¹ A chi kənən nya jəgtang a gwa nəbbəntang a yəmbə nyamiyəng, kǝ nǝn nya chim bǝ Lǝmangngǝm a gwa Nigra Yesu Kristiyu. ² A gwa giyu bo kǝnǝn nya sər da nəttətə nən dautən bəwun a gwa nəbbəntang a yəmbə nyami bǝnǝ siwum. Kǝnǝn nǝngnga bwiləmri dura səssi agwa Niyajiyuwi bera ji ka kǝgi, dura səssi bǝ nǝ mǝbra wertang ka Niyajiyuwung. ³ Me gən waiwe bwigi, mǝnni nǝn nǝngnga bwilǝmri bǝrarǝ notang a kunang. Kənǝn yǝm no notang a kunang ka bərə mitang ka dang. ⁴ Mitang a da, ka berǝ ngatang, ngatang ka berǝ dura səssi a ji ka kaggi. ⁵ Dan dura səssi dande me bə berǝ nwitan a bujiri, bǝrarǝ kǝn kwi yodaiya Niyajiyuwi a mura furna nǝnnʊ a gwa We Yulgoi, wu nǝbbǝn ni. ⁶ Bǝrarǝ ki fulla nǝn menǝnnǝ kumniyu, Kristi ka bwiya a fula dautənwi bǝrarə bə me rə yǝmbǝ nyaməm. ⁷ Nǝn nyang karǝ bwayǝr dǝni niya nga a bwiya bǝrarǝ ni nya. Kai ki, gu ba dǝmən a nga mii dur a bwiya bǝrarǝ ni nya. ⁸ Mǝnni Niyajiyu ka nǝbbǝn ngatang ka yodaiyanguwun a nǝn ni, bəraki a fulla nǝn karǝ jəni bwiraiyu,Kristi ka bwiya bǝra nǝn nǝn. ⁹ Mənni nyəngkə ku kǝn jǝgbǝn a gwa dugum ba gǝmmi, bǝnǝn nya jǝgtang a jwagǝr da Niyajiyuwun. ¹⁰ Bǝraki, a fulla wu nǝn nǝbba nǝngnga kagǝm, kǝn digiya sətəni ta nənu na Niyajiyu Yillanguwi, nən nyang bo, a bukkǝn digiya sətənita nənnuwung, bǝn jǝgbən bǝrarǝ yuum bagǝm. ¹¹ Men gǝn wai jiwu gə kwan, mǝnni ka nənnǝ bwilǝmri a mura Niyajiyu a gwa Nigra nǝnnu Yesu Kristiyu, wa a gwa giyu gunǝn nya digitang a səttəni taiti. ¹² Bǝrarǝ nyang, nyǝngkǝ jəni bwirai ka digi rə ga gusəte a gwa ni kwani, nǝn nyang bwiyate ka digiye bǝrarǝ jəni bwirai. Nyang bo bwiyatə ka chiya nǝb warigu bəraki nəb warigu ka nəngnga jəni bwirai. ¹³ Ka jəni bwiraiwe a gusəte, a fulla soriya bebi, mənni me mən kerə jəni bwirai nyəngkə me sori wung. ¹⁴ A Nyangngi, bwiyata a suwewa Adamuwi bera Musai, yigira ba nǝngnga bǝ bunaiya ya nwitang a yǝm ba Adamuwi. Wu gǝ wullo hanguwi ba bai. ¹⁵ Mǝni nyang nǝttihi me nyǝra letang. Ki bǝrarǝ letang ka kwanǝng, mwam ka bǝtǝro ki, nǝn nyang nǝttǝttǝn dautǝn buwi ya Niyajiyuwi tǝn nǝttǝta a gwa nǝttǝtǝn dautǝ buwi ta ni kwani, Yesu Kristi, a yumǝn yigira mwami. ¹⁶ Bǝraki nǝttihi me nyǝra ji wa jire wa a gwa nǝngngatang a jǝni bwiraiyu. A kǝgai kang duutǝta tirangngi a be bǝrǝ ni kwan a le juwi. Mǝnni a kagi kang nǝttǝtta berǝ jǝtangngi a bukka letang mwami. ¹⁷ Kǝ bǝrarǝ letang ka ni kwanəng ki, bwayate ka chi ya ni kwani, nǝn nyang bo ba yu nǝttǝtǝ dautǝnbuwi mwami na nǝbbǝntang ka nǝngngatang ka ji nyaiyǝng a chi chim a gwa yuum ba ni kwani, Yesu Kristi. ¹⁸ Bǝrarǝ nyang, nyǝra letang ka ni kwanǝng warigu ka nya titang nǝ nyang a mura swiyer dǝ nyan da ni kwanǝnǝn ba be rǝ jigtang a nǝb warigu. ¹⁹ Bǝrarǝ nyǝngkǝ bunaiya nwitang a yǝmmi a ni kwani a dǝg nǝb mwam a jǝni bwiraiyǝng, nǝn nyang rǝ nwitang ka yǝmǝng ka ni kwanǝng ka dǝg nǝb mwam a yullo rǝ nyaguwi. ²⁰ Betang ka duutǝng ka dǝg jǝni bwiraiya nǝngnga mwam. Mǝni gu jǝni bwiraiya yumǝni, nǝttǝttǝn dautǝn buwi ka yumǝn deni. ²¹ A nǝngnga bwi nyang, go na nyǝngkǝ lettang a chiya bwiyatǝng, nǝn nyang bo nǝttǝttǝn dautǝnbuwi ba chi a nǝngngatang a ji nya a gwa Yesʊ Kristi Nigra nǝnnʊwi.