¹ Kən chu kagi bɨngorang kə kʊntang a ji: gʊ nyʊi məra dʊr da n'gən rə ko, mənni swang ka təm ba nanənggʊwʊm, gurmong ka bettə swangngiyəng kwʊ a jɨr təsʊ a jiya dʊr da gən. ² Karə fur, kə ti wi kwewi a buwʊngngi, a mʊra kʊnnang ka buwʊngngəng. ³ Kən chu kagi bɨngorang a ji; chu ka gʊ gən da so bwiran kwiyʊ jəg səllənni rə dʊttə nyibi rə jumni kwʊ bo karə gurmong tə nyibi a jiya dʊttəttangʊ. ⁴ Yʊnnang ka gəng ka tʊrsamən kwan a jiya bwanbiyʊ ya betə swangngi ya jiyʊ ya kwiyo wa təmmi. So hi ka siya kak ka nyʊiwa diye rə do a buwongngi, go na jya buwi ki gə mii bwe hi. ⁵ Ka bu bwe bari, wʊ ba nəngnga dʊʊta nəb warigʊwi rə damər da mʊnnən, kən səbmən bweng gʊ yɨgira gwa Niyajiyʊwi rə dəntəllən da gən. ⁶ Nyʊi hi ka mwa dɨgiya sei a gʊ Niyajiyʊwi wa yəngnatəni na ba yo a kotə nee kwan re betə tesʊ re fʊrtə nʊkkʊn (1,260) ⁷ A jii hi waiwe kun ka gʊn a ji. Mikailʊ tən weni təmriyangʊ ka nəngnga kʊntən so jəg səllənni, kə so jəg səllənni tən yəggi weni təmri a bwigang. ⁸ Mənni so jəg səlləni merə kumni tə ba jau kunni. Bərarə nyang, n'gətən weni təmriyangʊ a kaubə bwi a nya gʊ chiri a ji. ⁹ Kən mauwe gən da so jəg səllənni tən weni təmra gʊ a təm, gən so funi wʊn bərə mo Iblisi bo na Chetani wʊ jʊlla gussətə warigʊwi. ¹⁰ Kən nwi dagi jiir dərə kumniyən a ji "Kʊ jəgtang ka be, kumni, rə dʊʊteta Niyajiyʊwa nənnʊwi, na rə kumni ta Kristiyan gʊwi. Kən mauwe wʊ mwe kak ka chəttətta nənnʊwi a təm- gʊwʊ mwe kak ka hanjiməng a gwa Niyajiyʊwi kum rə koi. ¹¹ Ka jau kun nən ge a mʊra dʊgʊm ba be Bənglam tən bʊtangnga buk a yəm bə nyam ba jiyəm, bəraki a yotən bə da yuum ba jiyəm yɨgira bwiyate. ¹² Bərarə nyang, nəngnga fur də kwauwʊn, jɨn korte na ba chiya mʊriyəm warigʊ. Mənni kʊnnang a gʊssətə tən wimang bəraki Iblis ka sʊwe wa jɨnni. Ka ri rə jwaggər da bwiran, bəraki ka yəm go jiyan gʊ a dʊtən nən bani. ¹³ Na so jəg səllənni a chu kən mauwe wa təmməng, ka tʊgo nyʊi waiwe a bu bwe bariyʊ. ¹⁴ Mənni kən ne nyʊi waiwe fʊmni təsʊ ya sigo kʊntai na ba mwa səg yɨgira gʊn yəngnatən a sei. A gai we gʊ bən to hangʊ a jii bani, rə jii te, na gullo jiiyʊ, a jiwʊ me so hi wi. ¹⁵ So hi ka jəgge hi a nyiyang gʊ nyəra la, na nya be rə bənnori wʊ ba dəb nyʊi hi yʊ. ¹⁶ Mənni təm ka tʊga nyʊi hi. Təm ka wʊm nyiyang gʊ ka mi la wʊ so jəg səllənni ya jəgge wa nyiyangʊwi. ¹⁷ Kə so jəg səllənni a nəngnga jwagər deni rə nyʊihiyəng, ka diya nəngnga kun tən kagi dʊgka nyʊihiyəng, bə ka nəngnga yobi nya rə soriya yəm ba Niyjaiyʊwʊmi bo, ka tau bʊtang a buk ka Yesʊwʊng. ¹⁸ Kə so jəg səllənni a siya jiya jʊssai a kak ka wimangngəng.