¹ N'jəgang kən chu Be-bəngla a səssi ya Həlla Sihiyonai. Nəb ba si tən hangʊwʊm nəb 144,000 bə karə dʊnvda hangʊwʊn tən da Tengʊwʊn mʊla-mʊlai ya katətta jiyʊ. ² Kən nwi dagi jir jɨrera ji barə jiir deni nyəra bənori kʊnta tən nyali. Jirhən də nwiyən nyəra nəbbə gurə swiyangngəm guro swirtətan jiyʊ. ³ Kə hanjim mara fitəng a kak ka dəntələn da gratən tən kak ka jɨni rə yuumumi yən nəngnga nəngngaiyʊ na tabe. Merə ni ya məsa fiyanghəngngi a diməna bə 144,000 bən sʊta wa gʊsətəm. ⁴ Nə jiba dʊbə bwitan jiyʊ rə nemər da nyimənnən, bəraki bwita hanjimmi nə yʊlgoi a jiya yəm ba dagatangngəm. Hanjim gə bə fʊngri Be-bənglam yɨgira wʊnə ka ba diwi. Bambə ji sʊtawa mʊra nəb mo na chi dʊwʊm bə rə jigʊwʊm bəra nə Niyajiyʊ na bəra Be-bəngla. ⁵ Nyabə nyar a nyina hanjimi; me jiya kəbariwe a kak ka dəntələn da Niyajiyʊwʊn. ⁶ Kən chu gʊ we təmri ya gʊn nəngnga lʊri ya ji, wʊn ne finang ka yəm bə ləmmangngəm bə kʊrəkwangngəm bərarə nəb bə ka chiya gʊsətəmi-yɨgira mʊrtə, nyabi, langngər, tən nəb. ⁷ Kə hangʊ a nəngnga buwong rə kumniyəng go, "Tə nwi tata Niyajiyʊwi na tə ne grate. Bəraki fʊlla wa dʊʊtəttangʊwi ka lauwe. Tə nevgrate hangʊwi, wa nəngnga ji, gʊsətə, wimang, na rə jʊta hiyʊwi." ⁸ Kə gʊ we təmri-we təmri sʊwi-ya fʊngnge sʊwe rə go, "Ka yar, ka yar Babila kʊnta, wa wʊ furna nəbbi warigʊ go no hiya inabiyʊ wa taltətang gʊwiyʊ." ⁹ Kə gʊ we təmri-we təmri wʊ bwanbiyʊ-a fʊngnge hanjiməng, sʊwe rə rə jiir də kʊntannəng go, "Kə gʊ kwan ba ne grate nam waiwe tən ji mʊtəna hangʊwi ki, na yʊ gʊ kʊwi a pəsi a kak ka gəngngi tən kang ka gəngngi ki, ¹⁰ ba no hiya inabiyʊ wa jwagər da Niyajiyʊwʊni rə kəgang, hiya inabiyʊ wʊn kwi na kʊgabi a mʊra chʊlle jwagər da gənni. Ni wa noi bən ne kʊnang rə kərang na kwewi a kakka weni təmra Niyajiyʊwi tən kak ka Be-bənglang. ¹¹ Yonda kʊnnang ka jiyəng ba gʊna ji kʊrəkwang me mwatəntə we, hanjim me rə gəri kum tən ko-nəb bə ne grate nam waiwʊm tən ji mʊ bəra nən gəmmi, tən wʊnə ni wa yʊ kʊwi wa dʊn da gənni. ¹² Buwong gəke bərarə mitang ka daang ka tautang ka furiyəng ka bə yʊlgoiyəm, ba fʊng soriya Niyajiyʊwʊm tən nəbəntang a yəmbə nyam a mʊra Yesʊwiyəm." ¹³ Kən nwi jiir a ji a sʊwe go, "Mʊla waiwe: Nəb bə dəgtən kangngəm gən ba bətəro mʊra Nigraiyəm." "O," We sʊwe, "go na ba gɨrməna swiyer da jiyən, bəraki jiya nəngngai ba fʊng hanjim." ¹⁴ Kən jəgang, kən chu korən də kwauwʊnəng. A mʊra korənhən nən gu a chə-chi nyərarə yəla niyuum. Karə gurmong ka chəmər də kəlch-kəlchən a dʊr da gən rə kii wʊrə nyi deniyʊ a kang ka gəng. ¹⁵ Kə gʊ we təmri a jɨre wa mʊra kanda nyini rʊwaniyən ka bu wʊ ka mʊra korəni rə kumniyəng go, "Dəb kii ya mʊ, na sʊ hartang, Bəraki sinang ka nəngnga, fʊlla gʊssəti ka lau hartang." ¹⁶ Kə wʊ ka chiya mʊra korənni a mauwe kii yan gʊ a gʊsətəng, ka har gʊsətəng. ¹⁷ Kə gʊ we təmri a jɨre wa kanda nyini rʊwaniyən da mʊra jiyənnəng; rə kəgang karə kii wʊrə nyi deniyʊ. ¹⁸ Kə gʊ we təmri bo a jɨre wa chəriya jɨni mətti-mətti, wʊ karə kumni ya jiya kərangngi. Ka bu wʊ karə kii rə nyi deniyʊ wʊ rə kumniyəng go, "Dəb kii ya mʊ, na kʊra tʊsita beta riyang ka inabiyʊ a gʊsəti, bəra ki betanggʊ ka bi kʊ." ¹⁹ Kə we təmrihi a mau kii yangʊ a gʊsətəng ka kʊra tʊssɨ ta gʊsətiyəng. Ka kwetənna hiya inabiyʊ wa tasang ka jwagər da Niyajiyʊwʊnəng. ²⁰ Ner da switang a hiya inabiyən wa bukka bɨrrɨng, kə dʊgʊm a jɨre a yar bənori wa lau sʊmʊr da kwer da mʊngorrən, ka lau mel betə təsʊ.