¹ Fʊlla Be Bangla wʊmmən kʊrran də nyibiyəni, kən marasi sau a korən nyərari gullo jiiyʊ. ² A nyangngi kən chu weni təmri nyibi yə ka sira kak ka Niyajiyʊwʊng, kən ne jumni nyibi hanjim. ³ Gʊ we təmri kabe, rə tasang ka jɨni mətti-mətti yən tungri ya wer də kəlchə-kəlchən, a siya kak ka a chəriyəng, jɨni məttəmətti tungri mwam kən ne hangʊ na ki a yak tən nyini rʊwani warigʊ ya nəbba nəbbən yəmbə nyaməm a jiya chərrin tung jɨni məttəmətti wi a wer də kəlchi kəlchən a kak ka dəntələn da gratəni. ⁴ Yonda jɨni məttəməttən dən tungrən, rə rʊwatang ka nyiniyəng ka nəbba nəbbən yəmbə yəmməm, ka gwiya jii a kak ka Niyajiyʊwʊng a gwa kang ka we təmriyəng. ⁵ We təmri ka dəb tasang ka jɨni məttəmətti yə tungri ka rii rə kərang a jiya chərri. Mənni bo ka mauwe wa təm bera gʊsətte, kə mʊggotang ka korənnəng rə kʊr rə kəlbatang kə kwetəreng, re kətti bo. ⁶ Weni təmri nyibi yən ne jumni nyibiyʊ fare go tə gʊ. ⁷ We təmri rə jiguwi ka gʊ wʊgo jum, kə sʊrrita wetətta hiyʊ rə kərang a mʊrga bwi tən dʊgʊm. Kən maiye wa təm bera gʊsəte kə kwan a mʊra tə bwanbi a gʊsəti a juwong, kwan a mʊra tə bwanbi a ritti ka juu rə yir də chəbtərən ka juu warigʊ kwʊng. ⁸ We təmri sʊwi ka gʊ wʊgo jum, kə gʊji a jɨrgo tən gən da bangngən də jarə kərangngəng kən maiye wa wemang. Kwan a mʊra tə bwanbi a wemangngi ka yullo dʊgʊm, ⁹ kwan a mʊra tə bwanbi a jɨni rə yuumumi ka mʊra wemangngi ka bəttəro, kə gʊ kwan a mʊra tə bwanbi a bontəlong tətta hiyʊ kən lʊgte. ¹⁰ We təmri bwanbiyʊ ka gʊ wʊ go jum, kə grajiya beswangngiyʊ a yarre wa jiyəng, jarre nyərari kərramʊk, kwan ajiya tə bwanbi ya lati ya nʊwa hiyʊ wʊteri. ¹¹ Dʊn da beswangngi hiyən mo kad-də-kad. Kwan a jiya tə bwanbi a hiti ka nəngnga terətei, kən nəb mwam a bətərong bɨrarə hita yuumlo terətei. ¹² We təmri n’gwari ka gʊ wʊgo jum, kə kwan a mʊra tə bwanbi a koi a te bwiyəng. Rə kwan a mʊra tə bwanbiya swangngi, rə kwan a mʊra tə bwanbi ya betə swangngiyʊ. Kə kwan a mʊra tə bwanbi a jiyʊ warigʊ ka nəngnga yuumllu. Kwan a mʊra tə bwanbi a koi, rə kwan a mʊra tə bwanbi a kummi ka bʊna kwetərei ya jiyʊ. ¹³ N'jəggang, kə nwi bonggəmong yogora a jʊgər da kortən nəngnga buwong rə gan da jirən, ''Jiya kʊnangngi, jiya kʊnangngi, jiya kʊnangngi, rə ba chiya gʊsətəm bərarə tagi jittəta jumniyʊ tə weni təmri tə bwanbiyʊ, a dʊtən ba gʊwi.''