¹ A bukka yai jɨni yaiyəng, kən jəgga, mənni kən chuwe fʊgangnga wʊmmən bwi ya ji. Jir də nwi rə jigʊwən swimən yəm nyəra da jummən, ''sʊwe rə go, gwiye wa gwe, n nʊngən jɨna chi kwak ba nəngnga bwiyʊ a bukkə yai jɨni yaiyəng.'' ² Rəkwa-rəkwang mən ka mʊriya We, kəmən chure dagi kʊlgənən də tiya mʊra jiyən, rə gʊ ni ya chiya ji. ³ Ni wʊ ka chiya jiyʊ ka jɨrgo tən yespa na yakutu, kə kəlbɨna hiyʊ a kawʊrre dəntələnhən kɨlbɨnɨya hiyʊ a jɨrgo tən wer. ⁴ Kə dəntəltə fʊr təsʊ a jɨr tə gwar a kawʊrre dəntələnhəni, nəb a chiro dəntələntihi bo, tabe fʊr təsʊ a jɨr tə gwar, a miya dʊttatə kwauwi, rə gʊrmongta duttətan jiyʊ. ⁵ A jiya dəntələnhən, kɨlbɨni hi, jɨrərə, jirtə rə kumni ta korən da barə jiirən. Gʊngortətta kərangngən nyibi ka jare a kak ka dəntələnhənəng, gʊngortihi gə wena Niyajiyʊwi nyibiyʊ. ⁶ A kak ka dəntələnhənən ka wəmmang ka jɨn jəga wulowi wi, wʊ kəlbarə nyəra kweyəlgai, a mʊra jʊgər da dəntələnən da kawʊrən ka jɨni rə yuumumi we ka lautə gwar a ri rə kəmte kak rə buk. ⁷ Ji rə yuumumi rə jigʊwi, ka jɨrgo tən turəm, ji rə yuumumi sʊwi bo a jɨrgo tən bətənga, ji rə yuumumi bwanbiyʊ, kak ka gəng a jɨrgotən kak ka niyəng, mənni bo ji rə yuumumi gwari, ka jɨrgo tən figo gʊnna jiyʊ. ⁸ Jɨni rə yuumumi warigʊ tə gwar karə fʊmni tə nʊkkʊn tə nʊkkʊn, a rii rə kəmte a ji tən təm ba fʊmniyəm. Rə kum rə ko a dʊbe sʊtang go “Wʊ yʊlgoi,” “wʊ yʊlgoi”, nən Nigra Niyajiyʊ, nən ge kʊwi nən ge ba bei.'' ⁹ A fʊlla warigʊ wʊ jɨni rə yuumumi ne gratə, rə wertang, təm wʊnnan a wai ni na chiya jiya kʊlgənənni, wʊrə yuumum bə kʊrəkwangngəmi. ¹⁰ Kə tabə bambe fʊr təsʊ a jɨr bə gwarəm ka yəra kwi katəta jiyʊ a təmməng a kak ka hangʊ wʊ ka jiyʊ a chiya dəntələni. Kə hanjim a ne grati hangʊ wʊ rə yuumum bə kʊrəkwangəmi. Ka kwiyo gʊrmʊngtan jiyʊ a kak ka dəntələnhən. Hanjim sʊwe rə go.'' ¹¹ Ka dautən we, Nigra tən Niyajiyʊ wa nənnʊ, masi yʊ wertang na grate tən kumni. Bəraki kən nəngnga jɨna gusətti warigʊ, rə fautang ka mʊng, ka yullo kən nəngnga.