¹ Kən ni damər mo nəngnga fini rəge nyəra damər dən bɨngorəgən, kən swimən mo, "Gʊn na bɨnggo kaita Niyajiyʊwi na chəri yangʊ, na bə rʊwa nyini a mʊriyəm. ² Mənni kari bən bɨngo kauwʊrni ya kai ta Niyajiyʊwi, bəraki kən nəbbən a gwa nəbbə me Yahudawam ba fiya bɨrdə yʊlgoin swangngər fʊrtə gwar a jɨr təsʊ. ³ Bən ne nəbbə bʊrə bukka miyəng bəsʊ kumni a sʊ yəm yʊwerəm ba kotə nee kwan rə betə təsʊ rə fʊrtə nʊkkʊn, a miya dʊttəta yagtai. ⁴ Bə bʊ swirrəm be n'gən rita Zaitʊnniyə təsʊ na gʊ tiri ya gʊngor də kwetərəni təsʊ yə ka siya kak ka Nigra gusətiyəng. ⁵ Mənni wa nəngnga go gə nwitən bwati ki, kərang ka jɨrewa nyinan jiyʊ a jəlma kagəm ba kaggəm ba jiyəm. Wʊ farə go gə nwitən bwati, a chi kwak n'ju a wai jʊwi we. ⁶ Bambə bʊrrə swirrəm be karə kumni a məra ji kari bən swi hi a jii wʊ ka sʊ̂rə yəm bʊrəmmi. Karə kumni a wʊlga hita yullo dʊgʊm, na bo a bau gʊssəte re bwatə wiri dəndang a jii wa chu sərri warigʊ. ⁷ A bukka mwarmən bʊtang a bugəng ki, nam wʊ jɨrerra bwa kə me rə jitangngi ba nəngnga kun kin. Ba jau kun nən ji a juwo hanjim. ⁸ Libotan jiyʊ ba dara a jiya jʊwi ya bɨrdə kʊntan nən (wʊ jəggatang ka gəng mo Sadʊma tən Masar) gʊn yʊwa Nigrawi. ⁹ Kotəttə bwanbi rə gʊllo nəb warigʊ, nyabte, rə langte, rə bɨtte ba jəga libotan jiyʊ. Me ba nga n'dəgga a sute. ¹⁰ Ba chiro gʊsətəm ba nəngnga fur də kwauwʊn rə bwiləmri a jiya hanjimi, ba təmatən nətta bwitan jiyʊ bəra nəb təmrəm bambe bəsʊwʊm ba ne kʊnang ba chiya gʊssəttəm. ¹¹ Mənni a bukka kotəttə bwanbi rə gʊlo ki yuumum bə həgerəm a gwa Niyajiyʊwi ba dɨgiya hanjimi ki ba sira rə nanan jiyʊ. Tate ba yartəne wa bəba chʊwʊm. ¹² Bo ba nwi jiir rə kumni a ji sotənere go, "Tə gwiye wa gwe" nyang bo ba diya ji a mʊra korte, bə nəngnga kak nən jiyəm jəgare. ¹³ A wai jii wʊre bən nəngnga kətti kʊnta, ki kwan a jiya kwʊwi wa bɨrhənni ba yar. Nəb neete nyibi ba bəttəro a kəttihi, bən jəggəm bo ba nwi tate a wer Niyajiyʊwi. ¹⁴ Jiya kʊnangngi sʊwi ka su. Jəgga jiya kʊnangni bwanbiyʊ kə be rə kwa rə kwa. ¹⁵ Kə we təmri nyibiyʊ a gʊ wʊgo jumməng, kə jiitə rə kumni a sʊ yəmma a mʊra ji go "Dʊʊte ta gussəti ka yullo dʊʊte ta Nigra nənnʊwi nata Kristiyang gʊwi. Ba nəngnga dʊʊtətə kʊrəkwangngi. ¹⁶ Ki mənni tabəbə fʊr təsʊ a jɨr bə gwarrəm be bə ka chiro a gwa dʊntəllən da gratəni a kak ka Niyajiyʊwʊmi, ka yəra a hɨb katətta jiyʊ a təm. Ka wer Niyajiyʊwʊng. ¹⁷ Ka sʊwe go "Kənən nəngnga nən wʊnnan, Nigra Niyajiyʊ, wu dəb grati, wʊ kʊwi tən wʊ chərei, bəraki ka dəb kumni tangʊ tə grai ka sʊ dʊʊte. ¹⁸ Nəb ka nəngnga jwaggər, mənni kʊnang ka be. Jii ka lau wʊ bən nəngnga tən duuta ba bəttərom, na bən ne jɨni nyai kewe ta mʊ nəbbə yʊwe yəmməm, ba nəbbən yəm bə nyamməm, na ba nwi tata dʊn da mʊnnəm, wʊ kəttəlle tən wʊ kʊnta. Jii ka lau wʊ bən juwo bə lʊgtərə gussətəm". ¹⁹ Kən wʊmən kanda rʊwani nyiniyən da Niyajiyʊwʊn da jiyən, kən chu kwatti ya yəmbʊrəm ba gəmi a mʊra kanda rʊwani nyiniyən dagən. Kən chu kwetərei ya nyəlbatangngi, mʊgotang ka kəlbatangngi na kətti, rə gəntəta weti tə hiya kʊlgai.