¹ Mənni kən chu gʊ wulu a mʊra jii gən dan giyən rə mənnatang a bʊntiyʊ: Ka weni təmri nyibi rə kʊnnnang nyibi, wa chi kʊnnang ka mwatəntangngi, tən hanjim jwagər da Niyajiyʊwʊn ba rii. ² Kən chu gʊji wa jɨrgo tən wimang ka kwetərrayən mʊrga tən kərang. A kəng ka wimangngəng gə ba jau kunni a jiya namhi na rə wulongʊ, na jiya mwami a ba dəb dʊn da giyənəng. Hanjim a tʊwa swirtə a kana jiyʊ tə Niyajiyʊ a nei. ³ Hanjim bə mara fitəttan Mʊsai, bwira Niyajiyʊwi, fiyang ka Be-bəglang: "Swiyer da mʊn nə grate rə mənatangnga bʊni, Nigra Niyajiyʊ, ni rə kumni warigʊwi. Jiya dautən wi tən yəm bə nyam jʊta mʊ, Nidʊwa mʊrti. ⁴ Wʊnə gə me ba nwi tata mʊ, Nigra, na me ba ne gratə dʊn da mʊni? Bəraki mʊmən ni yʊlgoi mən kwan. Mʊrta nəbbi warigʊ ba birawe a rʊwa nyini a kak ka mʊng bəraki swiyer də nyan da mʊn wa tari tangsang." ⁵ Bukka yai jəniyəng kən jəgang, kə wʊmən kan da nyini rʊwaniyən a ji rə kʊr da bʊtangnga buggən. ⁶ Weni təmri nyibi ka jɨroməne wa gwa li yʊlgoiyʊ rə jɨna kʊnangngi nyibi a tʊwa-tʊwai ya kanan jiyʊ. Dʊttəttən kwitəna hanjimi nən kalʊri, rə habən də nyan na rə daglata wer də rə chəmərənni a bʊwa-bʊwaiya furna jiyʊ. ⁷ Kə kwana mʊra jɨni rə yuumumi nəngngai ya ne weni təmri yə nyibiyʊ ye kasənta wer də rə chəmmərəni nyibiyən riro-riroi rə jwagər da Niyajiyʊwʊn, ga chi kʊrəkwang na merə jitangngi. ⁸ Bərarə gratətta Niyajiyʊwi rə kumnitangʊ kən ri kan da nyini rʊwanihiyən rə yonəng. Me rə ni ba dəga mʊri na ribə kʊnnang ka weni təmri nyibiyəng fʊwi.