¹ Mənni bo kən chu gʊ gən da We təmriyən sʊwe ra ji. Ka mərawʊ bwi a mʊra korte, a jiya dʊr da gən ka kəblang ka hiyəng we. Kak ka gəng nyəra ko, nanan gʊ nyəra gwagta kərangngi. ² Ka tau be wangngi a kang ka gəng ka wʊmmənəng, ka ti nakə nyang ka gəng a jiya wimang, nakə gwilang ka gəng a jiya təm. ³ Ka mau wʊri rə kumni nyəra jiir da turʊmmən. Jii wa mau wʊriyʊ, korən də barə jiirən də nyibiyen ka sʊ yəm rə jiitətta jiyʊ. ⁴ Korən də barə jirrən də nyibiyen a sʊ yəmməng, mənna fau mo mən mʊla, mənni kən nwi dagi jiir a ji sʊwe rə go, "Tau wai jiwa məra-məra bwiyʊ wʊ korən də barə jirrən də nyibiyʊ a sʊwei. Kari bən mʊla." ⁵ Kə we təmri wʊn chuwa siya jiya wemang tə təmi, ka gug kang kə nyang ka gəng a ji. ⁶ Ka bau bʊni rə waiwə karə yuumum bə kʊrəkwangngəmi, wa nəngnga ji rə jɨni yə ka mʊriyʊ warigʊwi, na gʊsətte rə jɨniya jiyʊ, na wimang rə jɨni yə ka mʊriyʊ̂ warigʊ, kə we təmrihi a sʊwe go, "Me gʊ firi we." ⁷ Mənni a ko wʊ we təmri nyibiyʊ karə do rə gʊtangnga juma gʊwʊng, a jii hi waiwe n'gən jii na kullubwi ya Niyajiyʊwi ba rii nyagʊ nyəng kən sotən rəga kewetangʊ nəb yʊwerəməng." ⁸ Jiir dən nwiya jiyən ka kaba swimən yəm bo: ''Di, na dəb wang ka wʊmən bwiyəng kə ka kang ka we təmri wa siya jiya wimang tən jiya təmmi.'' ⁹ Kən diya gwa we təmrihiyʊwʊng kən sʊwe mo, niye bewanghəngngi, ka swimən go "Dəb wanghəng na jau. Ba dəg fur da mʊn a nəngnga tireti, a nyiya mo ba nəngnga chʊllʊ nyəra yʊtte." ¹⁰ Kən dəb bewangngihi a kang ka we təmriyəng kən jauwʊng. Ka nəngnga chʊllʊ deni a nyiya miyʊ nyəra yʊtte, mənni jauwʊng fur da miyən ka nəngnga tireti. ¹¹ Gʊ ka swimən go "A chin kwak kabi sʊ yəm bʊrəm bo a jiya nəb mwam, rə nəbbe, langte na dʊʊbe"