¹ Yɨgira Ekklisiya Sardisi, mʊla: Bwantəta wʊ ka tau weni nyibi ya Niyajiyʊ na bətə swangngi nyibiyʊ. "Kən yəm jɨn təmmi. Kən nəngnga dʊn mo mən kaməni yuumum; mənni n'bwiya bwiya. ² Yəmma na yɨgtən kʊmni a jiya dʊtənni, na yəmma ba bwiyai, bərakə nyabe swiyer da mʊn a rii rii a kak ka Niyajiyʊ a miyʊwʊng. ³ Bərə nyang kəmma rə jɨni yʊ na nwiyʊ, nwi tən yəm, na bukang, mənni yəmma bə ki, bən be nən nyəra niku, bo, me bən yəm a jii bən be kak ka mʊngngi. ⁴ Mənni ka dʊntəta nəb baniyəm a Sardisʊ ba lʊgtə be dʊttəta jiyʊ rə nemərəng, bənən yoyom kin, rə dʊttətə kwauwi bərakə ka dautən we. ⁵ Wa jau kunni, bən maitən dʊttətə kwauwi, me bən tʊrsamən dʊn da gən a wang ka yuumuməng, bo bən sʊ dʊn da gən a wang ka yuumumməng, bo bən sʊ dʊn da gən a kak ka Temiyʊwʊng, na kak ka Weni təmriyəng. ⁶ Masi wʊrə suniyʊ a kautən suuni a ji we sotənna Ekklisiyai. ⁷ Yɨgira We təmri wa Ekklisiya Filadelfiyai, mʊla: Bwantəta wʊ Yʊlgoiyʊ na rə yəmbə nyamməmi, rə bani wʊmri yan Daudai, a wʊmmən ki me rə ni ba mərrai; a mərra ki me ni ba wʊmənni. ⁸ Kən yəm ji nəngngai. Jəga, kən dʊ fʊgang a wʊmənwʊwi bwi a kak ka mʊng kə me ni ba mərrang. Kən yəm kumni ta mʊ nən bani, a nyangngi kən nwi yəm ba miyəm nəngnga bə bʊri ya dʊn da miyəni. ⁹ Chu! Wa ti kandan Chetanən, sʊwerə go tən Yahudawa, mənni na bə kərra nyatəm; Ba be runən a nana mʊ, ba yəm go kən yonən da. ¹⁰ Nyəngkə mida mʊra kunangngəng, kən so soriya miyʊ, me bən ton a jii bɨngorang ba sutənne wa gʊssətə warigʊwi, na bɨngorang a nəbba chiya gʊsətəmi. ¹¹ Ka mən bere wʊllag, tau ji mən ka gəri kəngkang, kari gʊ ba yənnən gurmong ka mʊng. ¹² Bən dəg wa jau kunni a chi jɨng ka Ekklisiya Niyajiyʊwa miyʊwi, nəbba jɨrməna gai. Bən mʊla dʊn da Niyajiyʊwa miyʊwʊn a dʊr da gən, dʊn da bɨr da Niyajiyʊ a miyʊwʊn. (Urshalima fi wʊ sʊwe ra ji a gwa Niyajiyʊ a miyʊwi), rə dʊn də fiyən. ¹³ Masi wʊrə suuniyʊ a nwi ji We sotənna Ekklisiyai""". ¹⁴ Yɨgira we təmri ya Ekklisiya Lawudikiyai, mʊla: Bam be gən bwantəta amin ni, bən mʊtən ji a ba buk ka yəm bə nyamməm, wʊ nəngnga dʊʊta jɨni Niyajiyʊ a nəngnai. ¹⁵ Kən yəm ji nəngngai, mən me lattəti, me kweiyʊ. Kən fau mo mənna nʊ lattəti kən kwe wi ki. ¹⁶ Mənni bərarə rəbagiya mʊ wa jʊgər me kweiyʊ, me lattəti, yəmma bən sʊggəne a nyi ya miyʊ. ¹⁷ Bəraki kən sʊ mo mən mənni, "Ni rə jɨna kaniyʊ, kən kʊrra gənna mwam, bʊna be gʊji." Mənni yəm bə mo mən ni rə bʊnən deniyʊ, jiya kʊnangngi, ni rə bʊnənni, dʊna bwi rə kʊnni. ¹⁸ Nwi yəm bʊrəm a mi: Sʊtta wer də kəlchəkəlchən də summa kərrangngi a mi na chi ni rə jɨnna kaniyʊ, na məra bwiyamʊ rə dʊttəttə kwauwi tə kəlbari, na kari bən nwi bʊjɨri ya bwi rə kʊnni ya mʊ na nʊng swara tənna kəmta mʊ a nya chutang. ¹⁹ Kamən wʊng wʊnə yotən dai, ka mən məssatən yobi ya chimmi. Bərarə nyang, kʊrra bwi na bukang. ²⁰ Chu, mən ka nyi ya fʊgangngi mən burore, wa nwi jir da miyən na wʊman fʊgangngi, bən dɨgiya mʊra kai tang gʊ na nən jau nən hangʊ, na hangʊ nən me. ²¹ Wa jau kunni, bən ne da nən chi kin a dʊntəllən da miyən, nyəra kən jau kun na chi nən Te miyʊ a dʊntəllən da gənnəng. ²² Masi wʊ kari suuniyʊ a kautən suu a ji We sotənna Ekklisiyai."