¹ Mǝnni wulai ji Bayahude li bagi gǝri? Bo wullai ya nyamǝn a mwetang ka biyang ka kwaliya guwi? ² Karǝ fini a jəni warigu. Rǝ jigu, Yahudawa gǝ bǝ Niyajiyuwa ne wulloiyǝm. ³ Mǝni na bagi Yahudawa a nǝbbǝn bǝ yǝmbǝ nyam ki? Bunai ya nǝbbǝntang a yǝmbǝ nyamba jiyǝmmi ba dang ngatang ka Niyajiyuwung a nǝngnga swiyer ga? ⁴ Masi kari ba chi nyang. A jiya nyangngi, masi Niyajiyuwa yullo wurǝ yǝmbǝ nyami, kǝ wunǝ ni naba yullo wu kǝra nyati ki. Nyǝngkǝ mula rǝgǝng, ''Na ba nung mo me yǝmbǝ nyam a mura yǝmna mu, na kǝn nya jǝrtang a fulla wun be nǝn a gwa duutiyu. ⁵ Mǝnni ki bunai ya ji nyaiya nǝnu ba nungǝn ji nya Niyajiyuwi ki, wulai bǝnǝn suwei? Bənən suwe no Niyajiyu me bǝ nəngnga ji nyai, ka be bəmən rə jwagǝr da gǝn ga? [mǝn su yǝmma jiya kǝmmarang ka nǝbbǝng. ⁶ Kari ba chi nyang! Bǝrkǝ nǝn nyəngkə Niyajiyu ba nǝngngaten duuta gusətǝ go nyǝnne? ⁷ Mǝni ki yǝmbǝ nyam ba Niyajiyuwun wa gwa nyatǝtta niyuwi na wertyang ka gəng a kwar kak ki, wulai ya ma ki nǝngngəmǝn duutǝ mo mǝn nǝngnga jɨni bwirayǝng? ⁸ Mǝnni wullai ba dang ki su yǝm a jiya nǝnni, bagi bo ka dǝb go kənǝn suwe nyang-nyǝngke, 'Masi nǝn nǝngnga swiyerdə bwiran, na ji nya be' "? Duutǝttan jiyu bǝn nyam. ⁹ Kʊ wulai? Karǝ ji bǝnǝn yiya dur rǝgi ga? Me wu bani. Bǝrkǝ kǝnǝn su yǝmma jiya Yahudawa tǝn Hellinawa, no warigu wa jiyu bǝ tǝm jǝni bwirai. ¹⁰ Nyǝngkǝ mularǝgǝng, me rǝ wu tǝm ji nyai, mewu ba kwan. ¹¹ Me rǝ wu yǝmri, me rǝ wu farǝ Niyajiyuwi. ¹² Waringəm ba jiyəm ka nyǝgelmǝna juwi, waringəm ba jiyəm ka yullo me rǝ fini. Me rǝ wu nǝngnga swiyerdǝ nyani, o,o, mewu ba kwan. ¹³ Mirtan jiyu a wumǝnwu bwi nyǝra sutte. Langtǝttan jiyu a rii nǝn jǝni bwirai. Bǝltǝbaitan jiyu nǝn sam ba sotǝm. ¹⁴ Nyina jiyu a rii nǝn nǝngngatang a nyi tən tirǝti. ¹⁵ Nanan jiyu bǝ katǝn da kwitang a dugum. ¹⁶ Juwi ya jiyu kunong tǝn ligatang. ¹⁷ Bam nǝbbambə yǝmbǝ juwi a chimbǝ lǝmmangngǝmi. ¹⁸ Merǝ tata Niyajiyuwi a kǝmta jiyu.'' ¹⁹ Kǝnǝn yǝm ji duuta suwei, bǝ suyǝmma jiya bǝ ka tǝmrǝ duuti warigu. Waiwe warigu, na ba məra wunə nyi na gusəta warigu a nga a kakka a Niyajiyuwung. ²⁰ Bǝraki merə wu ba nya jəgrang a kakka Niyajiyuwung a gwa swiyetǝtta duutiyu.Bǝrkǝn yǝm duuta a gwa betangnga jǝni bwiraiyu. ²¹ Mǝni ku me bǝri duute kǝn nungbǝn yǝmtangnga ji nya Niyajiyuwi, wu duute tǝn nǝb yuwerǝm bʊ bukka gǝngngi. ²² Gǝn, ji nya Niyajiyu wi a gwa nǝbǝntangnga yǝmbǝ nyami a mura Yesu Kristiyu yigira gwa ba nǝbǝn yǝmbǝ nyami warigu.Bǝrkǝ me dǝndangngi we. ²³ Bǝraki nəb warigu ka nǝngnga jǝni bwirai ka yarmǝnna lautang a yulgoiya Niyajiyuwi, ²⁴ A ji nya nǝn dautǝnbǝwi yangu kǝn yiyabǝn a gwa mǝrtang ka mura Yesu Kristiyǝng. ²⁵ Mǝni Niyajiyu ka nǝbǝn Yesu Kristi wa chi ji tungri a mǝrtangngi a gwa nǝbbǝntangnga yǝmbǝ nyami a mura dugum bagǝmi.Ka nǝbǝn Kristi a ji a yǝmbǝ nyamba duutǝnttan guwum, na bo yamǝntang a jǝni bawiraiya nǝnu ya buggi ²⁶ A mura mitang ka dang ka gǝng. Nyang nyǝngki a nuwa bwi warigu nan ba nungbǝn jinya gu a mura dan tangǝr de, na ba chi bǝ nyam wurǝ duuti, na nungbǝn gǝba jǝg wunǝ warigu bǝrarǝ nǝbǝntang a yǝmbǝ nyam a mura Yesuwi. ²⁷ Gugtang a dur wa le? Kǝn jǝgmǝn. A wunǝ juwi? Bǝri swiyertǝ ga? O'o, mǝni bǝri nǝbǝntang a yǝmbǝ nyam. ²⁸ Bǝrarǝ nyangi gu nǝn mwarmǝn no ni bǝ nya yiyarang a gwa nǝbǝntang ka yǝmbǝ nyami me bǝrarǝ swiyetǝtta duuti. ²⁹ Mənni Niyajiyu, Niyajiyu wa Yahudawai dang nən ji ga? Menni Niyajiyuwa nǝbbǝ kummǝmmi ga? O, wa nǝbba kummǝmmi bo, ³⁰ Ki Niyajiyu kwan ki ba jəg bǝ mwetǝn bǝ biyang ka kwaliyǝng a gwa nǝbǝtang a yǝmbǝ nyami. ³¹ Kǝnǝn dǝbmǝn duute bərarə nǝbbǝntang a yǝmbǝ nyam ga? Me ba nǝngnga bwi nyang. Na ba yullo nǝn yǝgtǝn yǝngnatangnga duute.