¹ Kwana mʊra weni təmri yaiye nyibiyʊ ye wa tau tasante nyibiyʊye ka be swimən go, ''Be na nʊngngən duutəttə bə nəngngatənna tali kʊntawiyʊ, wa chiya hi mwamiyʊ. ² Hangʊwa nəngnga talte tən dʊʊbəba gʊsətəm. Rə hiya inabiyʊ a gʊ wa talti wa dautən bə wi a gwa juu nəbba chiya gʊsətəm.'' ³ Kə we təmriya dəbiya mʊriya we a di nən me a seiyəng, kən chu nyʊi a chiya jiya nam a rii rə dʊntəttə bwirai. Nam hi karə duttə nyibi rə jumni kwʊ. ⁴ Nyʊihi bo kamai dʊtəttə kwiwi na tə tərsənni, ka dɨgiya dʊtetə kəlchə kəlchi nəngnga nyera wete kəlbari deniyʊ, ka tau tasang ka wetəttə kəlchə kəlchi a kang ka gəng a riirə jɨni sərimmi na yaksərri ya talti ya dautən bə wi. ⁵ A pəsi ya kakgə kən mʊla dagi dʊn a kəllʊ kəllʊwi bwi wʊ jəggebe ji sʊweriyʊ: ''Babila wʊ gra ne talbi rə jɨni yaksərri a gʊsəte.'' ⁶ Kən chu nyʊihi me kəmmarang kagəng bəraki ka no dʊgʊm ba nəbba nəbbən yəmbə nyaməm, na rə dʊgʊm ba bən juwom bəra nən Yesʊwʊm. N'chuwʊng kən mənna bʊni deni. ⁷ Mənni kə we təmriya swimən go, ''Bərarə wʊlai kəmən mənna bʊntəng? Bən jəgganən nihi na namwa dəb be hangʊwi, namhi wʊ karə duttə nyibiyʊ rə jumni kwʊwi. ⁸ Nam chu chirei we me we kʊ, mənni yəmma ba be a bwa kən yəm bə wullʊloiya gʊwʊng, a nyangngi bə yɨgiya bwiyate. Bə ka chiya gʊsətəm, bə mʊla bə dʊntətta jiyʊ a wang ka yuumuməng nyəngkə nəngnga gʊsətəng-ba chu jiya mənatangnga bʊniyʊ a jiya chu namhiyʊ nyəngkə kagərəng, me gaiwe kʊ, mənni yəma ba be. ⁹ Kang buwʊng kəngke bə fau furri karə bərsanni. Dutətte nyibiyʊ, n’həllanni nyibi tə nyʊi wa chiwa jiyʊ. ¹⁰ Hanjim dʊʊbə nyibi. Dʊʊbe bə nʊ ka yəra, kwan kawe, mənni wʊ kwani a be bə fʊ. A bukka beng ba chiya fʊlla bani. ¹¹ Namma chi rə jigʊwi, mənni kʊ mewe, gə ba chi nidʊ narʊwi, mənni ka kwan a mʊriya dʊʊbə bə nyibiyəm be, mənni bo ba diya kiyatang. ¹² Jumni yaiye kwʊ a chi wi ye gən dʊʊbə bə kwʊ ba yəbbə dʊʊte fʊwʊm, mənni ba yʊ kumni nyəra ta dʊʊbi a fʊlla kwan tən namti. ¹³ Kəmmarang ka jiyəng kin, ba nəbbən dʊʊte na rə kumni na tə nyai a nam hi. ¹⁴ Ba nəngnga kʊn tən Be-bengla. Be-bənglahi ba li kumniya dʊr da jiyən, bəraki Nigra nəbbə grammi na bo Nidʊwa dʊʊbə warigʊwi-mənni bo na hanjim gə bən buwowʊm, samənsauwiyəm, n'nya gərəm.'' ¹⁵ We təmriya swimən go, ''Hitə chuwi ye, gʊ talli we chiwi, n'gʊ nəb mwam kʊra bwi deniyʊ na tagi langte ta nəbbi. ¹⁶ Jumni yaiye kwʊ chuwi-ye hanjim tən namhi ba kwila tallihi. Ba kwila hangʊ, a dʊ hangʊ gən kwan rə bwi təllən, hanjim ba jau namtangʊ, ba tung hangʊ warigʊ rə kərang. ¹⁷ Bəraki Niyajiyʊ ka dəgga fur na jiyʊ a nəngnga kəmmarang ka gəng na rə ngatang ka gəng, a səgge kumni ta jiyʊ dʊutətta jiyʊ a gwa namhiyʊ, ki mənni yəm ba Niyayiyʊwʊm ba rii. ¹⁸ Nyʊi chʊwi we gən gən da bɨrrən də nəngnga dʊʊte a dʊʊbəm ba gʊsətəm.''