¹ Kən chu gʊ nam jɨrera wimang. Karə jumni kwʊ rə dʊtə nyibi. A jumnan gʊ ka gurmongtə kwʊ we, a jita dənə dʊrri ka dʊn da nʊrən we. ² Wai nam wʊn chuwi a jɨrgotən dʊmbo. Nanangʊ nyəra rə ya gʊrʊmi, nyiyangʊ nyəra wa turummi. So rə səlləni ka ne kumnitang gʊ hangʊ, rə dəntələn da gratən da gən, rə kumni go na hangʊ a chirə dʊʊte. ³ Dagi dʊr da namhiyən a nəngnga da n'ju ju, mənni derdə na kau rə kaniyən ka yəlləm. Gʊssətə warigʊ ka nwi mənatangnga bʊni nyəngka fʊng namhiyəng. ⁴ Hanjim bo ka rutəna so rə sələnihi rʊwatən nyini, bəraki ka ne kumnitang gʊ namhiyəng. Hanjim bo, ka kabi ya rʊwatən nyina namhi, sʊwe rə go, "Wʊnə gə nyəra rə nam waiwi?" na "Wʊnə ba bwigatən hangʊ?" ⁵ Namhi kən ne langngər da gugtangnga dʊrən tən də ba sʊra yəmni bwirai rəgən. Dʊ hangʊ mo na nəngnga fini rə kumnitang gʊ ka swangərtə fʊrtə-gwar a jɨr təsʊwʊng. ⁶ Bərarə nyang kə namhi a wʊm nyiyang gʊ kəbarə Niyajiyʊwʊng: Kəbarə dʊn da gən, rə gʊ chiriyang gʊ, tən ba chiya jiyəm. ⁷ Kən ne sər namhi mo gʊntən rə kun na nəb ba nəbbən yəm bə nyaməm na jau hanjim rə kun. Kən kaubwi bo, ne kumni hangʊ a jiya wʊnə nyabi, nəb, langte, na mʊrte. ⁸ Nəb ba chiro gʊsəttəm warigʊ ba rʊwatən nyinan gi, niwʊ dʊn da gən mʊlabi, rə sʊtang ka gusətəngngi, a mʊra wang ka yuumuməng, kə ka Be-bənglang, wʊ bwang-bwangngiyʊ. ⁹ Wʊ rə suuwi, a nwi. ¹⁰ Karə niwʊ bən tau di gəra keweti ki, ba diya kewete. Bən ju gʊ rə dampo ki, bən ju rə dampo. Kang buwong kə bərarə mitang ka daang na nəbəntangnga yəm bə nyam bərarə bə yʊlgoim. ¹¹ Kən chu gʊ nam jɨrera təm. Karə jumni təsʊ nyəra ya be-bənglarri, na sʊwe yəm nyəra so rə sələnni. ¹² Ka nəngnga swiyer rə kumnita nam rə jigʊwi a kak ka gəngngi, ka dəg gusətə tən bə ka mʊriyəm a rʊwatən nyini a nam wʊrə jigʊwiyəng-wʊ der da nwiyən ka biyənni. ¹³ Ka nəngnga jɨna mənatang ka bʊniyəng mwam. Ka səge kərang a yare wa gʊsəte a kak ka nəbbəng. ¹⁴ A gwa nʊngtangngi kən ngatənna hangʊwi mo nəngngai, ka jʊlla bə ka gʊsətəm. A sotəna hanjimi go a mʊ gʊji wa netangnga gratə namhiyʊ wʊ karə der da dampon na rə yuummi. ¹⁵ Kən ngatəna hangʊwi mo a ne yuumum jiwʊ mʊ bəra netangnga gratə namhiyʊ mo na sʊ yəm na dəg go wʊnə ni wa kwila rʊwatəntangnga nyini ya nam kai hiyʊ juu. ¹⁶ Ka dəg wʊnə ni kwak, wʊ merə finiyʊ tən wʊrə grati, wʊrə jɨna kaniyʊ tən wʊrə bʊnənni, kewe tən wʊ men kewei, go nəngngatən gʊ wulo a kang kə nyang na kak. ¹⁷ Rə bwaiyər niwʊ merə wai wulohiyʊ a sʊta gʊji na mi gʊji merə wai wulo wa namhiyʊki, kʊwihi gən kerang ka dəb dʊn da namhiyən nəng. ¹⁸ Wai jiwe buwong bəra bərsan. Ni karə yəmtangngi, a ke kerang ka namhiyəng, Bəraki kerang ka nəbbəng. Kerang ka gənghəng a jiya 666.