¹ Kən nwi dagi jiir jɨrera mʊra kanda nyini rʊwaniyən sotəna weni təmri nyibiyʊ go, "Tə yɨgi tə kwi tasang tə nyibiyʊ ya jwagər da Niyajiyʊwʊn a jiya gʊsəte.'' ² We təmri wʊ rə jɨgʊwi ka kwi tasang ka gəng a jiya gʊsəte; detəttə bwirai rə kwewi a gurotə dəniyʊ ka jɨrtənne wa nəbbə rə kʊwi ya namhiyʊ, bə ne gratə wulogʊwʊm. ³ We təmri wʊ sʊwi a kwi wʊgo tasang a mʊriya wimang. Ka yuumlo dʊgʊmməng nyəra dʊgʊm ba wa bwiyaiyəm mənni bo wʊnə ji karə yuumumi a mʊra wimanghəngngi ka bətərro. ⁴ We təmri wʊ bwambiyʊ a kwi tasang a mʊra latə na gani hi jɨrewi ka yullo dʊgʊməng. ⁵ Kən nwi we təmriya hiyʊ a sʊwe go, "Mən ni nəngnga nya gʊwi, wʊ kʊwi na bo wʊ chirəi wʊrə yʊlgoi ya wei, na ba nəngnga tən duute a jɨni yaiye. ⁶ Bəraki ka kwisəre dʊgʊm ba nəbba nəbbən yəm bə nyamməm na nəb yʊwerəm, nee dʊgʊm na no bəraki jiya dautəna jiyʊ. ⁷ Kən nwi chəri ka nga; go, o, Nigra Niyajiyʊ wʊre kumni warigʊwi dʊutətta mʊ ta yəmbə nyammi na nyagʊwi.'' ⁸ We təmri wʊ gwari a kwi tasa gʊ a jiya ko, na bo kən ne da mo tung nəb rə kərang. ⁹ Ka tung rə kwewi deniyʊ, mənni bo ka kəba dʊn da Niyajiyʊwʊn, wʊ rə kumni warigʊ wa jiya witəkʊniyʊ. A bubə kang mənni a werbə hangʊ. ¹⁰ Kə we təmri wʊ nʊwi a kwi tasang ka gəng a jiya gʊ wa gratətta nam hiyʊ. Kə kumma məra dʊʊtəttang gʊwʊng ka təkgatən nʊngta lantətan jiyʊwʊng bərarə kwewi. ¹¹ Ka kəbba Niyajiyʊ wa jiyʊ bərarə kwewi tən detətta jiyʊ. Kə bo a kwila butangnga kang a mʊriya jɨni nəngngariyəng. ¹² We təmri wʊ nʊkʊnni a kwi a tasang ka gəng a mʊriya la kʊnta Yʊfiretisi. Hi hi ka kʊse bəraki yəngna bərarə dʊʊbəm ba be a tərrəm. ¹³ Kən chu weni yaksəri tə bwanbi a jɨrgo tən chʊmbwete jɨrera nyiya so jəg səlləni, na ni kəra nyatiya a ni yʊweriyʊ. ¹⁴ Bəraki weniya nidʊwa gʊsətti wʊ nəngnga jɨna mənatangnga bʊniyʊ bə yɨgiya dʊʊbə ba gʊsətəm na ba tə kʊrawʊ bwi a gʊ ka ki ni bərarə kunde kʊntan da ko Niyajiyʊ wʊrə kumniyʊ warigʊwi. ¹⁵ (''Tə jəga! kəmən bere nyəra niku! Ni dəgtang kangngi gwa chirə kʊratangnga bwiyʊ wʊ dʊ dʊʊtəttang gʊ bəraki me ba farə go gə jɨre wa tari, bwiyangʊ rə kʊn na hanjim a chu jɨniya bʊjirriyangʊ.'') ¹⁶ Kən be nən hanjim a gʊ kwani a gwan bərə mo Armagiddoni rə langngər da Ibraniyawan. ¹⁷ We təmri wʊ nyibiyʊ a kwi tasang ka giyəng a səmba. A nyangngi kə jiir də kʊntan a jɨrewa mʊriya kanda nyini rʊwaniyən na bo gʊ dʊntəllən də grani sʊwe rə go, ''Kən mwarmən!'' ¹⁸ Kən nəngnga kəlbatangngəng rə kur deni na rə mʊggotang ka nyalləng rə kətti bwira rə kətti nəngngamən bʊwi, a dəb be wa jiwʊn nəngnga nəbba gʊsəti, wai kəttiwi wʊrə kumniyʊ deni. ¹⁹ Gərrajiya wa bɨrhənni ka wʊtəgo bwi fangni tə bwanbi, mənni bo bətətta nəbbi ka yərra. Kən Niyajiyʊwa kəmmarə Babila wa gəra deniyʊwʊng, ka nəbbən bɨrhən a yullo bɨrda tasangəng dən rii rə hiya inabiyʊ wa rii rə jwagər da gən də kwewʊnən. ²⁰ Fʊnte ka kʊwʊ, n'kabə bwi chu wetəttangʊ. ²¹ Gəntətta wetətta hiyʊ, tə ka rə nəggənni nyəra talentiyʊ, ka yərawa jiya a dʊra nəbbe. Ka kəba Niyajiyʊwʊng bəra kʊnang ka wetəttə lattətiyʊ bəraki kʊnanghəng ka kwewʊ deni.