¹ Nyang bo We təmri nʊwi, ka gʊ jummangʊ, kən chu beswangngi a jii a yarewa mʊra gʊsəte. Kən ne beswangngi baniya wʊmməntangnga fʊgang kə meri mwatəntəng. ² Ka wʊmmən fʊgang ka bwa kə merə mwatəntəng, go nyəng kə yon a jɨrewa fʊganhəng nyəra yonda jɨrewa bwaka kʊnang kə kʊntang.Ko tən səmba a wʊlga bwi yuumllu, bərari yondə jɨrera fʊgang ka bwang. ³ A mʊra yonhən ka ləngngate jɨrowʊre bera təm be kunəm, kənne kumni nyəra ka tertəng a jiya gʊsəte. ⁴ Kən sotən mo kari ba nəngngatən lʊtte, a yir tən wani bʊrsənni tən rite a gʊsəte, mənni bətə nəngngatənna nəbbə merə kʊrran da Niyajiyʊwʊn a pəsiya kakgi ya jiyʊwi. ⁵ Nebe sər mo juwo bam nəb bambe, mənni mo ne kʊnnang ka swangngərtəttə nʊwʊng. Kweiwiyʊ ba yullo nyəra wa te tangnga terti, a fʊlla ba te nəbbi. ⁶ A yai kotiye nəbba fau bwiyate mənni meba nya. Ba nəngnga jəllən da bwiyatən, mənni bwiyate ba mwamənna hanjimmi. ⁷ Ləngatəhi bo a jɨrgotən mʊngote tən samən ba nəngnga kunni. A jiya dʊttətan jiyʊ kari yagi jɨni nyəra gurmong kə kəlchə kəlchəng, katətan jiyʊ bo nyəra ya nəbbə təmbə kunnəmmi. ⁸ Yir da jiyən nyəra da wʊtəmmən, nungtə tan jiyʊ nyəra ta turʊmmi. ⁹ Jɨni dʊriya jiyʊ da ya chəmti, jittəta fʊmniya jiyʊwi nyəra jir da məndang ka mʊnggortəta kunni mwammi, tən mʊnggotətən ti bərari yɨgitangnga kunni. ¹⁰ Karə yʊntə jʊltəm nyəra ta terti; a jiya yʊntətan jiyʊwi karə sər da ba ne kʊnnang nəb wa swangngərtətə nʊwi. ¹¹ Karə gʊwan jiya dʊr nyəra nidʊwa We Təmri a bwa kə meri mwatəntəng. Dʊn da gən rə langngər da Ibraniyawan mo Abaddon, rə langngər da Hellenawan mo Apoliyon. ¹² Kʊnnang kərə jigʊwʊng ka su. Chuwe! Bukka yaiyəng ka taggi kʊnnangtə təsʊ təka beri. ¹³ We Təmri nʊkkʊni ka gʊ wʊgo jum, kən nwi jir jɨrera jumniya chəri kəlchi kəlchi ya kak ka Niyyajiyʊwʊngngi. ¹⁴ Jɨrhən ka sotəna We Təmri nʊkʊnni wʊ ka tau jumhiyʊ ''jammən Weni Təmri yətə gwari yə ka bʊwa a mʊra grajiya la Yʊfʊretisimi.'' ¹⁵ Weni Təmri yətə gwarri yən ti bərari wai fʊllai, tən wai koi, na tən kang swangngi, tən dan jirri, kən jammən kang mo a juwo kwan a mʊra tə bwambi ya nəbba gʊsətəmmi. ¹⁶ Mwammi ya nəbba barə kərangngəm, bə ka jiya mʊngoti 200,000,000. Kən nwi mwammiyan jiwʊ. ¹⁷ Kən chu mʊnggote nyang a mʊra churang rə nəbba gwiro jiyəm: Jɨni dʊriya jiyʊ nən kwiyʊ nyəra mʊggang, yuum, bʊrsən, tən nyəra gəmiya bʊbweti. Dʊttəta mʊnggoti, a jɨrgotənta turrəmti. A mʊra nyi Niyajiyʊi bo mʊggang rə yon tən kərang kə kwaʊwʊng. ¹⁸ Kən juwo mʊra kwan na tə bwanbiyʊ wa nəbbi rə yai jɨni a kʊnnangngi yaiye tə bwanbiyʊ: mʊggon rə yon də kwaʊwʊn, tən kərang kə jɨrera nyini Niyajiyʊwʊng. ¹⁹ Bəraki kumni ta mʊnggoti wa nyini ya jiyʊ tən yʊntəta jiyʊ-bɨrki yʊntətan jiyʊ a jɨrgo tən ta soti, mənni karə dʊtte tə ba nwitən bwata nəb gəri. ²⁰ Bagi nəbba gʊssətəm, bən juwobə rə yai jɨni yaiye kʊnangngi bo, a bubə kang a jiya swiyer də hanjim a nəngngan, mənni bo a dʊbə netang a grate weni bwirai, tən fʊngtngnga yətənatə kəlchəkəlchi tən yə kəlbari na ya chəmti, na wete na ritə-mebə chure, nwiri me bə dəmən yori. ²¹ A nyangngi bo a dəmən bə bukang a dʊwe jurung, nəngngatangnga weni, daam ba səmbatəm rə wʊtəm, tən bo rə swiyer da kʊtən