¹ A bukka nyangngəng kən chuwe we ni təmri tə gwar a siya kəngngər tə gwar ta gʊsəti, kən hanjim a tawe səmbatəttə gwar ka gʊsəti kəngkang bəri səmba ba gʊ a mʊra gʊsəte, a jiya wemang, na rite. ² kən chu gʊ we təmri bera tʊr, wu karə kʊrran da Niyajiyʊ rə yuumumi. Ka nəngnga buwʊng rə jiir də kʊntan a gwa we ni təmrəm yə tə gwari yən ne sər mo ne gʊsətə kʊnang tən wemang. ³ Kari bətə ne kʊnang gʊsətte, rə wemang tən rite yɨgira ko bənən dəg kʊrran a jiya kak ka keweta Niyajiyʊwa nənnʊwi.'' ⁴ Kən nwi mwamiya a bən titən kʊrranəm: 144, 000 wʊn dəgtən kʊrran a mʊra langtəta nəbba Israilam warigʊwʊm: ⁵ nee te kwʊ a jɨr təsʊ gən kʊrran da dəgən a gwa sʊr da Yahuzan, neete kwʊ a jɨr təsʊ, a gwa sʊr da Ra'ubainu, nee te kwʊ a jɨr təsʊ, a gwa sʊr da Gadən, ⁶ neete kwʊ a jɨr təsʊ, a gwa sʊ rda Ashirun, nee te kwʊ a jɨr təsʊ, a gwa sʊr da Naftaliyən, nee te kwʊ a jiɨər təsʊ, a gwa sʊr da Manassan. ⁷ nee te kwʊ a jɨr təsʊ, a gwa sʊr da Saminʊwʊn, nee te kwʊ a jɨr təsʊ, a gwa sʊr da Lawiyən, nee te kwʊ a jɨr təsʊ, a gwa sʊr da Issakan, ⁸ nee te kwʊ a jɨr təsʊ, a gwa sʊr da Zabaluna, nee te kwʊ a jɨr təsʊ, a gwa sʊr da Yʊsʊfuwʊn, na bo nee te kwʊ a jɨr təsʊ, a gwa sʊr da Benjami kən dəg kʊrran. ⁹ Bukka yai jɨniyəng kən chu, mənni ka grajiya kʊlən də me gʊ kwan ba dəmən ba ken, a bɨttə warigʊ, sʊte, nəb, rə langte, ka sira kak ka dəntələn da be Banglan. Ka miya ləngni kwauwi rə wana jʊlongngəri a kannan jiyʊ, ¹⁰ mənni bo kə nəngnga buwong rə jiir də rə kumniyən: yiyarang a chi a gwa Niyajiyʊwa nənnʊ wʊ ka chiyewa dəntələn da gratən, tən Bənglan!'' ¹¹ Weni təmri warigʊ ka sira sirai a kawʊr rə dəntələn da gratən na bo kawʊr tabəm bam be rə bo jɨni rə yuumumi tə gwar nəngngai, ka hɨb fʊrtan jiyʊ rə katətan jiyʊ a kak ka dəntələn da gratən. Ka ne gratə Niyajiyʊ. ¹² Sʊwe rə go, ''Amin! wertang, grate, bərsan, nəngngatang a wʊnnan, netangnga grate, kumni, kumni ta bwiyʊ, a chi a gwa Niyajiyʊwa nənnʊwi kʊrəkwang kə kʊrəkwangngəng amin!'' ¹³ Kə kwan a mʊra tabəm a gʊlliyəng, ''nən ba wʊnə bam be, a miya dʊttətə kwauwi, mənni bo, a jɨre wa le?'' ¹⁴ Kən sotən mo, ''Bəgsər, Kən yəm,'' Ka sʊwi mən go, ''Bambe gən ba jɨre a mʊra kʊnang deniyəm. Ka tʊmən dʊtətta jiyʊ a chi tə kwauwi a mʊra dʊgʊm ba Be Banglam. ¹⁵ Bərarə nyangnyəng ki, hanjim ka kak ka dəntələn da Niyajiyʊwʊni, mənni hanjim ne grate hangʊ kʊm rə ko a mʊra kaita rʊwatangnga nyina gʊwi. Hangʊ ka chiya dəntənlən da gratənni ba wumtən kəngləng ka gəng a jiya hanjimi. ¹⁶ Me ba kabi a nwi jʊwʊn, na rə hi kʊgri, ko me ba bau hanjim, na re kwewi ba jʊwi. ¹⁷ Bəraki be Bəngla ka səttəni ta dəntələn da gratəni ba chittən yari, mənni bo ba fʊng nən ji yɨgira bwa ka hiya yuumumiyəng, mənni Niyajiyʊ ba tʊrsamən betəkəmmi warigʊ a kəmtan jiyʊ.''