn sʊgǝmǝn yǝmbǝ nyam a mura Kristiyu. Me mǝn ti nyar, jir da furiyǝn da miyǝng ka bʊ buk ka miyǝng a mura We Yulgoi, ² go ka furdǝ yulluwun we rǝ kwani tǝn kwewi me jitangwi a furiya miyu. ³ Na bǝn fau mo mǝrǝ bwimi nǝngngai mǝn nyi na ti rǝ kǝng a gwa Kristiyu bǝrarǝ chitǝtta miyu, nǝbbǝn dugǝrtǝta miyu a mura bwiyəm. ⁴ Hanjim nǝb ba Isra'ilam. Ka rǝ yutang, ka rǝ grate, ngagatang, nǝtǝta soriyu, netang a gratǝ Niyajiyu, rǝ yǝm bʊrəm. ⁵ Bǝgim warigu gǝn tebe bǝn Kristi a jǝre wum a kullo bwiyu- Ngǝ wu Niyajiyu a jiya wariguwi. Wertang a chi nǝn tǝggi kurǝkwang. A chi nyang. ⁶ Mǝnni a chi bǝ da yǝm burǝm ba Niyajiyuwum a yarmǝn-yar. Bǝraki me wunǝ ni wa mura Isra'ilai a chi niya Isra'ilai. ⁷ Me warigu dugkan Ibrahimǝng a chin bǝtǝm ba Ibrahimǝm. Mǝnni, "Bǝn bu dugka mung a mura Ishakuwi." ⁸ Bǝra nyang bǝtǝm ba bwiyǝm me bǝtǝm ba Niyajiyuwum. Mǝnni bǝtǝm ba yǝm burǝmǝm ji ya chi bǝtǝm burǝm. ⁹ Bǝraki bwan dande ba yǝm burǝmǝm: "A fʊlla waiwe a jir dǝ berǝn bǝn be, bǝn ne yilli Saratu." ¹⁰ Me n'gǝ waiwe gǝn kwan, mǝnni a buk ka Rǝfkatu a dǝb fur a gwa te nǝnnu Ishaku- ¹¹ bǝraki bǝtǝmhǝm fu lambǝ bǝrǝ fu nyang bo a nǝngnga bǝ guji nya kǝ wu bwira ki, na ki kǝmarang ka Niyajiyuwung a jiya saurang ka gǝng ba chi bwi, me bǝra rǝ ji nǝngngai, mǝnni bǝra nǝn hangu wa nǝngnga buwongi- ¹² Kǝn sotǝna hangʊwi mo, "Wu gra ba nǝngngatǝn swiyer a wu sǝni." ¹³ Nǝn nyang nyǝngkǝ mula rǝgǝng: "Kǝn yotǝn da Yakubuwi, mǝnni kǝn ko Isuwa." ¹⁴ Wʊllai bo bǝnǝn sʊwei? Ka ji bwiraguwi a gwa Niyajiyuwi ga? Kari ba chi nyang. ¹⁵ Bǝrakǝ ka sotǝnna Musai go, "Bǝn nwi bumta wu bǝn nwi bumtǝ wi, bǝn tuga wu bǝn tugai." ¹⁶ Bǝrarǝ nyang, me bǝra fautang ka kǝmmangngi, yɨgira wu mwa sǝggi, mǝnni bǝra nǝn Niyajiyu wu nung bumti. ¹⁷ Bəra ki wang a sotəna Fir'aunai go, "Guggən bəra rə wai jiwe, mo na nungən kumni ta miyʊ, na si finang ka dunda miyən a gusətǝ warigu." ¹⁸ Bəra rə nyang, Niyajiyu bə nung bumte a wa fauwi, wa fauwi, kə ka dəgga chi rǝ durdə nəgənnən. ¹⁹ Bətə swimən to, "Wʊlla ma gi ki hangu ba suwe go kən leng? Wunə ga dəmən a wuga rǝ kǝmmang kagǝng?" ²⁰ A gu kulo ki, ni, mənnǝ wunə mǝn surə bagi yəm dang a dəməna ba Niyajiyuwum? Ji muri ka sotəna wa muwi go, "Bəra wʊllai kən mʊwi nyəngkəng ga?" ²¹ Ni mʊrə jɨi yu me rə sər a jiya jɨi a mu jɨ təmri bǝrarǝ swiyer yǝllǝn, na gu bǝra swiyer dǝ jʊtǝkwangǝn ga? ²² Mənni ki Niyajiyu, wu farə go gə nung bən jwagər dan ngəni na farə go gə nung bən kumni tan guwi, a ri rə mitang ka daang ka jwagərəng ka ti bərarə kon guwi? ²³ Mənni a chi go a nəngnga nyang go na gə nungbən gratəttangu a gwa nwitang a kunongi, wu hangu rə langtang ka kura bwi bəra gratə. ²⁴ Mənni a nəngnga bəra nən nən ki, bə hangu a buwem, me mo wa mura Yahudawai dən-dang, mənni a mura Helinawa? ²⁵ Nyəngka suwe gərə bo a mura Hosayang: "Bən buwe nəb ba miyəm bə na nu men nəb ba miyəməm, rə ba yodai ya guwum bə na nubə rə yodaiyəm. ²⁶ Ba chi go gu mənna sotənna hanjimi mo, 'Tə me tən nəbba miyəmmi,' a gai bən bu mo 'bətəm ba Niyajiyu rə yumiyəm.'" ²⁷ Ishaya duwa bwi bəra nən Isra'ila, "Na nu go mwama bətəm ba Isra'ilam nyira rə jusai ya lai ki, nəbbə na bən jəgəm ba nəbba dʊtənəm. ²⁸ Bəraki Nigra ba dəb mən bwamər dan ngən a gusəte, nyəngka yigtənne wariguwung. ²⁹ Ba chi nyəngkə Ishaya suwe rə gəng, Nigra jiyu na dʊbəmənbə bətəba buk ki, na bənən chi nyira rə Sodom tə Gomora. ³⁰ Mənni bənən suwe wulai?Na Helinawa, bə nanu me bə fungrə guiji wu nyaiyim, ka nya nəngnga tang a ji nya, nəngngatang a ji nya bəra butang a kang. ³¹ Mənni Isra'ila gə fungrə soriya nəngngatang a ji nyai, a nəngnga bə nyangi. ³² Wulə ba dang? Bəraki hanjim a fʊngbə re nəbbəntang a furi, yəmbə nyam mənni go wa gwa sweti. Hanjim a təlna a wurdə təlnawun, ³³ a nyəngkə mula rə ngəng, "Tə chu, kəmmən təra Zaitun werdə təl nawun na rə werda jənnni bwirai. Wa nəbbən yəmbə nyami me ba nwi bujiri.